Ankho pakala enima tunde apa Suau apakwa mokaleya. Mahi nkhele wiivite omahuviso Sesusi ekahi nokulinga. Nkhele soka oñgeni Suau akalele etyi eiva okuti Sesusi watutilisa omona umwe womuhepe ko Naii. No ngotyo, Suau ankho uhanda umwe okutehelela muene ku Sesusi inkha oe o Mesiya. Moluotyo, Suau atumu-ko ovalongwa vae vevali. Wevetuma vakalinge-tyi? Wevetuma vakapule Sesusi okuti: “Ove Una wapopilwe okuti Moya ine tukevela omukuavo?” — Luka 7:19.

Okuti tyina utehelela epulo olio kaliaviukile? Suau ankho omunthu umwe una onthilo na Huku, etyi ambatisala Sesusi omanima evali okualamba, wamuene ononkhono mba Huku mbulaukila Sesusi iya eivi ondaka ya Huku etyi apopia okuti nemupanda. Ngotyo, tutupu ehunga liokusoka okuti hamwe ekolelo lya Suau liatenda. Tupu, inkha ekolelo liae ankho liatenda ñgeno Sesusi kapopile nawa Suau ngetyi apopia. Naina inkha Suau ankho utupu ondima, oityi alingila Sesusi epulo olio?

Suau tyipondola ankho uhanda vala okutehelela muene ku Sesusi, okuti oe umwe o Mesiya. Otyo ankho tyipondola okupameka Suau, ukahi mokaleya. Iya epulo lya Suau lina vali otyipuka otyikuavo lilekesa. Ankho wii nawa eulo Liombimbiliya lipopia Omulembulwa wa Huku, makala ohamba mayeeta eyovo. Palamba onohanyi ononyingi tunde apa Sesusi ambatisalwa iya Suau apakwa mokaleya. Ngotyo, Suau ukahi nokupula inkha kutupu vali omukuavo vakevelela, meya konyima ya Sesusi, una mafuisapo omaulo aeho ankho apopia Mesiya.

Sesusi kapopilile vala ovalongwa va Suau okuti: ‘Yoo, tyotyili ame umwe napopilwe okuti mandyiya,’ mahi walekesa okuti una nokukuatesuako nononkhono mba Huku, otyo ahakula ovanthu ovanyingi vena omauvela elikalaila novitateka. Pahe apopila ovalongwa va Suau, ati: “Endei, kapopilei Suau etyi mueiva netyi muamona: Ovamphoki pahe veete-po, ovilema vikahi nokueenda, vokuna otyilundu vekahi nokuveluka, onompholo mbukahi nokuiva-ko, vokuankhia vekahi nokututiliswa iya onondaka onongwa mbukahi nokuiviswa kovahepi.” — Mateusi 11:4, 5. 

Epulo lya Suau lialekesa okuti ankho ukevela Sesusi alinge ovipuka ovinene vali tyipona evi alinga, tyafuile ankho ukevela alo umwe emuyovole mokaleya. Mahi Sesusi apopi okuti Suau ahakevele omahuviso omanene vali tyipona aa ndyikahi nokulinga.

Etyi ovalongwa va Suau vapita, Sesusi apopila ovanthu aveho okuti Suau omunene vali tyipona omuuli. Wati Suau “omutumwa” wa Siovaa wapopilue mu Malaquias 3:1. Tupu oe omuuli Eliya, ngetyi tyaulilwe mu Malaquias 4:5, 6. Sesusi wahangununa okuti: “Ame ndyimupopila okuti, povanthu aveho vokuali-ko kapenekale nawike omunene vali tyipona Suau Batisita, mahi omunthu omututu Mouhamba wo keulu, omunene vali kwe.” — Mateusi 11:11.

Etyi ati omunthu omututu Mouhamba wo keulu omunene vali ku Suau, Sesusi walekesa okuti Suau kamaende Mouhamba wo keulu. Suau wapongiyila Sesusi ondyila, mahi tyina ankhia Kilisitu ankho keneikule ondyila yokuenda keulu. (Ova Hebeleu 10:19, 20) Ngotyo, Suau omuuli omukuatyili wa Huku, makakala pano pohi moutumini Wouhamba wa Huku.