Etyi Huku Alingila Vana Vemutavela
Omuuli Moisesi wapopia okuti okutavela etyi Huku apopia tyituetela vala ouwa. (Deuteronômio 10:13; 11:27) Okuti tutavela vala Huku mokonda una etyi apondola okutulinga? Au. Onthue tumutavela mokonda tumuhole, katuhande okulinga natyike tyimunumanesa. Ovituwa viae vitulunda okumuhumba. “Ohole na Huku ihangununa etyi: Onthue tuna okuendela movitumino viae.” — 1 Suau 5:3.
Mahi oñgeni okutavela Huku tyitukalesa? Tyitukalesa vala nawa! Tala ononkhalelo onombali.
1. TYINA TUTAVELA HUKU TUKALA NONONDUNGE
“Ame, Siovaa, ame Huku yove, Una ukulongesa pala ouwa wove, Una ukuhongolela mondyila una okuendela.” — ISAÍAS 48:17.
Omutungi wetu, Siovaa Huku, utupopila etyi tuesukisa okulinga mokonda utwii nawa. Ovipuka etulongesa vitukalesa nonondunge, vitukuatesako okulinga omatokolo omawa momuenyo wetu. Mahi matukala vala nonondunge, ine tulilongesa Ondaka yae, atulingi ngetyi tuelilongesa.
2. TYINA TUTAVELA KU HUKU TUKALA NEHAMBU
“Vena ehambu ovo vana vatehelela ondaka ya Huku avaendela-mo!” — LUKA 11:28.
Hono ovanthu ovanyingi vokuendela mu etyi Ondaka ya Huku ipopia, vena omuenyo ukahi nawa. Mongeleka, omukuendye umwe ukala ko Espanha, ankho omukalavi. Ankho ulinga onya vakuavo atee umwe omukai wae. Nthiki imwe atange mo Mbimbiliya etyi tyaendele nomona wa Sakoo ankho utiwa o Suse. Walandesilwe novakulu vae, akala omupika. Konyima apakwa mokaleya, ehena etyi alinga. Mahi ngwe ehesuku. Atualako okukala omunthu omuwa, nii ehevekondolela etyi vemulinga onya. (Génesis, okapitulu 37-45) Omukuendye oo wo ko Espanha wati: “Otyipuka otyo tyaendele na Suse, tyampha ondundo yokukala omunthu omuwa, nokulinga nawa vakuetu, nokulikondola omutima. Pahe ndyina ehambu!”
Ombimbiliya itupopila oñgeni tuna okutekula vakuetu. Onthele mailandulako maityipopi nawa.