Mokonda ovanthu vena omitima vielikalela, ha aveho vatalele monkhalelo ike, etyi Sesusi ankho apopia netyi alinga. Otyo tyamoneka nawa etyi ankho eli meumbo limwe ko Ngalileya. Omu Faliseu umwe ankho utiwa Simau wakonga Sesusi vakalie nae, tyipondola ankho uhanda okutalela popepi omunthu wokulinga omahuviso omanene. Sesusi etavela okuenda, tyipondola ankho uhanda okuundapesa omphitilo oyo opo akuateseko ovanthu mavasi-ko. Wetavela ngetyi etavelele etyi akongelwe akalie novatanthi velilimu no vokulinga ononkhali.

Mahi Sesusi ahatambulwa nawa ngetyi ankho tyitambulwa ovaenda. Momatapalo o Palesitina ankho muasila, okukuata-mo onomphai mononkhaku ankho mbutokota unene iya ambusili, moluotyo ankho ovanthu tyina vatambula omueenda vemukoha nomaande atenda. Mahi Sesusi avehemulingi ngotyo. Tupu kavemuavelele ombesu, ngetyi ankho tyilingwa kohale. Kohale ankho tyina vatambula omueenda vemunengulila omulela momutwe opo valekese okuti vemutambula nawa. Sesusi avehemulingi ngotyo. Okuti ankho vemutambula nawa?

Avahimbika okulia novaenda ankho veli komesa. Putyina valia, omukai umwe eliyombeleka, eya anyingila tyihaihanenwe. Omukai oo “ankho wiiwe mepunda-umbo okuti ulinga ononkhali.” (Luka 7:37) Ovanthu aveho ovakuankhali, moluotyo omukai oo tyafuile ankho watyinda omuenyo wasila, tyipondola ankho ekunga. Tyafwa ankho weiva ovipuka Sesusi alongesa, netyi akonga ‘aveho vana valinga ovilinga vialema vaye kwe vapepululwe.’ (Mateusi 11:28, 29) Tyafuile onondaka mba Sesusi novipuka ankho alinga avimulundu ekemuovola.

Omukai eya konyima ya Sesusi komesa, aikila konongolo ponomphai mbae. Ononkhuka mbae ambutokela konomphai mba Sesusi, embusekuna nonohuki mbae. Emuhipi ombesu konomphai nohole, anengulilako omulela umwe unika nawa ankho aeta. Simau otyipuka otyo ehetyihande, elipopila okuti: “Inkha omunthu ou tyili-tyili wali omuuli, ñgeno wanoñgonoka olie omukai ou nokuti omunthu patyi ukahi nokumuyama. Ñgeno wetyimona okuti ulinga ononkhali.” — Luka 7:39.

Sesusi anoñgonoka etyi Simau ankho ekahi nokusoka, ati: “Simau, ndyina etyi mandyikupopila.” Ngwe ati: “Ewaa Mulongesi!” Sesusi apopi okuti: “Kuali ovalume vevali ankho vena ongele yomunthu umwe omulevalesi. Umwe ankho walevala onondenaliu 500, mahi omukuavo walevala 50. Mokonda ankho vetupu etyi mavafete, eveevela aveho vevali. Ngotyo, olie puvo makala vali unene nohole nae?” Tyipondola Simau akumbulula nomutomba, okuti: “Ndyisoka okuti oyo una wokuaevelwa vali unene.” — Luka 7:40-43.

Sesusi emutavela. Atale komukai, apopila Simau okuti: “Weete omukai ou? Ame neya meumbo liove ohamphe omaande okukoha konomphai mbange. Mahi omukai ou watalaleka onomphai mbange nononkhuka mbae, embusekuna nonohuki mbae. Ove kuamphele ombesu, mahi omukai ou nkhele neile muno utualako okuhipa onombesu konomphai mbange nohole. Ove kuambuavekele omulela momutwe wange, mahi omukai ou wambuaveka omulela unika nawa konomphai mbange.” Sesusi wetyimona okuti omukai una ankho ukahi nokulekesa okuti welivela nomutima auho omuenyo wasila wovinepo ovivi ankho alinga-linga. Moluotyo, amanuhula nonondaka ombo: “Ame ndyikupopila okuti, ononkhali mbae namphila ononyingi mbaevelwa, mokonda wakala nohole onene. Mahi una waevelwa vala katutu, ukala nohole ihehi.” — Luka 7:44-47.

Sesusi ankho kekahi nokupopia okuti ovinepo ovivi kaviapengele. Mahi walekesa okuti una kankhenda novanthu valingaile ononkhali ononene mahi konyima avalekesa okuti velivela unene, avaovola eungumaneso mu Kilisitu. Omukai welitehelele nawa etyi Sesusi emupopila okuti: “Ononkhali mbove mbaevelwa. . . . Ekolelo liove liekuyovola; enda nombembwa.” — Luka 7:48, 50.