Etyi ovalongwa vehika nthele ina yelunga, konyima yetyi vakala notyitateka tyitilisa owoma, avamono vali otyipuka tyevehuvisile. Vamona ovalume vevali vatilisa owoma, ankho vena ovilulu, vatundilila momaendo ankho ekahi popepi veya no ku Sesusi! Umwe puvo wapopiwa vali unene, tyafuile omokonda ankho utilisa vali owoma, tupu ankho wakala vali ehimbwe novilulu tyipona mukuavo.

Omulume oo utilisa unene owoma, ankho wenda-enda vala muhoyo. No komutenya no kounthiki ankho “uliyavelela momaendo, no monomphunda otyo eliteta nomamanya.” (Maluku 5:5) Mokonda ankho omukalavi unene, ovanthu ankho vena owoma wokukuata metapalo likuata apa akala. Ovanthu vamwe ankho vahetekelele okumukuta komavoko no kovikalo, mahi elitipaula omalienge. Nawike ankho umuvila.

Etyi afuena pu Sesusi, aikila konongolo ponomphai mbae, ovilulu ankho ena avimupopisa nondaka yakaluluka, ati: “Oityi unthyanda, Sesusi, Mona wa Huku Omukulami? Tukaila Huku, okuti kumamonesa ononkhumbi.” Sesusi alekesa okuti una vali epondolo tyipona ovilulu, etyi ati: “Tyilulu ove tunda momulume ou.” — Maluku 5:7, 8. 

Tyotyili omulume oo, ankho una ovilulu ovinyingi. Etyi Sesusi apula, okuti: “Utiwa ovelie?” atyikumbulula okuti: “Ame ndyitiwa Ovita mokonda tuvanyingi-mo.” (Maluku 5:9) Mo Loma, otyikundyi tyovita ankho tyikala nomafualali ovityita-novityita; tyilekesa okuti omulume oo ankho una ovilulu ovinyingi vikahi nokumumonesa ononkhumbi. Ovilulu ovio avilivondela ku Sesusi aviti: ‘Uhetutume melongi.’ Tyafuile ankho vii etyi mavilingwa kumwe nomutumini wavio, Satanasi. — Luka 8:31.

Ankho pena ovingulu vimwe ovinyingi 2.000 vikahi nokulia popepi ngopo, iya ngetyi tyipopia Ovitumino, ovinyama ovio ankho viasila, ova Sundeu ankho kavapondola okukala navio. Ovilulu aviti: “Tutume movingulu, opo tunyingile muvio.” (Maluku 5:12) Sesusi evipopila okuti endei, aviende no movingulu. Ovingulu 2.000 avikunkhunuka kondyendyi, avikatokela melunga.

Etyi ovanthita vavio vamona otyipuka otyo, avakahateka aveketyipopia mepunda-umbo no komaumbo kondye yepunda-umbo. Ovanthu aveya okutala etyi tyaenda-po. Etyi veya, avamono omulume wokuatundwa novilulu, pahe ukahi nawa, ulinga ovipuka vionondunge. Omulume ankho pahe wavala ovikutu, upumphi ponomphai mba Sesusi!

Etyi ovanthu vetyiiva, iya avamono omulume oo avatili owoma, ankho pahe valinga otyiho kavei oityi Sesusi malingi vali. Avataata Sesusi potyilongo tyavo. Tyina Sesusi alonda mowato opo aye, omulume wali novilulu, emuiti ati, na ame ndyienda no ove. Mahi Sesusi emupopila okuti: “Enda keumbo kombunga yove, okevepopila ovipuka aviho oviwa Siovaa ekulingila, nokankhenda ekulinga.” — Maluku 5:19.

Sesusi ankho upopila vana avelula okuti muheketyipopiei kovanthu, tyetyi ankho kahande vasoke omapita konthele yae, mokonda yetyi veiva vala ku vakuavo. Mahi omulume wokuali novilulu, ankho otyilekeso tyikahi nawa tyepondolo lya Sesusi iya ankho upondola okukuatesako ovanthu vana Sesusi mehelivasi navo. Etyi omulume oo mapopi, ankho matyikuatesako ovanthu okuhetavela omalusoke apenga veiva ku vakuavo, konthele yovingulu ovinyingi viapeseka. Moluotyo omulume oo aende, ahimbika okupopia etyi Sesusi emulingila mo Dekapoli aiho.