Motyasapalo otyikuavo, Sesusi aende no kondyuo imwe yokufendela, tyafuile mo Ngalileya. Avasi-mo omulume umwe walemana okuvoko kuokulio. (Luka 6:6) Ovahoneki vovitumino nova Faliseu ankho vekahi nokutala nawa Sesusi. Omokonda yatyi? Valekesa nawa etyi ankho vasoka etyi vapula okuti: “Tyaviuka okuhakula Motyasapalo?” — Mateusi 12:10.

Ononkhalamutwe mbova Sundeu ankho vetavela okuti, omunthu uhakulwa vala Motyasapalo tyina ekahi motyiponga tyononkhia. Mongeleka, ankho vati katyitavela okuviukisa enkhipa liomunthu watunguka ine okuhakula otyipute mokonda otyo katyiipaa omunthu. Tyimoneka nawa okuti ovahoneki vovitumino nova Faliseu kavapulile Sesusi mokonda vasukalala nononkhumbi mbomulume oo omuhepi. Ankho vaovola okuvela onombei Sesusi.

Mahi Sesusi ankho wii nawa omalusoke avo apenga. Ankho wanoñgonoka okuti vahinda otyipuka tyalema, tyihelikuatele novihonekwa konthele yetyi tyailikwa okulinga Motyasapalo. (Êxodo 20:8-10) Sesusi ankho wapopiwa-le omapita mokonda yovilinga viae oviwa. Pahe alingi vali otyipuka tyimwe, atyieta ovitateka. Wapopila omulume walemana okuvoko okuti: “Katuka, endyu no pokati.” — Maluku 3:3.

Sesusi atale kovahoneki vovitumino no kova Faliseu, ati: “Inkha umwe pu onwe una ongi yae, ongi oyo aitokela metoto Motyasapalo keipolo-mo?” (Mateusi 12:11) Ongi ankho olumono, moluotyo inkha itokela metoto ankho kavapondola okukevela onthiki onkhuavo, mokonda ipondola okunkhia, avapeseka. Tupu, Ovihonekwa vipopia okuti: “Omuviuki usuka nomuenyo wovipako viae viomeumbo.” — Provérbios 12:10.

Sesusi evepopila ongeleka ivekuatesako okusoka, ati: “Omunthu una vali esilivilo tyipona ongi! Ngotyo katyapengele okulinga otyipuka tyikahi nawa Motyasapalo.” (Mateusi 12:12) Moluotyo, Sesusi ankho kalingile etyi tyapenga movitumino etyi avelula omulume oo Motyasapalo. Ankho walekesa okankhenda omulume walemana, iya olusoke lwae ankho luaviuka. Ova Faliseu novahoneki vovitumino avehetyivili okupatana Sesusi, avati vala filuu.

Sesusi atale kovanthu tyanumana, nokuaihamenwa mokonda yonkhalelo yavo yokusoka yapenga. Konyima apopila omulume oo okuti: “Tandaveka okuvoko kuove.” (Mateusi 12:13) Etyi omulume ekutandaveka iya akukala nawa. Otyo tyahambukisilwe omulume oo, mahi oñgeni tyakalesile vana ankho vahanda okukuata Sesusi?

Ova Faliseu avahahambukwa etyi omulume akala nawa, avalupuka-mo iya liwa-liwa avekelipakela-mo “novalanduli va Helode opo vemuipae [Sesusi].” (Maluku 3:6) Ovanthu votyikundyi otyo tyopulitika, vamwe ankho ovongeleya itiwa o Sanduseu. Ova Sanduseu nova Faliseu ankho veliyele, mahi pahe veliwaneka kumwe opo vayale Sesusi.