Tyafuile hatyoko ankho ahanda okupopia. Eliapu kaliapopilile Eva okuti inkha ulia kotyinyango Huku ailika ankho mamoneka vala ngoti wankhia, mahi molutu lwae amutundu otyipuka matyitualako nomuenyo momphangu onkhuavo (etyi ovanthu ovanyingi hono vaihana okuti ohande). Satanasi wapopila Eva monyoka okuti inkha ulia kotyinyango, ‘tyotyili kamankhi.’ Satanasi ankho uhanda Eva etavele okuti matualako nomuenyo omuwa pano pohi iya ankho kesukisile okutuminwa na Huku. — Gên. 2:17; 3:3-5.

Tyayandyuluka nawa okuti elongeso liokuti ovanthu vena ohande ihankhi, kaliatukile mo Endene. Naina, opi liatuka? Katutyii! Etyi twii okuti omalongeso aeho omatutu anyimua-ko Nombila Onene pomuvo wa Noe. Pahupile vala Noe nombunga yae, ovaumbili ovakuatyili va Siovaa. Ngotyo, nawike vali ankho ulongesa omatutu.

Moluotyo, elongeso liokuti ohande kainkhi, liatuka konyima Yombila Onene. Etyi Huku angwangwanesa omalaka pomuvo wokutunga o Mbabele, ovanthu aveliyandyana “mouye auho.” Mokonda yotyo, olusoke luokuti ovanthu vena ohande ihankhi, nalo aluhimbika okuliyandyana. (Gên. 11:8, 9) Onthue katutyii nawa-nawa onalupi elongeso olio liahimbika. Mahi tutyii okuti liahindwa na Satanasi Eliapu, “he younkhembi.” Iya tyotyili Satanasi wahambukwa okutala okuti elongeso olio, likahi nokuyandyaneswa unene. — Suau 8:44.