ONTHELE YOKULILONGESWA 19
Oñgeni Matupameka Onthumbi Yetu Momphango ya Siovaa Yokweeta Ouye Omupe?
“Okuti tyina [Siovaa] amapopi otyipuka, ketyilingi?” — NÚM. 23:19.
OTYIIMBO 142 Tukakatelei Mekevelelo Lietu
ETYI MATULILONGESA a
1-2. Oityi tuna okulinga tyina nkhele tukevelela ouye omupe?
ONTHWE tupandula unene etyi Siovaa apanga okupola-ko ouye ou wovivi, aete-ko ouye umwe omupe mulingwa vala evi viaviuka. (2 Pet. 3:13) Namphila twehetyii onalupi ouye omupe mauya, mahi kuna ovipuka vilekesa umwe okuti kwakamba vala kapii mauya. — Mat. 24:32-34, 36; Ovil. 1:7.
2 Mahi tyina nkhele tuli nokukevela, atuho, tyilinge tweya-le kohale motyili, tyilinge tweya-mo vala pahetyino, twesukisa okupameka onthumbi yetu momphango oyo ya Huku. Omokonda yatyi? Omokonda nonthumbi umwe yatokota ipondola okutenda. Ngwe omu apositolu Paulu wati tyitwala umwe omunthu kokwahayumbu vali onthumbi mu Huku, ‘onkhali ihasete okutuhitikinya.’ (Heb. 12:1) Opo nthumbi yetu yehehike kokutenda, twesukisa apeho okusoka kovipuka vilekesa okuti ouye omupe mauya umwe, uli popepi. — Heb. 11:1.
3. Oityi matupopi monthele ei?
3 Monthele ei matupopi ovipuka vitatu vipameka onthumbi yetu momphango ya Siovaa yokweeta-ko ouye omupe: (1) Okusoka kotyilikutila tyeyovo, (2) okusoka kononkhono ononene Siovaa ena-mbo, (3) okulinga ovipuka vitukalesa vali noupanga omuwa na Siovaa. Pahe haa atupopi oñgeni etyi Siovaa apopilile Hambakuke tyipameka onthumbi yetu hono. Mahi nkhele matupopi ovipuka vimwe visukisa umwe tupameke onthumbi yetu momphango ya Huku yokweeta-ko ouye omupe.
OVIPUKA VIMWE VISUKISA TUPAMEKE ONTHUMBI YETU
4. Omovipuka patyi tusukisa umwe okupameka onthumbi yetu?
4 Ononthiki ambuho tusoka ovipuka matulingi, vimwe ovievi: Ovalie mavakala omapanga etu, ovipuka patyi matutale tulimana navio ounye, matulongeswa atee-pi, matunepe ine kamatunepe, matukala novana ine kamatukala novana, atee umwe novilinga matuundapa. Ngwe pokusoka ovipuka viatyo ovio, tyisukisa okukala nonthumbi yapama. Otyiwa okulipula okuti: ‘Ovipuka ndyilinga vipopia umwe okuti ndyityii tyokuti ouye ou maupu-ko, apa katutu Huku maeta ouye omupe? Ine evi ndyilinga ndyitalela vala kwaava vokusoka okuti, omunthu nga ankhia kwapwa umwe tyakala-po?’ (Mat. 6:19, 20; Luka 12:16-21) Matukoyo vala okulinga ovipuka vikahi nawa, tyina tuyumba-ko umwe onthumbi okuti ouye omupe uli-ale popepi.
5-6. Oityi tusukisila okukala nonthumbi yapama momuvo wovitateka? Oityi tutyeeleka natyo?
5 Tupu pamwe tutumbukilwa novipuka vimwe visukisa umwe tukale nonthumbi yapama. Pamwe okuyalwa mokonda Tunombangi mba Siovaa, nokutumbukilwa nouvela, novipuka ovikwavo vali vipondola okutusoyesa. Pokuhimbika nkhele tupondola atuti umwe, matutyivili okukoleleya. Mahi ine vieenda-ko ehimbwe otyo viahapu, hamwe tupu avililundikinya vala, opo pahe matyisukisa umwe tupameke onthumbi na tutyivile okukoleleya, atwahayeke-ko okulinga ovilinga vya Siovaa nehambu. — Loma 12:12; 1 Pet. 1:6, 7.
