Onthiki Sesusi akala ko Kafalanau kumwe novalongwa vae vekuana, vakalele novilinga ovinyingi. Ovanthu vemuetelele ovavei vavo kongulohi opo evehakule. Sesusi wakalele nomuvo uhehi wokulikuambela ku Tate yae.

Pahe, tyina tyiti komuhuka-huka onthiki yalandula-ko, putyina nkhele kuanthikovela katutu, Sesusi apindukapo aende kondye aike. Avasi-ko omphangu ikahi nawa, opo elikuambele ku Tate yae pokamphengi. Mahi Sesusi kakalele ehimbwe aike. Mokonda etyi vetyimona okuti pokati kavo kepo, “Simau novalongwa ovakuavo,” avekemuovola. Petulu tyafuile oe ankho wasukalala vali mokonda Sesusi ankho ukahi meumbo liae. — Maluku 1:36; Luka 4:38.

Etyi vemuvasa, Petulu apopila Sesusi okuti: “Ovanthu aveho vekahi nokukuovola.” (Maluku 1:37) Tyimoneka nawa okuti, ovanthu vomo Kafalanau ankho vahanda Sesusi akale navo. Ankho vapanda ovilinga Sesusi ekahi nokulinga, moluotyo ankho “vaovola okumutyilika opo ehevese-po.” (Luka 4:42) Mahi, okuti otyipuka tyo tete tyaetele Sesusi pano pohi, okulinga omahuviso, ngetyi okuhakula ovanthu? Iya okuti ovilinga viae ankho mavilingwa vala potyilongo tyike? Oityi Sesusi apopile konthele yotyo?

Sesusi wapopilile ovalongwa vae okuti: “Tuendei komphangu onkhuavo, komapunda-umbo opopepi, opo tupu ndyikaivise-ko, mokonda otyo neila.” Ngotyo, Sesusi wapopilile ovanthu ankho vahanda akale navo, okuti: “Ame tupu ndyina okukaivisa onondaka onongwa Mbouhamba wa Huku komapunda-umbo omakuavo, mokonda otyo Huku anthumina.” — Maluku 1:38; Luka 4:43.

Yoo, otyilinga otyinene tyaetele Sesusi pano pohi, okuivisa Ouhamba wa Huku Ouhamba oo, ankho mausukukisa enyina lya Tate yae, aunyimi-ko omauvela aeho ovanthu. Sesusi walekesa okuti ankho watumwa na Huku, etyi alinga omahuviso okuhakula ovavei. Monkhalelo ngoyo, Moisesi walingile omahuviso omanene, opo alekese okuti ankho watumwa na Huku. — Êxodo 4:1-9, 30, 31

Moluotyo, Sesusi atundu ko Kafalanau aende novalongwa vae vekuana, avakaivisa kovilongo ovikuavo. Ovo vekuana, o Petulu nondenge yae Andelee, na Suau nondenge yae Tiaku. Ankho palamba osimanu, etyi vakongelwe opo vakale ovaundapi vo tete kumwe na Sesusi.

Oungendi wa Sesusi wokuivisa mo Ngalileya kumwe novalongwa vae vekuana waendele nawa! Ngotyo, etyi ovanthu ankho vapopia konthele ya Sesusi atyiivala unene kokule. “Omunkhima wae auliyandyana mo Silia,” motyilongo tyomapunda-umbo ekwi ankho tyitiwa Dekapoli iya alo umwe konthele onkhuavo Yondongi Solondau. (Mateusi 4:24, 25) Ovanthu ovanyingi ankho vatunda kovilongo ovio aviho, na vana ankho vatunda ko Sundeya, avalandula Sesusi, novalongwa vae. Ovanyingi aveveetela ovanthu vavela. Sesusi kevenumanesile, wahakulile ovavei iya ataata ovilulu movanthu.