Sesusi ankho wakala omuvo umwe otyo aundapa vala ko Ngalileya mokonda ovilinga viae ankho vikahi nokuenda vali nawa oko, tyipona ko Sundeya. Etyi ankho ahakula omulume umwe ko Selusalei Motyasapalo, “ova Sundeu vahandele okumuipaa.” — Suau 5:18; 7:1.

Pahe ankho omuvo wokuenye menima 32 P.K., iya omuvo Wotyipito Tyomakaka (ine Onohinge) ukahi popepi. Otyipito otyo ankho tyilingwa mononthiki 7, konyima akulandula otyonge tyilingwa monthiki ya tyinana. Otyipito otyo, ankho tyilekesa okuti omuvo wokulima wapwa, pahe omuvo wehambu enene nokupandula.

Onondenge mba Sesusi ovo Tiaku, na Simau, na Suse, na Sunda avemupopila okuti: “Tunda kuno enda no ko Sundeya.” Motyilongo tyo Sundeya, o Selusalei ankho omphangu yakolela yefendelo. Mokueenda kuovipito vitatu vilingwa menima, epunda-umbo ankho liyula ovanthu. Onondenge mba Sesusi ankho vasoka okuti: “Nawike ulinga ovipuka tyaholama tyina ahanda okunoñgonokwa novanthu. Inkha ukahi nokulinga ovipuka evi lilekesa kouye.” — Suau 7:3, 4. 

Onondenge mbae vekuana nkhele “ankho vetupu ekolelo mwe” liokuti oe o Mesiya. Ankho vahanda ovanthu aveho veya kotyipito vamone omahuviso a Sesusi. Mahi Sesusi ankho utyii okuti okuenda-ko, melipake motyiponga, evepopila okuti: “Ouye utupu ehunga liokumuyala, mahi uyele ame, mokonda ndyiava oumbangi konthele yao wokuti ovilinga viao ovivi. Onwe endei kotyipito, ame nkhele himaende kotyipito otyo, mokonda omuvo wange nkhele kaunehike-po.” — Suau 7:5-8.

Etyi palamba ononthiki mbumwe, etyi onondenge mbae vapita novanthu ovakuavo, Sesusi novalongwa vae avaende tyihamuenwe novanthu. Avakuate ondyila iteta, ikuata mo Samaliya, avahakuate ondyila ankho ikuata ovanthu ovanyingi, popepi Nondongi Solondau. Sesusi novalongwa vae ankho vesukisa apa mavehikila ko Samaliya, moluotyo atumu ovatumwa-ndaka vapite komutwe vakapongiye apa mavakakala. Ovanthu avehevetambula ine avehetavela okuyakula Sesusi momaumbo avo, mokonda ankho ukahi nokuenda ko Selusalei kotyipito tyova Sundeu. Tiaku na Suau avemupulu okuti: “Tatekulu uhanda tuite otupia keulu atuveipaa?” (Luka 9:54) Sesusi eveviyula etyi vapopia ngotyo, avaende.

Etyi ankho vekahi mondyila, omuhoneki umwe wovitumino apopila Sesusi, ati: “Mulongesi, ame mandyikulandula kese oku wenda nako.” Sesusi ati: “Ovimbandye vina omaleva, oviila vina ovityiyu, mahi Omona womulume utupu apa alangeka omutwe wae.” (Mateusi 8:19, 20) Sesusi ankho ukahi nokupopila omuhoneki wovitumino okuti okukala omulanduli wae katyapepukile. Iya tyafuile omuhoneki oo ankho welipaka kounene kahande okukala  nomuenyo ngoo. Kese wike pu onthue wesukisa okulipula okuti: ‘Okuti nafuapo opo ndyilandula Sesusi?’

Sesusi apopila omulume omukuavo ati: “Kala omulanduli wange.” Omulume oo ati: “Tatekulu, nkhele ndyeke ndyikahihile tate.” Mokonda Sesusi ankho wii onkhalelo yomulume oo, ati: “Yeka ovivimbi vihihile ovivimbi viavio, mahi ove enda kaivise Ouhamba wa Huku.” (Luka 9:59, 60) Tyipondola he yomulume oo, ankho kankhile-ale. Inkha ankho wankhia, ñgeno ankho kekahi nokutomphola na Sesusi. Omulume oo ankho kafuilepo opo apake Ouhamba wa Huku pomphangu yo tete momuenyo wae.

Putyina venda noko Selusalei, omulume omukuavo apopila Sesusi ati: “Tatekulu mandyikulandula, mahi nkhele tete ndyeke ndyikalekele ombunga yange.” Sesusi emupopila okuti: “Omunthu ukuata osaluwa atale konyima, katele Mouhamba wa Huku.” — Luka 9:61, 62.

Vana vahanda okukala ovalongwa votyotyili va Sesusi aveho vena okupaka pomphangu yo tete ovilinga Viouhamba wa Huku. Inkha omunthu wakuata osaluwa katale komutwe, omukungu kamauviuku. Inkha uyeka osaluwa opo atale konyima, ovilinga mepia mavisete. Tyelifwa no otyo, inkha ukondoka mouye ou wovivi, moyeke-po okuendela mondyila ituala komuenyo wahapu.