6 Tyina tuli movitateka, tupondola atusoko okuti ouye omupe Siovaa apanga kamauya-le vali. Okuti opo ngootyo onthumbi yetu yatenda? Au otyo hatyoko. Tuhole okutyimona tyina pamwe tuli umwe mokati koutalala, kwatenda umwe unene, tupondola atusoko atuti tyafwa kaupwa-apwa-le vali, outokotwe kamauya-le vali. Mahi ngwe mauya umwe. Na tyina twasoya unene, tupondola umwe okusoka okuti ouye omupe kamauya-le vali. Mahi ine onthumbi yetu mu Huku yapama, opo tutyii okuti onomphango mba Huku mambulingwa umwe. (Sal. 94:3, 14, 15; Heb. 6:17-19) Ine tuyumba-ko onthumbi, opo apeho matupake komutwe ovilinga vya Siovaa.
7. Okutyi tuna okulunguka?
7 Motyipuka otyikwavo tusukisa umwe okupameka onthumbi yetu mu Huku, omovilinga viokwivisa. Ovanthu ovanyingi twivisa, tyina veiva “onondaka onongwa” tupopia mbokuti Huku maeta-ko ouye omupe, vasoka okuti otyo tyalinga otyiwa unene katyikalinga-le otyili. (Mat. 24:14; Eze. 33:32) Onthwe katuhande okuyambula otyipuka otyo ovanthu ovo vasoka. Mahi opo twehetyiyambule, tuna okupameka onthumbi yetu. Pahe matupopi ovipuka vitatu tuna okulinga, tupameke onthumbi yetu.
SOKA KOTYILIKUTILA TYEYOVO
8-9. Okusoka kotyilikutila tyeyovo tyikalesa ñgeni onthumbi yetu?
8 Otyipuka tyimwe tuna okulinga matyipameka umwe onthumbi yetu, okusoka kotyilikutila tyeyovo, mokonda otyo tyituyumbisa-ko onthumbi okuti ovipuka Huku apopia mavilingwa umwe. Ine tusoka umwe nawa oityi kwekeila otyilikutila tyeyovo, neetyi Huku alinga otyilikutila otyo tyilingwe, matuyumbu-ko umwe vali onthumbi okuti etyi Huku apanga tyokuketwavela omwenyo wahapu mouye omupe mukahi vali nawa, matyikalinga otyili. Oityi tupopila ngootyo?
9 Oityi Siovaa alinga opo otyilikutila tyeyovo tyilingwe? Siovaa watumine Omona wae wotyiveli ehole unene, epanga liae enene, emupolo keulu, eya atyitwa pano pohi, akala omunthu wehena onkhali. Pweetyi Sesusi ali pano pohi wakondyele novitateka ovinyingi. Wamwene ononkhumbi, aipawa onya. Otyipuka otyo Siovaa afeta otyinene! Huku yetu wolwembia, hapala-le ankho ayeke omona wae amone ononkhumbi ngoombo, aipawa, pala vala tukale-ko nehambu mahi otyo tuna vala omwenyo omusupi. (Suau 3:16; 1 Pet. 1:18, 19) Mokonda Siovaa welipolele umwe Omona wae ehole opo etuyovole, tutyii umwe okuti meketwavela omwenyo wahapu mouye omupe.
