Etyi apopia ova Faliseu mokonda yokulandula oviso viavo, Sesusi novalongwa vae avatundu-po. Avaende no kovilongo vyo Tilu no Sindone mo Fenisia, ankho paendwa onokilometulu ononyingi okuenda no kokulio kuekumbi.

Sesusi avasi eumbo omu ankho makala, mahi ankho kahandele ovanthu vetyinoñgonoke. Mahi no ngotyo, ovanthu avemumono. Omukai omu Geleku, ankho watyitwa potyilongo opo, avasi Sesusi ahimbika okumuita unene, ati: “Kala-vo nokankhenda na ame Tatekulu, Mona wa Daviti. Omona wange omukainthu ukahi nokumoneswa ononkhumbi notyilulu.” — Mateusi 15:22; Maluku 7: 26.

Konyima ovalongwa va Sesusi avemupopila okuti: “Mupopila aye, mokonda ukahi nokulilila monyima yetu.” Sesusi evepopila omokonda yatyi emutehelelela vala, ehesuku nae, ati: “Ame hatuminwe kovanthu ovakuavo, natumwa vala kovanthu vekahi ngonongi mbavomba mbelongo liova Isilayeli.” Omukai ahayeke-ko, atualako okuita. Eya popepi, aikila konongolo pu Sesusi, aiti okuti: “Tatekulu, nkhuateseko!” — Mateusi 15:23-25.

Tyipondola Sesusi ankho uhanda okutala ekolelo liae, apopi konthele yokapungulula ova Sundeu valinga ovanthu vovilongo ovikuavo, ati: “Katyaviukile okupola okulia kuovana, okuyumbila oviwena.” (Mateusi 15:26) Etyi Sesusi apopia konthele “yoviwena,” ine oumbwa oututu, walekesa okuti una okankhenda novanthu veheva Sundeu. Tupu, tyafuile otyo wetyilekesa nawa kotyipala tyae no monondaka apopia nokankhenda.

Omukai ahanumana, etyinoñgonoka okuti wapopia konthele yova Sundeu vena okapungulula, nomutima weliola ati: “Otyo umwe Tatekulu, mahi oviwena vilia ovinyanya (ovinthota) vitoka komesa ya vana vevitekula.” Sesusi etyimono okuti ankho una omutima omuwa, ati: “Ekolelo liove enene, tyikale ngetyi uhanda.” (Mateusi 15:27, 28) Iya omona wae aveluka, namphila ankho ekahi kokule! Etyi omukai akondoka keumbo, avasi omona wae ulangi koula waveluka, “otyilulu tyemutunda-le.” — Maluku 7:30.

Sesusi novalongwa vae avatundu ko Fenisia, avatauluka otyilongo otyo, avaende no Kondongi Solondau. Tyafuile vena apa vayaukilile Ondongi Solondau okuenda no kokulio Kuelunga lyo Ngalileya iya avaende ko Dekapoli. Etyi vehika-ko avalondo komphunda, mahi ovanthu avevevasi-ko. Ovanthu avaetela Sesusi ovilema, novamphoki, novihita-mulungu. Ankho veya otyo vapaka ovavei vavo ponomphai mba Sesusi iya evehakula. Ovanthu avahuvu iya avankhimaneka Huku yo Isilayeli.

Sesusi aovola vali okukuatesako omulume umwe ompholo, tupu uhapopi. Nkhele soka oñgeni omunthu oo ankho ekahi tyina eli pokati kovanthu ovanyingi. Tyipondola Sesusi wamona okuti ankho wapaalala iya emutuala kokule novanthu. Etyi pahe vekahi vala vevali, Sesusi emulekesa okuti una etyi malingi. Wapaka ominwe viae momakutwi omulume oo, elinthili omate, ayame kelaka liae. Konyima atale peulu, apopi ondaka yo Hebeleu ihangununa okuti: “Patuka.” Moluotyo, omakutwi omulume oo aakala nawa iya ahimbika okupopia. Sesusi ankho kahandele ovanthu vanoñgonoke otyipuka otyo, ankho uhanda vemutavele muetyi muene vamona netyi veiva kwe. — Maluku 7:32-36.

Epondolo lya Sesusi liokuhakula omauvela oo, ‘liahuvisile unene ovateheleli.’ Avapopi okuti: “Ovipuka aviho alinga oviwa unene. Alo umwe onompholo umbupatula omakutwi, ovihita-mulungu uvipatula ondaka.” — Maluku 7:37.