Pu etyi nkhele Sesusi ankho ekahi nokulongesa ovanthu motyilongo tyo Sesaleia ya Filipe, paendwa onokilometulu 25 okutunda Komphunda Helemoo, apopila ovalongwa vae otyipuka tyimwe tyevehuvisile, ati: “Tyotyili, ame ndyimupopila okuti vamwe vekahi pano kamavankhi, tyihenemone tete Omona womulume uya Mouhamba wae.” — Mateusi 16:28.

Tyipondola ovalongwa ankho kavanoñgonokele etyi Sesusi apopia. Etyi pakala osimanu, aende nono apositolu mbae ononthatu Petulu, na Tiaku, na Suau, avalondo komphunda. Tyafuile ankho kuanthikovela mokonda ovalongwa avalala. Putyina Sesusi elikuambela, apilululwa otyo vatala. Ono apositolu avamono motyipala tya Sesusi muna onohanya ngo mbekumbi, omivalo viae aviliaima ngotyimimi, avituele unene.

Konyima, pu Sesusi apamoneka ovanthu vevali, vapopiwa okuti ovo “Moisesi na Eliya.” Avahimbika okutomphola na Sesusi konthele ‘yokuenda kwae makukafuisuapo ko Selusalei.’ (Luka 9:30, 31) Okuenda oko kwa Sesusi ankho kulekesa ononkhia mbae netutilo liae, ngetyi apopia konyima. (Mateusi 16:21) Etompho olio ankho lialekesa nawa okuti olusoke lwa Petulu kaluaviukile, mokonda Sesusi ankho una umwe okunkhia.

Ankho ono apositolu vetatu vapahuka umwe nawa, vekahi nokutala nokutehelela tyahuva. Otyo ankho emonekelo, mahi liakala ngatyina otyipuka tyotyotyili alo umwe Petulu apopi-po, ati: “Mulongesi, tyikahi nawa tukale pano. Matutungu onohinge ononthatu, imwe oyove, onkhuavo oya Moisesi onkhuavo oya Eliya.” (Maluku 9:5) Okuti Petulu ankho uhanda okutunga onohinge, opo emonekelo olio nkhele litualeko?

Putyina nkhele Petulu ekahi nokupopia, akuya ekaka limwe alivehiki iya amutundu ondaka imwe yati: “Ou Omona wange, onthyolwe, una ame napanda, mutavelei.” Etyi veiva ondaka ya Huku, ono apositolu avatili owoma avelipupika-po, mahi Sesusi ati: “Katukei. Muhatilei owoma.” (Mateusi 17:5-7) Etyi vakatuka, tyina vakatiko ñgaa, pesala vala Sesusi. Emonekelo liapwa. Etyi pahe kuatya, avatuluka komphunda iya Sesusi evepopila okuti: “Muhapopilei nawike emonekelo olio alo Omona womulume apindulwa-po kononkhia.” — Mateusi 17:9.

Mokonda Eliya nae wamoneka memonekelo olio, atyivengwangwanesa. Ono apositolu avapulu okuti: “Omokonda yatyi ovahoneki vovitumino vapopila okuti Eliya matetekela okuya ku Kilisitu?” Sesusi akumbulula okuti: “Eliya weya-le, avehemuimbuka.” (Mateusi 17:10-12) Sesusi ankho ukahi nokupopia Suau Batisita, wafuisapo otyilinga tyelifwa no tya Eliya. Eliya wapongiyile ondyila ya Eliseu iya Suau apongiya ondyila ya Kilisitu.

Emonekelo olio liapamekele unene Sesusi nono apositolu! Ankho lialekesa oñgeni Kilisitu makanyingila momunkhima Wouhamba wae. Ngotyo, ovalongwa ankho vamona “Omona womulume uya Mouhamba wae.” (Mateusi 16:28) Etyi ankho vekahi komphunda, ‘vamona omunkhima wae nomaiho avo.’ Namphila ova Faliseu ankho vahanda okumona enyingilikilo opo vetavele okuti Sesusi Ohamba yaholovonwa na Huku, kevelingilile enyingilikilo nalike. Mahi mokonda ovalongwa omapanga ae, Sesusi eveyeke vatale etyi apilululwa, avamono okuti omaulo Ouhamba wae afuisuapo. Moluotyo, Petulu ahoneka okuti: “Otyo tuakalela vali nonthumbi yokuti ovipuka aviho Huku apopia uvifuisapo.” — 2 Petulu 1:16-19.