Ankho tulityilika okukala novanthu vomuhoko umwe tuyele, matukala vali unene nokapungulula. Tupu ankho tukala vala omapanga ovanthu vekahi ngo onthue, matuhimbika okusoka okuti, evi tusoka ne evi tulinga ovio vala viaviuka.

“Ikulei omitima vienyi.” — 2 KOLINDU 6:13.

Otyo tyitulongesa-tyi? Motesitu oyo, ondaka “omutima” ipopia omalusoko etu, novipuka tuhole. Ine tuhumba vala ovanthu vekahi ngo onthue, omutima wetu maukala ngatyina wapatwa, ngatyina waikwa. Opo tuhakale notyitateka otyo, tuna okukala omapanga ovanthu aveho, atee umwe vana velikalela no onthue.

Ine tunoñgonoka nawa onontheto mba vakuetu, matunoñgonoka omokonda yatyi vasokela monkhalelo yelikalela. Tyina tukala vali unene omapanga avo, matunoñgonoka okuti naina tukahi vala otyipuka tyike. Matuhimbika okuvehumba vali, iya evi vivehambukiswa no onthue mavituhambukiswa, evi vivenumanesa no onthue avitunumanesa.

Tala ongeleka ya Nazaré. Ovanthu vokuilukila motyilongo tyavo ankho kevehande. Nazaré wapopia etyi tyemukuatesako, wati: “Andyiovola omuvo wokukala navo, nokuundapa navo. Andyinoñgonoka ovanthu velikalela unene netyi ankho ndyiiva. Tyina ukala epanga liovanthu vomihoko vielikalaila, uvenoñgonoka vali nawa, ovehumbu.”

Ovola okuhipulula novanthu vovilongo ovikuavo, vomihoko omikuavo, vomalaka omakuavo.

• Upondola okuvepula evi valinga komaumbo avo.

• Veihana muye okulia navo.

• Tehelela nawa tyina vekuhipululila-po evi valinga, opo unoñgonoke etyi vesuka vali natyo.

Ine wovola okunoñgonoka ovitateka vakalaile navio, motyivili okunoñgonoka omokonda yatyi vakalela ngetyi vekahi. Otyo matyikukwatesako okuhumba ovanthu aveho vomuhoko oo.