SOKA KONONKHONO ONONENE MBA SIOVAA
10. Omu mutyipopila Ova Efesu 3:20 oityi Siovaa evila okulinga?
10 Otyipuka tya vali tyipameka onthumbi yetu, okusoka kononkhono ononene Siovaa ena-mbo. Ngwe utyivila umwe okulinga ovipuka aviho apanga. Otyili, okusoka umwe okuti etyi Siovaa apanga tyokuketwavela omwenyo wahapu mouye omupe meketyilinga umwe, momutwe wovanthu ovanyingi katyifumo-ale. Mahi Siovaa wapanga-panga-le ovipuka ovanthu vehevili-ale. Natyo omo umwe, ngwe uvila atyiho. (Jó 42:2; Malu. 10:27) Otyo tyehetuvisila tyina etupopila okuti makalinga ovipuka vimwe onthwe twehevili-ale. —Tanga Ova Efesu 3:20.
11. Popia-po otyipuka tyimwe otyinene Huku atile matyilingwa. (Tala okakasa kati: “ Ovipuka Vimwe Ovinene Huku Apopile Avilingwa Umwe.”)
11 Nkhele tala ovipuka vimwe Siovaa apopilile ovanthu vae atile mevilingi, mahi tyina uvitala ñgaa ngoti ankho kavivilwa-le. Wapopilile oo Ambalayau na Sala ati mavamono omona ngwe ankho vakulupa-le. (Gên. 17:15-17) Tupu wapopilile Ambalayau okuti, ava vakatuka mwe mevepe otyilongo tyo Kanaa. Vokwatukile mu Ambalayau, ova Isilayeli, vakalele omanima omanyingi moupika ko Isitu. Tyina utyitala ñgaa, ngoti otyo tyapopile Huku ankho kamatyilingi-ale otyili. Mahi tyalingile umwe otyili. Konyima oku, Siovaa wapopilile omukulukai Elisambete ati mamono omona. Apopila vali omuhikwena utiwa Maliya, omunthu ankho nkhele wehei-ale omukwendye, ati makutula omona, mahi Omona watyo oo owa Siovaa. Otyo ngootyo pahe ankho tyili nokweendela omu Siovaa etyipopilile-ale komanima okohale, motyitaka tyo Endene. — Gên. 3:15.
12. Tutyimona okuti Siovaa utyivila okulinga-tyi tyina tutala etyi tyapopia Josué 23:14; Isaías 55:10, 11?
12 Onthwe tuyumba-ko vali onthumbi ku Siovaa okuti utyivila umwe okweeta-ko ouye omupe, tyina tusoka umwe nawa kovipuka apopaile, evilingi. (Tanga Josué 23:14; Isaías 55:10, 11.) Otyo tyitukwatesako umwe atutyivili okukwatesako vakwetu navo vetyimone okuti tyokuti makuya ouye omupe, hanondyoi-ko, hatyikembo-ko. Mwene Siovaa yatyo, pokwapopia eulu epe nohi omphe wati: “Onondaka ombu mbuyumbwa onthumbi iya ombotyotyili.” — Ehol. 21:1, 5.
LIPAKA MWEEVI VIPAMEKA OUPANGA WENYI NA HUKU
OMALIONGIYO
Oityi tutila okulipaka movipuka ovio vipameka oupanga wetu na Siovaa tupu tyipameka onthumbi yetu? (Tala opalangalafu 13)
13. Oityi tutila omaliongiyo apameka onthumbi yetu? Hangununa.
13 Otyipuka tya tatu tuna okulinga tyipameka onthumbi yetu, okulipaka mweevi vipameka onthumbi yetu. Nkhele soka vala koviwa tukopa momaliongiyo etu. Umwe utiwa o Ana waundapa omanima omanyingi movilinga viomuvo auho, wati: “Omaliongiyo apameka onthumbi yange mu Huku. Na tyina umwe pamwe ou uli nokulinga elongomona, hamunongo-ko unene kokulongesa, tupu pamwe ovipuka eli nokupopia ovipuka ndyii-ale, mahi no ngootyo vinkhwatesako andyinoñgonoka vali nawa otyili ty’Ombimbiliya, nonthumbi yange aipame.” b Otyipuka otyikwavo tyipameka umwe onthumbi yetu, okwiiva vakwetu tyina vaava omakumbululo momaliongiyo. — Loma 1:11, 12; 10:17.
