OKUTALELA KONONTHUNGULU: Ovanthu vamwe vasoka okuti, onkhalelo ononthungululu mbukahi tyina omunthu amatyitwa, otyo tyilekesa oñgeni omuenyo womunthu oo komutwe wandyila maukakala. Ovanthu vatalela kononthungululu vanoñgonoke etyi matyiende momuenyo wavo. Pahe avalingi ngetyi vamona mo nonthungululu.

ETAMBU: Ovanthu vamwe vasoka okuti, onkhalelo vatunga onondyuo mbavo, oyo matyivekuatesako okukala nehambu. Omunthu umwe utiwa o Lo Wing, * ukala ko Hong Kong wati: “Omunthu umwe watanga unene wamphopilile okuti, inkha upaka vala okamulela aka pomphangu mankhulekesa movenda yove, mo landesa unene, olingi omuhona.”

OKUFENDA OVAKUAUKULU: Ovanthu ovakuavo vasoka okuti vena okufenda ovakuaukulu vavo veveyakulile nokuveyamba. Omunthu umwe utiwa o Van, ukala ko Vietnã wati: “Ame ankho ndyisoka okuti okufenda ovakuaukulu vange tyinkhuatesako kumwe nomona wange okukala nomuenyo ukahi nawa pehepano no komutwe wandyila.”

OKUKAKALA NOMUENYO KOMPHANGU ONKHUAVO: Ovanthu vamwe vasoka okuti tyina omunthu amankhi ukatyitwa vali komphangu onkhuavo. Ovanthu ovo, vati tyina ukahi nokumona ononkhumbi natyina una omuenyo ukahi nawa, omokonda yovipuka walingile etyi ankho una omuenyo komphangu onkhuavo.

Mahi ovanthu vamwe vapopia okuti otyo omatutu. Namphila vehetavela ovipuka ovio mahi pena ovipuka valinga vielifwa novio, okutalela kohitu, komeva, kovilia no konombongo. Vevilinga mokonda vasoka okuti mavivekuatesako okunoñgonoka etyi matyikevemonekela komutwe wandyila.

Okuti vana vetavela kovipuka ovio vakala umwe nawa pehepano no komutwe wandyila?

Tala etyi tyaendele nomukulu umwe utiwa o Hào, ukala ko Vietnã. Waovolele okukuatesuako okutalela kononthungululu, nokufenda ovakuaukulu. Okuti viemukuatesileko umwe? Hào wati: “Ononiñgoso mbange ambutoko, andyikala nonongele ononyingi, andyikala novitateka mombunga, otyo atyinthyoyesa unene.”

Qiuming, ukala ko Taiwan, nae ankho utavela okuti okutalela kononthungululu, nokufenda ovakuaukulu tyikuatesako ovanthu. Tupu ankho usoka okuti omunthu ukatyitilwa komphangu onkhuavo. Pahe etyi asoka umwe nawa ovipuka ovio, apopi okuti: “Namona okuti ovipuka vina vingwangwanesa vala, petupu oku viayemba. Hapeho ovipuka tutala kononthungululu ovio vimoneka. Okutyitwa otyivali, momutwe wange katyifumo, mokonda ine ove kuhinangela oñgeni wali kohale, oñgeni molingi ovipuka mavikekukuatesako tyina wamakatyitua vali komphangu onkhuavo?”

Nga Hào na Qiuming, ovanthu ovanyingi vanoñgonoka okuti, ovipuka mavimoneka no onthue kavitalekwa kononthungululu no kokufenda ovakuaukulu vetu, nokutyitwa otyivali. Mahi okuti otyo tyilekesa okuti petupu etyi tupondola okulinga tukakale nomuenyo omuwa?

Ovanthu vasoka okuti opo vakakale nomuenyo ukahi nawa, vena okutanga unene nokukala nonombongo. Mahi oityi vana valinga ovipuka ovio vapola-ko?