YAPOLWA MOMIKANDA VIETU VIAPAKWA NAWA

Tyapamekele Ekolelo Tyatuula Omanima 100

“Tyina umutala uti umwe hamwe Omukuatate Russell yatyo!”—Mbapopiwa nomulume watalele o “Fotodrama” mo 1914.

MENIMA lino, osinema imwe ankho itiwa “Fotodrama da Criação” yalingilwe pala okupameka ekolelo liokuti Ombimbiliya Ondaka ya Huku, ituukisa omanima 100. O “Fotodrama” yakuatesileko ovanthu okutavela okuti o Jeova vala watunga ovipuka oviho, namphila ondongeso yokuti ovipuka vieyako vala avike, nomalongeso omakuavo ankho ekahi nokunyona ekolelo liovanthu ovanyingi.

Charles T. Russell, ankho ukahi komutwe Wovalilongesi Vombimbiliya, apeho ankho wovola liwa ononkhalelo mbaviuka mbokuyandyanesa otyili Tyombimbiliya. Ovalilongesi Vombimbiliya ankho vekahiale nokuundapesa omikanda omanima alamba po 30. Pahe ankho vavasa onkhalelo onkhuavo yokutyilinga—onosinema.

OKUUNDAPESA ONOSINEMA PALA OKUIVISA

Onosinema mbahimbika okulekeswa kovanthu mo 1890. Konthyimbi yo 1903 ongeleya Batista, yalekesa osinema yongeleya yavo Mepundaumbo lio Nova York. Etyi Russell ahimbika okupongiya o “Fotodrama,” mo 1912, onondyuo mbokulingila onosinema ankho nkhele mbukahi nokuhimbika. Waimbukile okuti okuivisa vala nomikanda kamavetyivili okukuatesako ovanthu ovanyingi okutehelela otyili Tyombimbiliya. Moluotyo aundapesa osinema.

O “Fotodrama” ankho ikala ono ola etyinana, ankho pamwe ilekeswa mononthele ononkhuana, ankho mbulekesa omalongomona Ombimbiliya 96 ankho apopiwa nomulongomoni una ondaka iiwe nawa pomuvo opo. Ononthele ononyingi ankho mbukuamwa noviimbo. Omukuatate umwe ankho walongesua nawa, uhika nokuimba tyina pamoneka omalutalatu aunda nawa, nokuwaneka nawa onondaka nakese tyipuka tyimoneka mosinema oyo ankho yankhimana ipopia konthele yomahipululo Ombimbiliya.

Omalutalatu amwe akutikinyua mosinema oyo, atundile monondyuo mbokulingila onosinema. Ovanongo voko Filadelfia, Nova York, Paris, no voko Londres ankho valomba omalutalatu pala onosinema. Ovakuatate vamwe Moseketa Yokulinga Omalutalatu mo Mbetele, tupu vaundapele unene pala okulomba  omalutalatu, iya ovikando ovinyingi ankho vapingiyapo omakuavo ahanyauka. Tupu, pala okuvatela onosinema ombo, ovakuatate mombunga yo Mbetele ankho vakangalavalelua popepi nepundaumbo litiwa Yonkers, mo New York, opo valinge onthele ya Abraiau, no ya Isake, no yoandyu yatyilikile Abraiau okuipaa omona wae opo emuave ngotyilikutila.—Gên. 22:9-12.

Ovakuatate ankho vaundapa Nomukuatate Russell vapopile okuti osinema ei “maikuatesako vali ovanthu ovanyingi okusuka Novihonekwa, tyipona etyi onongeleya mbalingile kohale.” Okuti ononkhalamutwe mbonongeleya mbapandele ononkhono ombo mbalingwa pala okukuatesako ovanthu ankho vahanda okunoñgonoka Huku? Au, kambetyipandele. Ononkhalamutwe mbonongeleya ankho vapopia omapita konthele yo “Fotodrama” oyo, opo ovanthu veheitale. Pomphangu imwe, ononkhalamutwe mbumwe ambunyimi olusi.

Mahi, ovanthu veyulile mondyuo ankho mutalelwa osinema opo vakatale otyali osinema yo “Fotodrama.” Ko Estados Unidos, kese nthiki o “Fotodrama” ankho italwa momapundaumbo 80. Ovanyingi vahuvile, mokonda otyikando tyotete vamona ‘osinema ilekesa ovanthu vapopia.’ Putyina osinema ikahi nokulekeswa, ankho vamona ovipuka oviwa unene, oviilona vitotolwa, no nonthemo mbuhimbika okutema. Ankho ilekesa ovipuka vikuatesako okunoñgonoka ounongo uhuvisa wa Jeova. Ngetyi tyapopiwa konthyimbi, etyi omulume umwe atala Omukuatate Russell upopia onondaka mbokuhimbika o “Fotodrama,” wapopile okuti, tyina apopia “uti umwe hamwe Omukuatate Russell yatyo.”

ONDONGESO IMWE YOMBIMBILIYA YAHALIMBUILWE

Omuhipululi nomuhoneki wo nosinema utiwa Tim Dirks, wapopile konthele yo “Fotodrama” okuti, “osinema yotete onene ankho ilekesa ovanthu vapopia, nomalutalatu alombwa nawa.” Onosinema mbalingilwe konyima yo “Fotodrama” kambelifuile movipuka aviho ankho vilekeswa, haunene mbuna mbupopia konthele Yombimbiliya. Tupu, petupu osinema yatalelwe vali unene tyipona o “Fotodrama.” Mokueenda vala kuenima liotete, ovanthu ovanyingi vehungi po nomiliau etyive mo América do Norte, Europa, Austrália, nomo Nova Zelândia vatalele o “Fotodrama!”

O “Fotodrama” yatalelwe otyikando tyotete mo 11 ya Kupupu yo 1914, Mepundaumbo lio Nova York. Etyi palamba onohanyi epanduvali Ovita Viotete Viouye Auho avihimbika. Mahi ovanthu ovanyingi mouye auho vatuaileko okuliongiya opo vatale o “Fotodrama,” iya ankho vapamekwa nononthele mbulekesuamo mbupopia ononkhano onongwa mambuetua Nouhamba wa Huku. Menima lio 1914 petupu otyipuka natyike upondola okueleka no “Fotodrama,” tyotyili, osinema imwe ovanthu vahalimbuilwe.

 [Okakasa pefo 32]

Etyi enima lio 1914 ankho likahi nokuhikapo, Eongano Liovalilongesi Vombimbiliya Mouye Auho ankho velionganeka opo valinge ononkhono mbokuava oumbangi mouye auho. Opo vetyivile, valinga o “Fotodrama da Criação.” Otyo ankho tyakutikinya omuvo omunyingi, nononkhono, nonombongo

[Onondaka mbavilapo pefo 32]

“Osinema oyo ankho ina omalutalatu alekesa ovipuka aviho viatungwa okupolelela kononthungululu alo Moutumini wa Kristu Womanima Ovityita Ekwi.”—F. Stuart Barnes, mo 1914 ankho una omanima 14