Sesusi ankho pahe waivisale unene omanima evali. Okuti pahe matepulula ovilinga viae, na apululukwe-po? Au, mahi Sesusi uyawisa vali ovilinga viae mokuenda “momapunda-umbo no momaumbo aeho [oko Ngalileya], nokulongesa ovanthu monondyuo mbavo mbokufendela, otyo aivisa onondaka onongwa Mbouhamba, nokuhakula omauvela aeho ovanthu.” (Mateusi 9:35) Etyi Sesusi amona tyemukuatesako okutala okuti wesukisa okuyandyanesa ovilinga viae. Mahi oityi matyimukuatesako okuvifuisapo?

Moungendi wae, Sesusi wamona okuti ovanthu vesukisa okupamekwa nokuvekuatesako vanoñgonoke Huku. Ankho vekahi ngonongi mbuhena omunthita, mbuti vala ambukeliyumba oku, ambukeliyumba oku. Akala nokankhenda navo iya apopila ovalongwa vae, ati: “Ovilinga viokuteya ovinyingi, mahi ovaundapi kavehi. Moluotyo, itei ku Hekulu yovilinga, atume vali ovaundapi kovilinga viae viokuteya.” — Mateusi 9:37, 38.

Sesusi ankho wii oityi ena okulinga. Aholovona ono apositolu 12, evetepaula vevali-vevali, avakala ovikundyi epandu viokuivisa. Evelongesa monkhalelo yayandyuluka, ati: “Muhayei nomatapalo ovanthu veheva Sundeu, tupu muhanyingilei mepunda-umbo nalike liova Samaliya; mahi endei vala no kovanthu vekahi ngonongi mbavomba mbelongo lyo Isilayeli. Tyina mukaivisa, popiei okuti: ‘Ouhamba wo keulu ukahi popepi.’” — Mateusi 10:5-7.

Ouhamba ankho ovalongwa mavaivisa oyouna Sesusi apopia melikuambelo alongesa. Onondaka ‘Ouhamba wo keulu ukahi popepi’ ankho mbulekesa okuti Sesusi Kilisitu, Ohamba yavialekwa na Huku, ukahi pokati kavo. Oityi ankho matyilekesa okuti ovalongwa tyili-tyili vaivisa Ouhamba oo? Sesusi ankho weveavela epondolo liokuhakula, nokututilisa ovanthu, mahi tyihafetwa. Oñgeni ankho ono apositolu mavakala netyi vesukisa, ngokulia kwa kese nthiki?

Sesusi apopila ovalongwa vae opo vahatyinde natyike moungendi wavo wokukaivisa. Ankho kavapondola okutyinda o olu, nopalata, ine otyivela otyinkhuhu, movipapo viavo. Tupu ankho kavesukisa okutyinda okulia moungendi wavo, nomuvalo ine ononkhaku ononkhuavo. Omokonda yatyi? Sesusi evepopila okuti: “Omuundapi una yokupewa okulia kwae.” (Mateusi 10:10) Ankho mavakavasa ovanthu vokuesuka nonondaka mbavo, avekevekuatesako movipuka vesukisa. Sesusi wati: “Meumbo muamanyingila omo mukala alo mutunda potyilongo opo.” — Maluku 6:10.

Sesusi tupu eveavela onondonga mbo ñgeni ankho vapondola okukapopia novanthu onondaka Mbouhamba wa Huku, ati: “Tyina muamanyingila meumbo, kukunyei vahekulu yeumbo. Inkha vemutambula nawa, vakale nombembwa muvehandela, mahi inkha kavemutambula nawa, kondokei nombembwa yenyi. Inkha kavemutambula ine avahatehelela onondaka mbenyi, tyina mutunda meumbo olio ine omepunda-umbo, laumunei ombuma konomphai mbenyi.” — Mateusi 10:12-14.

Tyipondola alo umwe ovanthu aveho mepunda-umbo ine pomaumbo kamavetavela onondaka mbavo. Otyo ankho tyipondola okuveetela-tyi? Sesusi wapopia okuti ankho tyipondola okueetela ovanthu ovo ekoyeso lialema. Sesusi ahangununa okuti: “Tyotyili ame ndyimupopila okuti, Monthiki Yekoyeso matyikapepuka vali kotyilongo tyo Sondoma no Gomola tyipona epunda-umbo olio.” — Mateusi 10:15.