1. Oñgeni tukala okunoñgonoka okuti Siovaa utuyeka tulikuambele kwe?

 ONTHWE tuna elao enene liokulikuambela Komutungi wouye auho, Siovaa. Nkhele soka vala: Onthwe tupondola okulikuambela ku Siovaa momuvo tuhanda, atutyilingila melaka lietu muene, mahi tyehena otyiho tyokuti manumana mokonda yetyi tualinga. Tupondola okulikuambela ku Siovaa tyina tuli mosipitali tyavela, iya atee umwe na tyina tuli mokaleya. Tulikuambela umwe nonthumbi yokuti Tate yetu metutehela. Onthwe tupandula unene elao tuna liokulikuambela.

2. Oñgeni Ohamba Daviti alekesile okuti uhole unene okulikuambela?

² Ohamba Daviti ankho tyokulikuambela utyihole unene. Waimbilile Siovaa okuti: “Elikuambelo liange likale ngo isesu yanika nawa kotyipala tyove.” (Sal. 141:1, 2) Pomuvo wohamba Daviti, ovanakwa ankho vayoka o isesu mefendelo lya Siovaa iya ankho ina umwe okulingwa nawa. (Êx. 30:34, 35) Tyina Daviti ankho elikuambela, etyi mapopi utyisoka umwe nawa, ngou uviukisa nawa o isesu. Nonthwe tuahanda okulinga ngotyo. Tuahanda omalikuambelo etu ahambukiswe Siovaa.

3. Tyina tulikuambela ku Siovaa tuna okutyilinga ñgeni iya omokonda yatyi?

³ Tyina tulikuambela ku Siova, tuna okutyilinga nonthilo. Nkhele tusokei komamonekelo amuene omuuli Isaiya, na Ezekiele na Daniele na apositolu Suau. Omamonekelo oo  ankho elikalela, mahi ena otyipuka tyike tyelifwa. Aeho ankho apopia omunkhima omunene wa Siovaa. Omuuli Isaiya wamuene “Siovaa upumphi kotyipundi tyomunkhima tyaya peulu.” (Isa. 6:1-3) Omuuli Ezekiele wamuene Siovaa upumphi ketukutuku liae keulu iya kononthele kuna otyipuka “tyilaima . . . ngomphumba.” (Eze. 1:26-28) Daniele wamuene “Omukulu Wononthiki” una omuvalo watuela, nonohahe mbotupia mbukahi nokutundilila potyipundi Tyae. (Dan. 7:9, 10) Iya apositolu Suau wamuene Siovaa upumphi kotyipundi iya okuliseta notyipundi otyo, ankho kuna omuvia wonkhongolo, ukahi ngemanya liosimelada. (Ehol. 4:2-4) Tyina tusoka komunkhima oo omunene wa Siovaa, tuhinangela okuti tuna elao enene liokulikuambela kwe, mahi tupu tuna okutyilinga nonthilo onene. Mahi oityi tuna okuiita momalikuambelo?

4. Oityi tulilongesila konondaka mbelikuambelo Sesusi alongesile mbuvasiwa mu Mateusi 6:9, 10?

⁴ Tanga Mateusi 6:9, 10. Melongomona Sesusi alingilile Komphunda, walongesile ovalongwa vae oñgeni vena okulikuambela monkhalelo ihambukiswa Siovaa. Etyi apopia okuti “muna okulikuambela ngetyi,” Sesusi akuamesako okupopia ovipuka vielikuata umwe netyi Siovaa ahanda: Okusukukisa enyina lya Huku; okuita Ouhamba uye, uhanyeko vana veyele Huku; novipuka oviwa Huku apakela ovanthu komutwe wandyila. Tyina tuita ovipuka ovio momalikuambelo, tulekesa okuti etyi Huku ahanda tyilingwe no kuonthwe tyesukisa unene.

5. Okuti Siovaa ututehelela tyina tumuita ovipuka tuesukisa?

⁵ Monthele onkhuavo yelikuambelo olio, Sesusi walekesa okuti okuita ovipuka tuesukisa katyapengele. Onthwe tupondola okuita Siovaa etuavele okulia kwa nthiki-na-nthiki, etuevele oviponyo vietu, etukuateseko tuahalinge onkhali, nokutuyovola konondingavivi. (Mat. 6:11-13) Tyina tuita ovipuka ovio ku Siovaa, tulekesa okuti tutei kwe iya apeho tuahanda okumuhambukiswa.

6. Okuti tyina tulikuambela, tuna umwe vala okupopia ovipuka Sesusi apopia melikuambelo alongesa? Hangununa.

 ⁶ Sesusi kakevelela okuti tyina ovalanduli vae velikuambela, vena umwe vala okupopia ovipuka apopia melikuambelo alongesa. Momalikuambelo omakuavo Sesusi alingile, wapopile ovipuka vielikalaila ankho viesukisa pomuvo watyo. (Mat. 26:39, 42; Suau 17:1-26) Tupu, nonthwe tupondola okuita ovipuka tuesuka navio. Tyina pena tyimwe tuahanda okulinga, tupondola okuita ounongo nekungunyiko. (Sal. 119:33, 34) Tyina tuapewa otyilinga tyimwe tyepuiya, otyiwa okulikuambela ku Siovaa etukuateseko okutyilinga nawa. (Pro. 2:6) Ovohe vapondola okuitilako ovana, ovana vapondola okuitilako ovohe iya atuho tupondola okuitilako ovalongwa vetu vo Mbimbiliya novanthu aveho tuvasa movilinga viokuivisa. Mahi tupu tyina tulikuambela, katupondola vala okuita Siovaa opo etukuateseko.

