Etyi eiva okuti ova Faliseu novalanduli va Helode ankho vapanga okumuipaa, Sesusi novalongwa vae avatundu opo avaende Kelunga lyo Ngalileya. Ovanthu ovanyingi aveya no kwe okutunda kononthele ambuho, ko Ngalileya, no komapunda-umbo o Tilu no Sindone, no koutundilo Wondongi Solondau, no ko Selusalei, novo kokule kokumbili kwo Indumeia. Sesusi ahakula ovanthu ovanyingi. Mokonda yotyo, ovanthu vokuna omauvela omanene avemuhitikinya. Avahakevelela vali eveyame, mahi ankho vahanda okuhika ponthele yae opo vemuyame. — Maluku 3:9, 10.

Mokonda ovanthu ankho ovanyingi unene, Sesusi apopila ovalongwa vae vataindye okawato okatutu opo anyingile-mo, akale kokule novanthu na vehemuhitikinye. Tupu, ngotyo ankho upondola okuvelongesa otyo eli mowato, ine okuenda konthele onkhuavo okutyama nelunga opo akakuateseko ovanthu ovakuavo.

Omulongwa Mateusi wahoneka okuti ovilinga vya Sesusi viafuisapo “etyi tyapopile omuuli Isaiya.” (Mateusi 12:17) Ankho eulo patyi Sesusi ekahi nokufuisapo?

“Talei! Ou omuumbili wange una naholovona, onthyolwe yange, una ame napanda! Mandyimuavela ononkhono mbange, opo apopile omalongo ouviuki wa Huku. Kamakatañguna, nii okukaluluka, na wike mekeiva ondaka yae momatapalo. Kamatyatyaula olumbungu luateka, nii okanyanga kokandiyelo nkhele katuima kamekenyimi, alo aviukisa nawa atyiho tyapenga. Iya omalongo maakala nekevelo menyina liae.” — Mateusi 12:18-21; Isaías 42:1-4.

Tyotyili, Sesusi omuumbili onthyolwe, una Huku apanda. Sesusi walekesa nawa oityi ouviuki wotyotyili, ankho ukahi nokuholekwa noviso vionongeleya mbomatutu. Mokonda ova Faliseu ankho vaundapesa Ovitumino vya Huku monkhalelo yavo yapenga, Motyasapalo ankho kavakuatesako omunthu wavela! Mahi, opo Sesusi alekese ouviuki wa Huku nokuti ononkhono mba Huku mbukahi kwe, atepulula ovanthu oviso vihaviukile vialema. Mokonda yotyo, ononkhalamutwe mbonongeleya ambuhande okumuipaa. Otyo otyivi unene ngatyi!

Oityi tyihangununa okuti: “Kamakatañguna, nii okukaluluka, na wike mekeiva ondaka yae momatapalo”? Tyina ankho Sesusi avelula ovanthu, ankho kayeke ovanthu — nii ovilulu — ‘vimupopie movanthu.’ (Maluku 3:12) Ankho kahande ovanthu vemunoñgonoke mokonda yonondaka veiva momatapalo ine omahipululo ahaviukile aetesa olumbwe, ovanthu vapopia.

Tupu, Sesusi ankho upopia onondaka mbupameka vana ankho vekahi ngatyina olumbungu luateka, luayendyelela. Ovanthu ovo ankho vekahi ngokandiyelo nkhele katunda omuihi. Sesusi ankho katyatyula olumbungu luateka-le, tupu kayeke okandiyelo nkhele katuima kanyime. Ankho upameka ovanthu veliola omutima nokankhenda noluembia. Tyotyili, Sesusi omunthu una omalongo apondola okukevelela!