Etyi palamba omuvo umwe tunde etyi Sesusi eile ko Pasikwa yenima 30 P.K. Suau Batisita apakwa mokaleya. Suau ankho uhanda ovalongwa vae vakale ovalanduli va Sesusi, mahi vamwe nkhele kavenekale ovalanduli va Sesusi onohanyi Suau ekahi-ale mokaleya.

Pahe, Opasikwa yenima 31 P.K. ikahi popepi, ovalongwa va Suau veya ku Sesusi, avemupulu okuti: ‘Omokonda yatyi onthue nova Faliseu tukalela ononthiki mbumwe tyihali, mahi ovalongwa vove kavetyilingi?’ (Mateusi 9:14) Ova Faliseu vakala ononthiki mbumwe tyihali, mokonda ankho otyiso tyongeleya yavo. Konyima, Sesusi apopi onthengele-popia yomu Faliseu umwe ulitala ngatyina omuviuki vali ku vakuavo, ulikuambela okuti: “Huku yange, ndyikupandula mokonda ame hikahi nga vakuetu . . . Ame ndyikala tyihali tuvali mosimanu.” (Luka 18:11, 12) Tyafuile novalongwa va Suau ankho vakala ononthiki mbumwe tyihali mokonda yotyiso otyo. Ine hamwe, omokonda ankho veliunga tyetyi Suau akuatwa. Ovalongwa va Suau tupu ankho velipula omokonda yatyi ovalongwa va Sesusi vahakalela ononthiki mbumwe tyihali, tyafuile opo valekese okuti kavahambukilwe mokonda ya Suau ukahi mokaleya.

Sesusi akumbulula nongeleka yati: “Okuti motyipito tyotyinepo omapanga omunthu wanepa ena ehunga liokukala tyihali tyina wokuanepa opo ekahi? Mahi mapeya ononthiki wokuanepa mavemupolwa, pahe avakala ononthiki tyihali.” — Mateusi 9:15.

Suau wapopia Sesusi ngatyina omunthu wanepa. (Suau 3:28, 29) Ngotyo, putyina vekahi na Sesusi, ovalongwa vae kavakala ononthiki tyihali. Mahi konyima, tyina amaipawa ovalongwa vae mavakala tyeliunga iya avahahande okulia. Mahi onkhalelo yavo maipiluluka tyina Sesusi amatutiliswa! Avahakala vali nehunga liokukala ononthiki tyihali.

Konyima, Sesusi apopi ononthengele-popia onombali, ati: “Nawike upaka elimendo liotyinyanga otyipe kotyikutu tyakulupa, mokonda elimendo liotyinyanga otyipe malitanduka-ko kotyikutu otyikulu, iya enthiwi alikala vali enene. Tupu petupu ou upaka ovinyu omphe mononthenda mbombandwa mbakulupa. Inkha ulinga ngotyo, ononthenda mambututana, ovinyu aiuyuka-mo iya ononthenda ambuhanyauka. Mahi ovanthu vapaka ovinyu omphe mononthenda onomphe.” (Mateusi 9:16, 17) Oityi Sesusi ankho ahanda okulongesa?

Sesusi ankho ukahi nokukuatesako ovalongwa va Suau Batisita okunoñgonoka okuti kavapondola okukevelela ovalongwa vae valandule ovituwa ovikulu viova Sundeu, ngokukala tyihali mokonda yoviso. Sesusi ankho keile okupaka elimendo kefendelo lyo kohale, tupu keile opo atuale no komutwe efendelo olio ankho malinyimuako-ale. Sesusi ankho kekahi nokulunda ovanthu vafende monkhalelo ova Sundeu vafenda pomuvo opo, nokulandula oviso viahindwa novanthu. Ankho kekahi nokuovola okupaka elimendo epe kotyikutu otyikulu ine ovinyu omphe monthenda onkhulu yombandwa.