Palamba omuvo umwe tunde etyi ahakula omulume ankho una otyilundu, Sesusi nkhele esala mo Kafalanau, popepi Nelunga lyo Ngalileya. Ovanthu ovanyingi aveya vali kwe, iya ngwe ahimbika okuvelongesa. Putyina aenda, amono Mateusi, tupu wiihanwa okuti o Levi, upumphi moseketa yovatanthi velilimu. Sesusi emukongo alinge otyipuka tyimwe tyesukisa vali unene, ati: “Kala omulanduli wange.” — Mateusi 9:9.

Tyafuile, Mateusi ankho wii-ale nawa omalongeso a Sesusi nomahuviso alinga potyilongo opo, nga Petulu, na Andelee, na Tiaku, na Suau. Ngetyi ovo valingile, Mateusi nae liwa-liwa etavela. Mateusi wetyipopia mo Evandyeliu yae, etyi ati: “Moluotyo [Mateusi] akatuka,” alandula Sesusi. (Mateusi 9:9) Ngotyo, Mateusi wasa-po ovilinga viae viokutantha elilimu, akala omulongwa wa Sesusi.

Etyi palamba omuvo umwe, tyafuile opo alekese okuti wapandula etyi Sesusi emukonga akale omulongwa wae, Mateusi alingi otyipito tyimwe otyinene meumbo liae. Akongo Sesusi novalongwa vae. Ovalie vali akongele? Tupu wakongele ovatanthi velilimu ankho aundapa navo. Ankho vatantha elilimu pala ovatumini vo Loma ankho veyelwe novanthu, nomalilimu onombapolo ankho mbutalama ponomphangu mbavo, nomalilimu ovakuavitanda ankho vakuata momatapalo avo, nomalilimu ovipuka ankho vitunda kovilongo ovikuavo. Oñgeni ova Sundeu ankho vatala ovatanthi ovo velilimu? Ankho kavevehande, mokonda ovikando ovinyingi ankho vaita onombongo ononyingi mbulamba pu ombu ovanthu ankho vena okufeta. Tupu, motyipito otyo ankho muna ovanthu ‘valinga ononkhali’, ankho veiwe okuti valinga ovipuka ovivi. — Luka 7:37-39.

Etyi vamona Sesusi motyipito kumwe novanthu ovo, ova Faliseu vokulitala ngatyina ovaviuki vali ku vakuavo, avapulu ovalongwa va Sesusi okuti: “Omokonda yatyi omulongesi wenyi alila novatanthi velilimu no vokulinga ononkhali?” (Mateusi 9:11) Sesusi eivi epulo liavo, akumbulula okuti: “Ovanthu vakongoka kavesukisa omuhakuli, mahi vana vavela vesukisa omuhakuli. Endei, kelilongesei etyi tyihangununa onondaka ombu: ‘Ame nahanda mukale nokankhenda, tyipona okulinga ovilikutila.’ Mokonda ame heilile ovaviuki, mahi naendela ovakuankhali.” (Mateusi 9:12, 13; Oséias 6:6) Ova Faliseu ankho velikembesa tyina vaihana Sesusi okuti “mulongesi,” mahi ankho vapondola okulilongesila ku Sesusi konthele yetyi tyaviuka.

Tyafuile, Mateusi wakongele ovatanthi velilimu novanthu vokulinga ononkhali meumbo liae opo vatehelele Sesusi, na vakale noupanga na Huku, “mokonda ovanyingi puvo ankho vekahi nokumulandula.” (Maluku 2:15) Sesusi ankho uhanda okuvekuatesako opo vakale noupanga omuwa na Huku. Tyelikalela nova Faliseu, ankho velitala ngatyina ovaviuki vali ku vakuavo, Sesusi ankho katombele ovanthu ovo. Ankho una okankhenda navo; ngetyi ondotolo ihakula omunthu wavela, Sesusi ankho ukuatesako ovanthu okukala vali noupanga omuwa na Huku.

Sesusi wakala nokankhenda novatanthi velilimu, novanthu vokulinga ononkhali, hakuti ankho kesukile nononkhali mbavo, mahi wevelingilile okankhenda nga kana alingilile vana ahakula omauvela. Mongeleka, hinangela etyi Sesusi akuata nokankhenda omulume ankho wokuna otyilundu, ati: “Ame nahanda! Veluka.” (Mateusi 8:3) No onthue tuesukisa okukala nokankhenda nga Sesusi, atukuatesako vana vesukisa, haunene okuvekuatesako okukala noupanga omuwa na Huku.