Mondyuo yokufendela mo Kafalanau, Sesusi ankho ukahi nokulongesa okuti oe ombolo yotyotyili yatunda keulu. Ankho utualako nokupopia konthele yetyi apopilile ovanthu vakondoka okutunda koutundilo Welunga lyo Ngalileya, vana valile onombolo nombisi aavele.

Sesusi atualako okupopia, ati: “Ovakuaukulu venyi valile omanaa moluhandya, mahi no ngotyo avankhi.” Tyelikalela notyo, ahangununa okuti: “Ame, ame mbolo yomuenyo yatunda keulu. Inkha umwe ulia kombolo ei, makamona omuenyo wahapu. Iya ombolo ame mandyiave, olutu luange, opo ouye ukamone omuenyo.” — Suau 6:48-51.

Pondyovo yenima 30 P.K., Sesusi wapopilile Nikondemu okuti Huku wakala nohole onene novanthu, atumu Omona wae opo akale Omuyovoli wovanthu. Pahe Sesusi upopia vali unene okuti ovanthu vesukisa okulia olutu lwae, mokukala nekolelo motyilikutila ankho maave. Okulinga ngotyo, mavakapewa omuenyo wahapu.

Mahi ovanthu avehetavela onondaka mba Sesusi. Avapulu okuti: “Oñgeni omulume ou apondola okutuavela ohitu yae tulie?” (Suau 6:52) Sesusi ankho uhanda vanoñgonoke okuti etyi apopia otyilekeso vala. Onondaka ayawisako mbutyilekesa nawa.

Wati: “Inkha kamuli ohitu Yomona womulume, amuhanu ohonde yae, mutupu omuenyo mu onwe muene. Una ulia ohitu yange, anu ohonde yange, una omuenyo wahapu, . . . mokonda ohitu yange okulia kuotyotyili iya ohonde yange okunwa kuotyotyili. Una wamali ohitu yange, anu ohonde yange utualako okukala kumwe na ame.” — Suau 6:53-56.

Soka oñgeni otyo tyanumanesile ova Sundeu ankho vekahi nokutehelela! Tyafuile ankho vasoka okuti Sesusi ukahi nokulunda ovanthu valie ohitu yovanthu, ine opo valiatele Ovitumino vya Huku konthele yokuhali ohonde. (Gênesis 9:4; Levítico 17:10, 11) Mahi Sesusi ankho kekahi nokupopia okulia olutu lwae ine okunwa ohonde yae. Ankho ukahi nokulekesa okuti aveho vahanda omuenyo wahapu vena okukala nekolelo motyilikutila ankho malingi, etyi maave olutu lwae luhena nkhali, nokumonesa ohonde yae. Mahi, ovalongwa vae ovanyingi kavanoñgonokele etyi alongesa. Vamwe avati: “Etyi ekahi nokupopia tyalema, olie upondola okutehelela otyipuka otyo?” — Suau 6:60.

Mokonda Sesusi wetyimona okuti ovalongwa vamwe ankho vekahi nokulondovola, apulu okuti: “Otyo tyemunumanesa? Iya pahe inkha mutala Omona womulume ulonda kuna ankho akala? . . . Onondaka ndyikahi nokumupopila mbatuka mononkhono mba Huku iya o mbomuenyo. Mahi pena vamwe pu onwe vehetavela.” Mokonda yotyo, ovalongwa ovanyingi avemusi-po, avehemulandula vali. — Suau 6:61-64.

Moluotyo, Sesusi apulu ono apositolu mbae 12, ati: “Ine hamwe no onwe muhanda okuenda?” Petulu akumbulula okuti: “Tatekulu, okulie matwii nako? Ove una onondaka mbomuenyo wahapu. Onthue tuetavela, tupu tuanoñgonoka okuti ove Umusukuki wa Huku.” (Suau 6:67-69) Onondaka ombo mbulekesa oukuatyili, namphila Petulu nono apositolu ononkhuavo nkhele ankho vahanoñgonokele nawa etyi Sesusi apopia.

Namphila Sesusi ankho ahambukwa nekumbululo lya Petulu, mahi ati: “Ame nemuholovona 12, hatyo? Mahi umwe pu onwe omutendeleyi.” (Suau 6:70) Sesusi ankho upopia Sunda Isikaliote. Tyipondola Sesusi ankho wetyimona okuti Sunda wahimbika okukala nomahando omavi.

No ngotyo, Sesusi ankho wahambukua mokonda Petulu nono apositolu ononkhuavo kavayekele-po okumulandula, nokulinga ovilinga viyovola omuenyo ankho ekahi nokulinga.