Sesusi ankho waundapa unene, mokueenda kuovilinga viae mo Ngalileya. Mahi etyi Sesusi apopia okuti, “Ame tupu ndyina okukaivisa onondaka onongwa Mbouhamba wa Huku komapunda-umbo omakuavo,” ankho walekesa okuti ukahi nokusoka kovilongo ovikuavo, ha mo Ngalileya vala. Moluotyo, aende otyo “aivisila monondyuo mbokufendela mo Sundeya.” (Luka 4:43, 44) Otyo otyiwa, mokonda ankho omuvo wondyovo iya otyipito ko Selusalei ankho tyikahi popepi.

Okutyieleka netyi tutanga konthele yovilinga vya Sesusi ko Ngalileya, tutyiimbuka okuti ono Evandyeliu mbupopia katutu konthele yovilinga viae mo Sundeya. Namphila ova Sundeu ovanyingi ankho kavahande, otyo katyatyilikile Sesusi okuivisa nombili nokulinga ovilinga oviwa kese apa ankho ekahi.

Liwa-liwa Sesusi ankho ukahi nokuenda ko Sundeya, epunda-umbo enene mo Selusalei, opo vakalinge Opasikwa yenima 31 C.E. P.K. Pomphangu imwe ankho pakala ovanthu ovanyingi popepi Yombundi Yonongi, ankho pena etala litiwa Betesata lina omuvanda umwe omunene. Ovanthu ovanyingi ankho vokuavela, novamphoki, novilema ankho veya petala opo. Omokonda yatyi? Omokonda ovanthu ankho vetavela okuti, okunyingila momaande etala olio tyina apikaita, tyihakula.

Ankho pahe Otyasapalo iya Sesusi amono omulume umwe ukahi petala ankho uvela mokueenda kuomanima 38. Sesusi emupulu okuti: “Uhanda okukala nawa?” Omulume akumbulula okuti: “Tatekulu, petupu nawike umphaka metala tyina omaande amapikita, mahi tyina nahanda okuenda-mo vakuetu vamphita komutwe.” — Suau 5:6, 7. 

Sesusi apopi otyipuka tyimwe tyipondola tyahuvisile omulume oo, novanthu aveho vetyiiva, wati: “Katuka! Pola-po evinda liove enda.” (Suau 5:8) Iya ngatyo alinga umwe. Liwa-liwa omulume apolo-po evinda liae, ahimbika okueenda!

Mahi ova Sundeu avahahambukwa notyipuka otyo tyihuvisa. Etyi vamona omulume oo, avahimbika okumupopia, avati: “Hono Otyasapalo, movitumino katyaviukile okutyinda evinda.” Omulume evepopila okuti: “Wokuambelula oe wati ‘Pola-po evinda liove, enda.’” (Suau 5:10, 11) Ova Sundeu ovo ankho vanumana, mokonda yomunthu wahakulua Motyasapalo.

Pahe ankho vahanda okunoñgonoka nawa, avapulu okuti: “Olie omulume wekupopila okuti: ‘Pola-po evinda liove, enda’?” Oityi ankho vemupulila ngotyo? Omokonda Sesusi ankho ‘kamoneka apa ekahi mokonda yovanthu ovanyingi ankho veli-po,’ iya omulume wokuahakulwa ankho kei enyina lya Sesusi. (Suau 5:12, 13) Mahi omulume oo ankho mavelivasi vali na Sesusi. Konyima, omulume avasi Sesusi mondyuo ya Huku iya anoñgonoka enyina lya una wemuhakulila petala.

Omulume wokuahakulwa pahe avasi ova Sundeu vana vemupulile okuti olie wekuvelula. Evepopila okuti utiwa o Sesusi. Etyi vetyinoñgonoka, avaende no ku Sesusi. Okuti ankho vahanda okukanoñgonoka oñgeni Sesusi etyivila okulinga otyipuka otyo tyihuvisa? Au. Ankho vahanda okuvela onombei Sesusi mokonda walinga otyipuka otyiwa Motyasapalo. Iya alo umwe avahimbika okumuyeva!