OVILINGA VIOKWIVISA
Oityi tutila okulipaka movipuka ovio vipameka oupanga wetu na Siovaa tupu tyipameka onthumbi yetu? (Tala opalangalafu 14)
14. Oityi tutila ovilinga viokwivisa vipameka onthumbi yetu?
14 Otyipuka otyikwavo tyipameka onthumbi yetu, okulipaka movilinga viokwivisa. (Heb. 10:23) Umwe utiwa o Barbara waundapela-le Siovaa omanima alamba 70, wati: “Ame netyimona okuti apeho ovilinga viokwivisa vipameka onthumbi yange. Tyina ndyipopila vakwetu ovipuka oviwa Siovaa makalinga, naame ndyipamekela-po vali onthumbi yange mwe.”
OKULILONGESA MWENE AWIKE
Oityi tutila okulipaka movipuka ovio vipameka oupanga wetu na Siovaa tupu tyipameka onthumbi yetu? (Tala opalangalafu 15)
15. Oityi tutila okulilongesa mwene awike Ombimbiliya tyipameka onthumbi mu Huku? (Tala olutalatu.)
15 Otyipuka otyikwavo tyipameka onthumbi yetu, okulilongesa mwene awike ondaka ya Huku. Umwe utiwa o Susana, wati tyimukwatesako, okukala umwe nomphango yatyo yokuti onthiki ei ndyilinga etyi onthiki ei ndyilinga etyi. Wati: “Tyalumingu, ndyililongesa onthele y’Omutala Womulavi matukelilongesa mo Tyalumingu otyikwavo. Motyasikunda no Muvali, ndyililongesa etyi matulilongesa meliongiyo lyo mokati kosimanu. Mononthiki ononkhwavo, andyililongesa ovipuka ovikwavo mwene pahe napanga.” Mokonda Susana una umwe apa etyihoneka etyi alinga, tyili umwe nokupameka onthumbi yae mu Huku. Umwe utiwa o Irene waundapa-le omanima omanyingi mombala Yonombangi, wetyimona okuti tyimwe tyipameka onthumbi mu Huku, okulilongesa umwe nawa evi Siovaa atile mavimoneka. Wati: “Tyinthyuvisa unene tyina namatale okuti ovipuka viatyo aviho Siovaa apopia, vieendela umwe omu evipopila, natyike tyikamba-po.” c
“MATYILINGWA UMWE”
16. Oityi tutila onondaka Siovaa apopilile Hambakuke noonthwe hono mbuna etyi mbutulongesa? (Ova Hebeleu 10:36, 37)
16 Ovanthu ovanyingi va Siovaa, veli-ale nokukevelela onthyulilo youye uno omanima omanyingi. Onthwe pahe ñgaa tupondola okusoka okuti, etyi Huku apopia ati metyilingi, tyili nokuseta keya nokutyilinga liwa. Mahi Siovaa utyii-ale oñgeni otyo tyikalesa ovanthu vae. Wapopilile omuuli Hambakuke ati: “Emonekelo nkhele likevela omuvo wanakwa, litwalako okwenda aloo konthyulilo, kamalikembe. Namphila liseta, twalako nokukevelela kulio. Mokonda matyilingwa umwe. Kamatyisete.” (Hab. 2:3) Okuti onondaka ombo, Huku wembupopile umwe vala mbukwateseko Hambakuke ine noonthwe hono mbuna etyi mbutulongesa? Omu apositolu Paulu wafiminwa na Huku, apopi onondaka ombo pokuhonekela Ovakilisitau vakevelela ouye omupe. (Tanga Ova Hebeleu 10:36, 37.) Naina, na tyina umwe oviwa tukevela vili momphango ya Huku vilinga ngoti viaseta, onthwe tuyumba-ko umwe onthumbi, mokonda “matyilingwa umwe. Kamatyisete!”