7. Omokonda yatyi otyiwa okupandula Siovaa tyina tulikuambela?

⁷ Tuna okupandula Siovaa tyina tulikuambela. Kutupu vali omunthu tupondola okupandula wapona Siovaa. Siovaa “ukahi nawa iya kasete okuevela.” Siovaa tupu “una okankhenda, kanumana liwa, una oluembia olunene iya upopia otyili.” (Sal. 86:5, 15) Onthwe tupandula unene Siovaa mokonda utulingila ovipuka ovinyingi oviwa.

8. Ovipi ovipuka vimwe tupondola okupandula Siovaa? (Salmo 104:12-15, 24)

⁸ Tupu, tupondola okupandula Siovaa mokonda yovipuka ovinyingi oviwa. Mongeleka, walinga ononthemo mbelikalaila mbuna ovivala oviwa. Utuavela okulia kuelikalaila kukahi nawa, iya tupu utuavela omapanga. Siovaa wetuavela ovipuka oviwa vituhambukiswa. (Tanga Salmo 104:12-15, 24.) Otyipuka otyiwa vali tuna okupandula Siovaa, okulia kuopaspilitu etuavela, novipuka oviwa meketuavela komutwe wandyila.

9. Oityi tyipondola okutukuatesako atuahalimbuako okupandula Siovaa? (1 Ova Tesalonika 5:17, 18)

⁹ Pamwe tulimbuako okupandula Siovaa ovipuka oviwa etulingila. Oityi tyipondola okutukuatesako okuahalimbuako?  Tupondola okuhoneka ovipuka tuahanda okumuita, pahe ha atutale oñgeni Siovaa etukumbulula. Konyima atumupandula etyi etukuatesako. (Tanga 1 Ova Tesalonika 5:17, 18.) Nkhele tusokei katutu: Onthwe tuhambukwa unene tyina vakuetu vetupandula. Tyelifwa notyo, tyina tupandula Siovaa mokonda wetukumbulula, nae uhambukwa unene. (Kolo. 3:15) Mahi otyipuka patyi vali otyikuavo tyesukisa unene tupandula Siovaa?

10. Ngetyi tyipopia 1 Petulu 2:21, omokonda yatyi tupandulila Siovaa etyi atuma omona wae pano pohi?

¹⁰ Tanga 1 Petulu 2:21. Tupandula unene Siovaa wetutuma Omona wae opo etulongese. Tunoñgonoka ovipuka ovinyingi viayemba ku Siovaa no ñgeni tupondola okumuhambukiswa mokulilongesila kuevi Sesusi alingile. Ine tukala nekolelo motyilikutila tya Kilisitu, matukala omapanga a Siovaa Huku. — Loma 5:1.

11. Otyilinga patyi Sesusi ena momalikuambelo tulingila Siovaa?

¹¹ Onthwe tupandula Siovaa mokonda tulikuambela kwe menyina Liomona wae. Etyi tuita ku Siovaa, utuavela-tyo menyina lya Sesusi. Sesusi wapopia okuti: “Atyiho muiita menyina liange, mandyityilingi, opo Tate ankhimanekwe mokonda Yomona.” — Suau 14:13, 14.

12. Oityi vali tupandula ku Siovaa mokonda Yomona wae?

¹² Siovaa wevela ononkhali mbetu pokati kotyilikutila tya Sesusi. Ovihonekwa vipopia okuti Sesusi “omunene-nakwa wavilapo [upumphi] kokulio kuotyipundi tyoutumini tya Huku Omunene komaulu.” (Heb. 8:1) Sesusi “omukuatesiko ukahi kumwe na He.” (1 Suau 2:1) Tupandula unene Siovaa wetuavela Omunene Nakwa unoñgonoka nawa ononkhali mbetu “iya utuitilako”! (Loma 8:34; Heb. 4:15) Onthwe tuvakuankhali, ngotyo ankho hatyilikutila tya Sesusi, onthwe ñgeno katutyivili okufuena ku Siovaa melikuambelo. Tyotyili, onthwe tutupu-ale onondaka mbutuuka opo tupandule Siovaa etyi etuavela Omona wae!

13. Motyinthiki Sesusi aipawa, oñgeni alekesile okuti uhole unene ovalongwa vae?

¹³ Motyinthiki Sesusi aipawa, welikuambelele ku Siovaa okuitilako ovalongwa vae opo ‘eveyunge, mokonda yondingavivi.’ (Suau 17:15) Otyo tyilekesa okuti Sesusi uvehole unene! Namphila muene ankho eihamenwa unene, mahi wasokele unene kovalongwa vae.

