Okuaana kuapopiwa Mombimbiliya, okupopia otyipuka molingi, mahi povipuka ovinyingi pamwe ombangi yatyo o Huku! Pamwe okupopia vala komulungu, mahi tupu pamwe omunthu una apa etyihoneka.

Ovanthu vamwe vasoka okuti okuaana tyapenga, mokonda Sesusi wapopia okuti: “Muhaanei nalumwe . . . yeka vala ondaka yove ‘Enga’ ikale umwe enga, iya o ‘Au’ yove, aikala umwe au, mokonda okuhalingi ngotyo otye Liapu.” (Mat. 5:33-37) Sesusi ankho utyii okuti Ovitumino Viapelwe Muisesi ankho vipopia okuaana iya tupu ankho utyii okuti ovaumbili vamwe ovakuatyili va Siovaa vaanene. (Gên. 14:22, 23; Êxo. 22:10, 11) Tupu nae ankho utyii okuti na Siovaa waana. (Heb. 6:13-17) Otyo tyilekesa okuti Sesusi ankho kekahi nokupopia okuti katupondola okuaana. Mahi ankho ukahi nokupopia okuti katupondola vala okuana nomovipuka viehesilivila, viehena oku viapilukila. Tuna okusoka nawa kovipuka tupopia. Tuna okulinga etyi tuapopia.

Oityi ove upondola okulinga inkha wiitwa opo waane? Tete, ovola okunoñgonoka oñgeni mofwisipo omulao molingi. Inkha utupu onthumbi yokuti motyifwisipo, opo hahe vali wahaane. Ondaka ya Huku itulondola okuti: “Hahe vali okuahapopi natyike, tyipona okupopia ohetyifuisapo.” (Ecl. 5:5) Konyima upondola okutala nawa Onondongwa Mbombimbiliya mbupopia okuaana, pahe olingi etyi omutima wove walongesua Nombimbiliya ukupopila. Onondongwa patyi Mbombimbiliya tuna okusoka nawa?

Okuaana kumwe kuelikuata umwe netyi Huku ahanda. Mongeleka, Onombangi mba Siovaa valinga omulao tyina velinepa. Omulao oo nao okuaana. Komaiho a Huku ovalinepi ovo vaana okuti, “momuvo auho tuna omuenyo” matutualako okulihumba nokulilinga onthilo. (Namphila ovalinepi vamwe pokulinepa kavapopi onondaka ombo mahi nongotyo valinga omulao ku Huku.) Pahe avaihanwa okuti ovalinepi, tyilekesa okuti pahe mavakala aveho momuvo auho vena omuenyo. (Gên. 2:24; 1 Kol. 7:39) Otyipuka otyo tyikahi nawa, tyelikuata netyi Huku ahanda.

Okuaana kumwe kakuelikuatele netyi Huku ahanda. Omuumbili wa Huku kapondola okuaana okuti mayakulila otyilongo nomauta, ayekepo okuumbila Huku. Okulinga ngotyo, katyelikuatele novitumino vya Huku. Ovakilisitau kavapondola “okulinga onthele youye,” tyilekesa okuti kavapondola okulipaka mopulitika. — Suau 15:19; Isa. 2:4; Tia. 1:27.

Okuaana kumwe kutei komutima wa munthu-na-munthu. Pamwe tuesukisa okutala nawa okuaana kumwe mokonda yonondaka mba Sesusi mbati “fetei ku Sesale ovipuka vya Sesale,  mahi ovipuka vya Huku, viavelei Huku.” — Luka 20:25.

Mongeleka, tusokei ñgeno omukilisitau umwe uhanda okukala nombiyete nopasaporte, pahe anoñgonoka okuti opo akale nomikanda ovio, wesukisa okuaana okukala omukuatyili. Inkha motyilongo tyenyi ovatumini vaita omikanda ovio, omukilisitau anoñgonoka okuti okuaana oko kuakutikinya okuliatela kovitumino vya Huku, omutima wae walongesa Nondaka ya Huku kamaumuyeke etyilinge. Pamwe ovatumini vapondola okumupopila otyipuka otyikuavo esukisa okulinga mokonda yomutima wae wehemuyeke okuaana.

Etyi mavemupopila tyipondola hamwe matyilikuate netyi tyipopia Ova Loma 13:1, yati: “Ovanthu aveho vena okutavela kovatumini.” Opo omukilisitau upondola okutyilinga mokonda kamelitehela omapita okulinga otyipuka Huku ati tuna okutyilinga.

Omutima walongesiwa nawa Nondaka ya Huku, tupu upondola okutukuatesako tyina tuamaitua okulinga otyipuka tyimwe mahi tyelikuata nokuaana. Ovanthu vomo Loma yokohale nova Sita ankho vaanena omitunga viavo, mokuiita ono huku mbavo movilwa opo mbuveyakulile. Ova Ngeleku ankho vayelula omankhanya peulu tyina vaana. Ankho valinga ngotyo mokonda vasoka okuti pena otyikahuku tyimwe tyivemona tyina vetyilinga.

Omuumbili wa Huku kapondola okuaana ovipuka vili motyilongo tyavo vielikuata nefendelo liomatutu. Mahi oityi molingi inkha waya kombonge pahe avekuiti upake enkhanya Kombimbiliya imwe, waane okuti mopopi otyili? Motyipuka ngotyo, ove upondola okutavela mokonda Ovihonekwa vipopia ovaumbili ovakuatyili navo valingile ngotyo. (Gên. 24:2, 3, 9; 47:29-31) Otyiwa uhinangele okuti inkha waana motyipuka ngotyo, opo waana ku Huku okuti mopopi vala otyili. Wesukisa okukala tyafuapo pala okupopia otyili movipuka aviho mavekupulu.

Mokonda onthwe tupanda unene oupanga tuna na Siovaa, tulikuambela mu kese tyipuka tuhanda okuaana mokonda katuhande okuliatela konondongwa mba Huku. Inkha uhanda okuaana kala nonthumbi yokuti motyivili okutyifuisapo. — 1 Pet. 2:12.