17. Oñgeni Louise eli umwe nokulandula etyi Siovaa apopilile omuuli Hambakuke?
17 Ovanthu ovanyingi va Siovaa, veli umwe nokulandula etyi Siovaa apopilile omuuli Hambakuke tyokutwalako vala nokukevelela, veli umwe nokukevelela omanima nomanima. Umwe utiwa o Louise wahimbika-le okuundapela Siovaa menima 1939, wati: “Kohale, natile hamwe o Alumangendom maiya tyina nkhele ankho nehenemane okulongeswa mosikola onene. Mahi hatyo-ko tyaenda. Mokweenda kwomanima netyimona okuti, otyiwa okutanga etyi tyalingaile ovanthu vamwe vapopiwa m’Ombimbiliya vapopililwe ovipuka vimwe na Siovaa avakevelela ehimbwe, mahi etyi vapopililwe atyiya umwe. Vamwe pwoovo, oo Noe, na Ambalayau, na Susee. Okuyumba-ko umwe onthumbi okuti evi Siovaa apopia mevilingi umwe, tyili nokunkhwatesako, tupu tyili nokukwatesako vakwetu okutavela umwe okuti ouye omupe mauya uli popepi.” Ovanyingi veli-ale nokulingila Siovaa omanima omanyingi, navo otyipuka otyo vetyitavela.
18. Oityi tutila ine tusoka umwe nawa kovipuka Huku atunga, matuyumbu-ko vali onthumbi okuti ouye omupe mauya?
18 Otyili, ouye omupe nkhele kauneye. Mahi nkhele tala vala ovipuka vimwe vili-ale kouye tumona, ononthungululu, nomiti, novinyama, novanthu vakwetu. Ovipuka ovio, nawike-ale utyaanya okuti tyili okovili, ngwe kwali umwe omuvo umwe ovipuka ovio ankho kouye viehe-ko. Viekeya-ko tupu, o Siovaa wevitunga. (Gên. 1:1, 26, 27) Huku yetu una omphango yokweeta-ko ouye omupe. Metyilingi umwe otyo apanga. Mouye omupe ovanthu mavakakala-ko apeho, nekongoko likahi nawa. Momuvo mwene Huku anaka, ouye omupe mauya umwe, matukati umwe ñgaa tuli mouye omupe, ngeetyi hono tuli-ale mokati kovipuka ovinyingi Huku atunga. — Isa. 65:17; Ehol. 21:3, 4.
19. Oityi una okulinga upameke onthumbi yove mu Huku?
19 Nkhele mokuli nokukevela ouye omupe, onomphitilo mbatyo ambuho umona mbokupameka onthumbi yove, mbehekulambe. Apeho pandula otyilikutila tyeyovo. Soka kononkhono ononene Siovaa ena-mbo. Lipaka mweevi vipameka oupanga wenyi na Huku. Ine otyo ulinga otyo, noove mokala puvana “vatambula etyi Huku apopia mokonda yekolelo noumphua-lundo.” — Heb. 6:11, 12; Loma 5:5.
OTYIIMBO 139 Lisokela Mouye Omupe
a Ovanyingi hono kavetavela etyi Ombimbiliya yapopia okuti makuya ouye omupe, ngwe vasoka okuti otyo onondyoi vala, hatyiliko-ale, vati otyipuka otyiwa ngootyo wati tyilinga-le otyili. Mahi onthwe tuyumba-ko umwe onthumbi, tutyii okuti atyiho Siovaa apanga metyilingi. Namphila tuyumba-ko-ale onthumbi, mahi tuna okupameka apeho onthumbi yetu. Oñgeni matutyilingi? Onthele ei maityipopi.
b Omanyina amwe apilululwa.
c Ononthele ononyingi mbupopia etyi Siovaa atile matyimoneka, mbuli apa pokwati “Omaulo” m’Omukanda Wokuovolola wo Nombangi mba Jeova. Tupu tala onthele yati: “Yumba Onthumbi mu Jeova Huku “Yononthiki Nomivo,” m’Omutala Womulavi 1 ya Kapepo yo 2012.
