Omokonda yatyi tyapenga okupaka omikanda vyo Nombangi mba Jeova mono site ononkhuavo mo internet?

Ovanthu vamwe vasoka okuti mokonda tuava omikanda vietu otyali, vapondola okuvipaka mono site ononkhuavo mo internet. Mahi okulinga ngotyo tyipondola okueta ovitateka ovinene iya otyituwa otyo katyelikuatele novitumino vina okulandulwa na vana vaundapesa ono site mbetu. * (Tala onondaka pokatoi) Ovitumino ovio vipopia nokuayandyuluka nawa okuti nawike upondola “okupaka mo site onkhuavo omalutalatu, nomikanda, nenyingilikilo, noviimbo, no novidiu, nononthele ononkhuavo mbo site yetu.” Omokonda yatyi ovitumino ovio viesukisila?

Ovipuka aviho vikahi mono site mbetu viyakulilwa novitumino. Otyo tyakolela unene opo ovipuka vikahimo vihaundapeswe omapita. Ovanthu vatyitukilapo otyili iya novakuavo vahanda okunyona ovilinga vietu, pamwe vapaka omikanda vietu mono site mbavo opo Onombangi mba Jeova novanthu ovakuavo vanyingile-mo. Mahi muna ovipuka vingwangwanesa ovanthu. (Salmo 26:4; Provérbios 22:5) Ovakuavo vapaka omikanda vietu, nenyingilikilo lietu movipuka valinga mo inernet, no movipuka valandesa. Mahi mokonda ovipuka vietu, nenyingilikilo viyakulilwa novitumino, tupondola okutuala ovanthu ovo kombonge. (Provérbios 27:12) Mahi ombonge kamaituyakulila inkha tuyeka ovanthu vamwe, alo umwe ovakuatate vapake omikanda vietu mono site ononkhuavo mo internet ine vaundapese enyingilikilo lietu movipuka valandesa.

Okupola omikanda vietu mono site ononkhuavo otyiponga. Jeova utuavela vala okulia kuo paspilitu pokati “komupika wekolelo nokualunguka.” (Mateus 24:45) “Omupika” uundapesa vala ono site mbetu opo etuavele okulia kuo paspilitu, ngetyi o www.pr418.com no tv.pr418.com iya no wol.pr418.com. Tupu tuna vala ono aplicativo ononthatu, ngetyi o JW Language^® JW Library^® no JW Library Sign Language^®. Mono site mbetu katuvasimo ovipuka viouye wa Satanasi. Mahi okupola omikanda vietu mo site onkhuavo otyiponga mokonda hamwe viapilululwa.—Salmo 18:26; 19:8.

Tupu, inkha tupaka omikanda vietu mono site apa ovanthu vapondola okupopia etyi vasoka, otyo matyiavela omphitilo vana vatyitukilapo otyili novanthu ovakuavo okupopia omapita eongano lya Jeova. Iya tyina otyo tyimoneka-po, ovakuatate vamwe vayayesa ovanthu ovo iya otyo tyipenyesa vali Jeova. Mahi okuyayesa ovanthu ovo mo internet hankhalelo ikahi nawa yokuvekuatesako okupilulula olusoke luavo ine okuvenoñgonokesa otyili. (1 Timóteo 6:3-5; 2 Timóteo 2:23-25) Tupu, ovanthu vamwe valinga ono site ine vaikula onokonda mo internet mbumoneka ngatyina o mbeongano, ine o mbo Nonkhalamutwe mbo Nombangi mba Jeova. Mahi ovipuka ovio ha viotyotyili. Pononkhalamutwe Mbonombangi mba Jeova nawike una o site yae muene, tupu nawike una omapanga mo internet.

Tyina tukuatesako ovanthu okunyingila mo site jw.org, tukahi “nokuivisa onondaka onongwa.” (Mateus 24:14) O site yetu nono aplicativo mbetu, apeho mbuviukiswa opo mbukale vali nawa. Onthue tuhanda ovanthu aveho vapoleko ouwa. Ngotyo, tupondola okutuma omesase yakutikinya omukanda ku vakuetu ine okuvetuma enyingilikilo opo vanyingile mo site yetu. Tyina tulinga ngotyo, tukuatesako ovanthu okuvasa ondyivi-ndyivi Jeova ekahi nokuundapesa, “omupika wekolelo nokualunguka” opo aave okulia kuo paspilitu.