OKULAVISWA nomunthu welinepa nae tyiihama unene. Tyotyili, vamwe vapondola okuevela ou velinepa nae wemulavisa iya avatualako vali noupanga wavo. a Mahi tyilinge mavelievela ina kamavetyilingi, una wiimbuka okuti walavisua nou elinepa nae, tyimuihama unene. Oñgeni vamwe vehole okulambela motyitateka ngotyo?

Namphila tyiihama unene, vokualaviswa vavasa eungumaneso mo Mbimbiliya. Vanoñgonoka okuti Huku weete ononkhuka mbavo noluihamo valambela. — Malaquias 2:13-16.

“Tyina omalusoke ange okunthyukalalesa alinga omanyingi momutima wange, eungumaneso liove lihimbika okukalesa nawa omuenyo wange.” — Salmo 94:19.

“Etyi natanga oversikulu oyo, andyilitehelela okuti Siovaa ukahi nokupameka mokonda yoluihamo ndyikahi nokulambela, ngetyi he apameka ovana vae.” — Bill.

“Omukuatyili umutekula noukuatyili.” — Salmo 18:25.

Carmen walavisua mokueenda kuonohanyi ononyingi nomulume wae wati: “Omulume wange kakalele omukuatyili. Mahi ndyiyumba onthumbi mohole onene ya Huku. Siovaa nalumwe mandingi onya.”

“Muhakalei notyiho notyipuka natyike, mahi mu kese tyipuka likuambelei . . . amunoñgonokesa Huku etyi muiita, iya ombembwa ya Huku, ipona enoñgonoko aliho maiyungu omitima vienyi.” — Ova Filipu 4:6, 7.

Sasha wati: “Ankho ndyitanga oversikulu oyo ovikando ovinyingi. Tyina ankho ndyitualako okulikuambela, Huku umpha ombembwa yae.”

Ovanthu aveho vapopiwa, ovikando ovinyingi ankho velitehelela okuti mavayeke-ko. Mahi vayumbile onthumbi mu Siovaa Huku nomo Ndaka yae. Bill, wapopiwa monthele ei wati: “Ekolelo liange liankhuatesako okukoleleya movitateka. Namphila ndyikuata ‘mevota lianthikovela, himakala nowoma, ‘mokonda Huku ukahi na ame.” — Salmo 23:4.