Konyima yetyi ovanthu voko Nasalee vahandele okuipaa Sesusi, ngwe aende ko Kafalanau, popepi Nelunga lyo Ngalileya, tupu liihanwa okuti: “Etala lyo ko Senesalee.” (Luka 5:1) Otyo tyafuisapo eulo liomukanda wa Isaiya liokuati ovanthu voko Ngalileya mavakamona otyimimi otyinene. — Isaías 9:1, 2.

Yoo, motyilongo tyo Ngalileya Sesusi watuaileko okuivisa okuti: “Ouhamba wo keulu ukahi popepi.” (Mateusi 4:17) Sesusi wavasa ovalongwa vae vekuana. Ovalongwa ovo ankho vemulandulile-ale, mahi mokonda Sesusi wakondokele ko Sundeya, ngwe avesala movilinga viavo viokufwa ombisi. (Suau 1:35-42) Pahe ankho wehikapo omuvo ovalongwa mavakala kumwe apeho na Sesusi opo evelongese okufuisa-po ovilinga aviho putyina ngwe amaende.

Putyina Sesusi atyama nelunga, amono Simau Petulu nondenge yae Andelee novanthu ovakuavo ankho vaundapa navo, vekahi nokufwa ombisi. Sesusi aende no kuvo, alondo mowato ya Petulu iya emuiti vahondovole owato yavo keheke yende katutu momaande. Etyi vahondovoka katutu, Sesusi apumphama iya ehimbika okulongesa ovanthu ovanyingi ankho veliongiya konthele yelunga otyili konthele Youhamba.

Konyima, Sesusi apopila Petulu okuti: “Enda naapa paya kohi, olaula omawanda ove.” Petulu emupopila okuti: “Mulongesi, tuaundapa otyinthiki atyiho atuhavasi natyike, mahi mokonda ove wanthuma mandyilaula omawanda.” — Luka 5:4, 5. 

Avalaula omawanda momaande iya avakuate ombisi onyingi-nyingi, omawanda avo aatipauka! Liwa-liwa ovalume ovo avaihana vakuavo vaundapa navo, opo veye okuvekuatesako. Onowato mbavo ambuho ambuyula ombisi onyingi, mokonda yalema ambuhimbika okunyingila kohi. Etyi Petulu etyimona, aikila konongolo iya apopila Sesusi okuti: “Hondovoka ponthele yange Tatekulu, mokonda ame ndyimukuankhali.” Sesusi emukumbulula okuti: “Yeka-po okukala nowoma. Okutuka hono mokafwa ovanthu.” — Luka 5:8, 10.

Sesusi apopila Petulu na Andelee, ati: “Ndandulei opo ndyimukalese ovafwi vovanthu.” (Mateusi 4:19) Akongo vali ovafwi vombisi ovakuavo vevali, ovo Tiaku na Suau ovana va Sebedeu. Navo avetavela okumulandula. Moluotyo, aveho vekuana avasipo omawanda avo okufwa ombisi iya avakala ovalongwa vo tete va Sesusi vomuvo auho.