14. Oñgeni matulekesa okuti tuhole ovakuatate vetu?

¹⁴ Mokonda tuhetekela Sesusi, onthwe katutale vala kuevi tuesuka navio. Mahi apeho tuitila-ko ovakuatate vetu nonomphange. Tyina tulinga ngotyo, tulekesa okuti tutavela otyitumino tya Sesusi tyokukala noluembia navakuetu, iya tulekesa ku Siovaa okuti tuhole unene vakuetu. (Suau 13:34) Okuitilako ovakuatate vetu tyivekuatesako umwe unene. Ondaka ya Huku yapopia okuti “elikuambelo liomuviuki lina ononkhono ononene.” — Tia. 5:16.

15. Omokonda yatyi otyiwa okuitilako ovakuatate vetu?

¹⁵ Otyiwa okuitilako ovakuatate vetu, mokonda vena ovitateka ovinyingi. Tupondola okuita Siovaa evekuateseko okukoleleya tyina vavela, na tyina vamonekelwa noviponga,  novilwa, na tyina vamoneswa ononkhumbi, novitateka ovikuavo vali. Tupu tupondola okuitilako ovakuatate vetu valinga ononkhono mbokuundapa opo vatekule onombunga mbavo. Ove hamwe wii vamwe vena ovitateka ngovio. Atee upondola okutumbula omanyina avo tyina ulikuambela. Matulekesa okuti tuvehole unene tyina tuita Siovaa evekuateseko okukoleleya.

16. Omokonda yatyi otyiwa tuitileko vana vetukalela komutwe?

¹⁶ Vana vetukalela komutwe mewaneno vapandula unene tyina tuveitilako iya otyo tyivekuatesako unene. Apositolu Paulu nae ankho utyii okuti wesukisa okuitilwako na vakuavo. Wahoneka okuti: “Likuambelei pala ame, opo ndyipewe onondaka tyina ndyiikula omulungu wange, na ndyityivile okupopia tyihena owoma pokunoñgonokesa ovipuka viaholekwa vya Huku konthele yonondaka onongwa.” (Efe. 6:19) Hono, onthwe tuna ovakuatate vetuhongolela vaundapa unene. Tulekesa okuti tuvehole tyina tuveitilako momalikuambelo etu, opo Siovaa ayambe ovilinga valinga.

17-18. Onalupi pamwe vakuetu vetuita tulinge elikuambelo iya oityi tuahapondola okulimbwa?

¹⁷ Pamwe vakuetu vetuita tulinge elikuambelo. Mongeleka, omphange umwe ukahi nokulongesa omulongwa wae pamwe wiita mukuavo opo alinge elikuambelo. Omphange wokuaitwa alinge elikuambelo kei omulongwa oo, ngotyo melikuambelo maiti vala opo omulongwa anoñgonoke nawa etyi mavelilongesa. Tyina alinga elikuambelo, katyimuipuiya okuita vala ovipuka viesukisa komulongwa.

¹⁸ Omukuatate umwe upondola okuitwa alinge elikuambelo liokukaivisa, aa okulinga elikuambele meliongiyo liewaneno. Ovakuatate vokulinga omalikuambelo momaliongiyo, otyiwa vahalimbwe etyi omaliongiyo alingilwa. Pokulikuambela hatyiwa vahalinge ngatyina vaviyula vakuavo, ine ngatyina vekahi nokulinga omaiviso. Momaliongiyo, otyiimbo nelikuambelo vikala vala onominutu 5. Ngotyo, otyiwa omukuatate wokulikuambela ahapopie “onondaka ononyingi,”  haunene tyina eliongiyo lihimbika. — Mat. 6:7.

19. Oityi matyitukuatesako okukala tyafuapo pala okukevelela onthiki onene ya Siovaa?

¹⁹ Elikuambelo lina okukala otyipuka tyesukisa unene, haunene tyina onthiki onene ya Siovaa ifuenainako. Sesusi wapopile okuti: “Tualeiko tyipahi, nokuita omuvo auho, opo muhupe kovipuka ovio aviho mavikeya.” (Luka 21:36) Okulikuambela apeho matyitukuatesako okupameka ekolelo lietu, iya onthiki ya Siovaa aituvasi tupahi.

20. Oñgeni omalikuambelo etu apondola okuelekwa no isesu yanika nawa?

²⁰ Oityi tuelilongesa monthele ei? Tuna okupanda elao tuna liokulikuambela. Haunene tuna okuita ovipuka vielikuata umwe netyi Siovaa ahanda. Tupu tuna okupandula Omona wa Huku, Nouhamba wae iya nokuitilako ovakuatate vetu. Tupu tuna okulikuambela okuita ku Siovaa evi tulitekula navio, nevi vipameka oupanga wetu nae. Tyina tusoka umwe nawa kovipuka tuita momalikuambelo etu, matulekesa okuti tupanda unene elao tuna liokulikuambela. Evi tupopia melikuambelo vina okukala ngo isesu yanika nawa opo ‘vihambukiswe’ Siovaa. — Pro. 15:8.