OSAPI YO KONDYE | OMBIMBILIYA—PETUPU OMUNTHU WIIVILA OKUIHANYAKO
Ombimbiliya Itualako Namphila Vahanda Okuihanyako
ETYI OVANTHU VALINGILE: O papilu no pergaminho oviti ovahoneki vaundapesa tete opo vahoneke Ombimbiliya. * (2 Timóteo 4:13) Oñgeni oviti ovio viakuatesako Ombimbiliya opo yahahanyueko?
O papilu itupu otyivala otyiwa, kayakolele iya ankho kaisete okupwa. Ovanongo vokulilongesa ovituwa vio va Egitu Richard Parkinson na Stephen Quirke vati: “Ombuingwa oyo ankho ipuilisa mokonda ankho ipondola okupwa alo umwe ikala eheke.” “Putyina iholekwa, ombuingwa yatyo ipondola okumena vali ine ivola mokonda yokuatalala iya ipondola okuliwa nofwa ine ovinyama ovikuavo, aikala ongonga mahi tyahasilivila vali aikala vala tyelikuata-kuata.” Ono papilu mbumwe, liwa-liwa mbupondola okuhimbika okuneñgena liwa iya ambutadauka, ankho mbupakwa apa pena omutenya ine pena otyituto, mbupondola okupwa tyahasete.
O pergaminho yakola vali tyipona o papilu. Mahi tupu ipondola okutanduka inkha ipakwa apa patokota unene, naapa pena omutenya ine otyituto. * O pergaminho tupu iliwa nounyama. Ngetyi tyapopia ovihonekua, momukanda umwe utiwa Everyday Writing in the Graeco-Roman East, “onkhalelo ombuingwa yatualako tyihuvisa.” Namphila Vahandele okuhanyako Ombimbiliya, alo umwe etyi ipopia kavetyivilile okutyihanyako.
OÑGENI OMBIMBILIYA YATUALAKO: Otyitumino tyapelwe ova Judeu ankho tyipopia okuti ohamba “ina okuhoneka omukanda wotyitumino palae,” wo mikanda vitano Viombimbiliya. (Deuteronômio 17:18) Ngotyo, ovahoneki valingile ovihonekwa ovinyingi motyita tyotete P.K., iya ovihonekwa ovio ankho vipondola okuvahiwa monondyuo ambuho ankho ova Isilayeli vafendela alo umwe ko Masedonia! (Lucas 4:16, 17; Atos 17:11) Oñgeni ovihonekwa ovikulu viatualako alo hono?
Ovihonekwa viiwe okuti Onombuingwa mbo Mar Morto, mbatualako mokueenda kuomanima omanyingi momilindi momaleva akukuta
Omunongo umwe utiwa Philip W. Comfort wo (Novo Testamento) Otestamendu Omphe wati: “Ova Judeu ankho vetyii okuti onombuingwa ankho mbuna okupakwa momilindi opo mbuholekwe nawa.” Ovakristau tyafuile vatuaileko noviso ovio. Pamwe ankho Ovihonekwa vivasiwa momilindi, no momaleva ankho akala kokule.
OUWA WATUNDILILAKO: Ononthele ononyingi mbo Mbimbiliya, mbumwe mbahonekwale omanima 2.000 konyima, mbatualako alo hono. Kutupu vali omukanda omukuavo watualako alo hono ngo Mbimbiliya.
^ palag. 3 O papilu omukanda uhonekwa, mahi ankho ulingwa notyifo tyimwe tyitiwa papilu tyikala momeva. O pergaminho ankho ilingwa no nombandwa mbo vinyama.
^ palag. 5 Mongeleka, omukanda wovitumino vio Independência yo Estados Unidos, nao wahonekelwe mo pergaminho. Pehe palamba omanima 250, etyi tyahonekwamo ankho katyimoneka vali nawa mokonda katyitavela vali okutyitanga.
Hamwe Noove Uhanda
OMUTALA WOMULAVI
Otyipuka Tyimwe Tyavasiwa Apa Pasila
Otyinthimbu tya Rylands, otyinthimbu tyo Evandyeliu ya João, ovio ovihonekwa ovikulu vali vio Mbimbiliya vio Vihonekwa vio Vakristau mo Gregu.
