Ankho palamba-le omanima tunde etyi Sesusi ambatisalwa, pahe wiiwe nawa. Ova Sundeu ovanyingi vamona omahuviso ae iya ovipuka alinga aviliyandyana motyilongo atyiho. Pahe, Motyipito Tyomakaka (ine Onohinge) ko Selusalei, ovanyingi ankho vekahi nokumuovola.

Ovanthu ankho vena omalusoke elikalaila konthele ya Sesusi. Vamwe ankho vati: “Omulume umwe ukahi nawa.” Ovakuavo ankho vati: “Kekahi nawa. Ukahi nokuyondya ovanthu.” (Suau 7:12) Ankho vekahi nokupopia ngotyo haunene pononthiki otyipito tyahimbika. Mahi, ankho vena owoma wokupopila povanthu konthele ya Sesusi mokonda yononkhalamutwe mbova Sundeu.

Mokueenda kuotyipito, Sesusi anyingila mondyuo ya Huku. Ovanthu ovanyingi avahuvu nounongo wae wokulongesa. Sesusi nalumwe atangele monosikola mbononkhalamutwe mbonongeleya, ngotyo ova Sundeu avelipulu okuti: “Oñgeni omulume ou ena enoñgonoko Liovihonekwa tyina ahalongesilwe monosikola?” — Suau 7:15.

Sesusi ati: “Etyi ndyilongesa hatyange-ko mahi otya una wanthuma. Inkha umwe uhanda okulinga ehando Liae, manoñgonoka inkha etyi ndyilongesa tyatuka ku Huku ine etyi ndyipopia tyatuka mu ame.” (Suau 7:16, 17) Etyi Sesusi ankho alongesa tyelikuata Novitumino vya Huku, ngotyo atyimoneka nawa okuti ankho wovola okunkhimaneka Huku, kaovola okulinkhimaneka.

Konyima, Sesusi evepulu ati: “Moisesi kemupele Ovitumino? Mahi nawike pu onwe utavela Ovitumino. Omokonda yatyi muhandela okundyipaa?” Ovanthu vamwe, tyafuile ovaenda vatunda kondye yepunda-umbo, ankho kavetyii okuti kuna vamwe vahanda okumuipaa. Ankho kuvo katyaviukile omunthu okuipaa omulongesi omuwa ngoo. Ngotyo, avasoko okuti tyafuile Sesusi kekahi nawa, otyo apopila ngotyo. Iya avati: “Ove nkhuali una otyilulu. Olie uhanda okukuipaa?” — Suau 7:19, 20.

Mahi tyotyili, ankho palamba vala enima notyihupe, tunde etyi ova Sundeu vahandele okuipaa Sesusi mokonda yokuavelula omulume umwe Motyasapalo. Pahe Sesusi apopi otyipuka tyevekuatesako okusoka iya alekesa okuti olusoke luavo luapenga. Apopi okuti ngetyi Ovitumino vipopia, olukembe ankho una okupitiswa ekuendye monthiki ya tyinana, alo umwe inkha Omotyasapalo. Evepulu okuti: “Inkha onwe mupitisa ekuendye omulume Motyasapalo opo mufuisepo Ovitumino vya Moisesi, omokonda yatyi mukalela nonyengo onene na ame nahakula omunthu Motyasapalo? Yekei-po okukoyesa okutalela kuetyi mueete, mahi koyesei monkhalelo yaviuka.” — Suau 7:23, 24.

Ovanthu vakala mo Selusalei ankho vokutyii, avati: “Omulume ou hae vekahi nokuovola opo vemuipae? Mahi tala ukahi nokupopila povanthu, mahi otyo vahapopi natyike! Okuti ovatumini pahe vetyinoñgonoka okuti omunthu ou o Kilisitu?” Mahi omokonda yatyi ovanthu ankho vehetavelela okuti Sesusi o Kilisitu? Ankho vati: “Omokonda omulume ou, oku atunda twii-ko, mahi tyina Kilisitu eya nawike manoñgonoka oku matundu.” — Suau 7:25-27.

Mondyuo ya Huku, Sesusi apopi okuti: “Onwe mundyi, tupu oku natunda mwii-ko. Mahi ame heile kehando liange muene, Una wanthuma owotyotyili iya onwe kamumwii. Ame ndyimwii, mokonda ame ndyimutumwa wae iya oe wanthuma.” (Suau 7:28, 29) Mokonda yetyi Sesusi apopia tyayandyuluka nawa, avahande okumukuata opo vemupake mokaleya ine okumuipaa. Mahi, avehetyivili mokonda omuvo wa Sesusi wokunkhia ankho kaunehike-po.

Mahi, ovanthu ovanyingi avalingi otyipuka ankho vena okulinga, okukala nekolelo mu Sesusi. Sesusi waendelele kombanda yomaande, atulisa epuku-puku liomphepo, tupu waavelele ovanthu ovanyingi onombolo mbehehi nombisi kehuviso, wahakulile ovavei, novilema, wapatulile omaiho ovamphoki, wahakulile ovanthu otyilundu, alo umwe watutilisile vokuankhia. Moluotyo, ankho vena ehunga ewa liokupula okuti: “Okuti tyina Kilisitu ameya, malingi omahuviso omanene vali tyipona aa ekahi nokulingwa nomulume ou?” — Suau 7:31.

Etyi veiva ovipuka ovio ankho vikahi nokupopiwa novanthu, ova Faliseu novanene-nakwa avatumu omafualali akakuate Sesusi, emupake mokaleya.