Tyaviuka Ine Tyapenga? Onondunge Patyi Molandula?
Onondunge tulandula ombo mbulekesa oñgeni matukakala. Siovaa Huku otyipuka otyo utyii. Otyo ahandela atuho tulandule onondunge mbae.
Siovaa wahanda tukale nawa, tukale nehambu.
“Ame Siovaa, ame Huku yove, Ou ukulongesa etyi tyikupa, Ou ukuhongolela mondyila una okweendela. Ñgeno watehelelele-vo vala nawa ovitumino viange! Opo ñgeno ombembwa yove yakala ngondongi, okuviukisa kwove, akukala ngomanyonda elunga.” — Isaiya 48:17, 18.
Mokonda Huku oe wetutunga, utyii etyi tyitukalesa nawa. Ngwe wahanda tulandule onondunge mbae, opo tukale nawa. Ine tulandula ovitumino vya Huku, apeho vala etyi tulinga matyitweende nawa. Apeho matulingi ovipuka viaviuka, ovipuka vitukalesa nawa, vieeta ehambu.
Siovaa ketwiiti etyi twehevili.
“Ovitumino evi hono ndyikupopila, vina kavikupwiya-le, kaviekukalele-ale kokule.” — Epalukununo 30:11.
Opo tweendele movitumino vya Huku, tuna okuyeka-po ovipuka vimwe tusoka, neevi tulinga. Siovaa ketwiiti-ale etyi twehevili. Mokonda oe wetutunga, utwii umwe nawa, neetyi tuvila utyii. Tyina tunoñgonoka umwe nawa Siovaa, matutyimono okuti “ovitumino viae kavileme.” — 1 Swau 5:3.
Siovaa wati makwatesako ava vaendela movitumino viae.
“Ame Siovaa Huku yove, nekukwata mokuvoko kwove kwokulio. Ame ame wokwati: ‘Wahatile owoma. Ame mandyikuyake.’” — Isaiya 41:13.
Tupondola umwe okutyivila okulandula onondunge mba Siovaa mokonda nae mwene metukwatesako. Siovaa upondola okutukwatesako Nondaka yae Ombimbiliya itwavela ononkhono, itupopila oviwa matukamona komutwe wandyila.
Ovanthu ovanyingi mouye auho, vetyimona okuti okulandula ovitumino vili m’Ombimbiliya tyevekalesa vali nawa. Ove kuhande okunoñgonoka onondunge onongwa mbuli m’Ombimbiliya? Ine wahanda, tanga ombulusula ili mo jw.org yati, Kalako Nomwenyo Apeho! ipopia etyi tyili m’Ombimbiliya. Wiipola-mo vala otyali. M’ombulusula omo mwapopiwa ovipuka evi:
-
Oñgeni Ombimbiliya Ipondola Okukukuatesako Momwenyo Wove?
-
Ombimbiliya Ipopia Okuti Ovipuka Mavikakala Nawa
-
Etyi Ombimbiliya Ipopia, Okuti Upondola Okutyiyumba Umwe Onthumbi?
Ine ulilongesa umwe nawa Ombimbiliya, motyimono okuti yahula okuti oyo kohale, mahi etyi ipopia na hono tyikwatesako ovanthu. Etyi ipopia ‘tyiyumbwa onthumbi pehepano, matyitwalako okuyumbwa onthumbi.’ (Oviimbo 111:8) Okulandula onondunge mbuli m’Ombimbiliya tyitukalesa nawa. Mahi tupu Huku kametuti ngaliti pano, ombo tuna okulandula. (Epalukununo 30:19, 20; Susuwee 24:15) Otyo tyitei vala kwoonthwe.