AME na Evelyn Trabert tuapita Mosikola Yombimbiliya yo Gileade mo 1945. Pomuvo opo, Osikola yo Gileade ankho ilingilwa mepundaumbo litiwa Ithaca mo Nova York. Atutumwa okukaundapa ngo nomisionaliu mo El Salvador, atuundapa nae omanima ehungi po 29. Tyina nkhele nehenepopie konthele yovilinga vioumisionaliu, mandyipopi omokonda yatyi naholovonena ovilinga ovio.

Natyitwa mo 1923 mo Spokane, Washington, mo Estados Unidos. Tate, utiwa o John me o Eva Olson. Ankho ovongeleya ya Lutero, mahi ankho kavetavela kondongeso yokuti onondingavivi vayokwa mo ifelunu yotupia. Ankho kavetavela okuti Huku woluembia umonesa ovanthu ononkhumbi. (1 João 4:8) Tate ankho uundapa mondyuo imwe mulingwa onombolu. Onthiki imwe kongulohi, umwe puava aundapa navo, emupopila okuti Ombimbiliya kaipopi okuti Huku makamonesa ovanthu ononkhumbi mo ifelunu. Pakala vala katutu, ovo tate avahimbika okulilongesa Ombimbiliya no Nombangi mba Jeova. Avanoñgonoka etyi Ombimbiliya tyili ilongesa konthele yovanthu tyina vamankhi.

Pomuvo opo, ankho ndyina omanima etyive. Mahi, ndyihinangela ehambu ovo tate vakalele nalio mokonda yovipuka ankho vekahi nokulilongesa. Vahambukilwe unene etyi vanoñgonoka okuti enyina lia Huku o Jeova, netyi vanoñgonoka okuti Ombimbiliya kaipopi Outatu Ukola. (João 8:32) Ovo tate, tupu vandongesile otyili ankho vekahi  nokulongeswa, iya ame andyityikuatepo. Hinesoke okuti okutanga Ombimbiliya tyilovolesa. Okulilongesa Ondaka ya Huku ankho tyinthyambukiswa. Namphila ankho ndyina ohonyi, mahi ankho ndyenda novo tate movilinga viokuivisa. Mo 1934, avambatisalwa, iya ame andyimbatisalwa mo 1939, etyi natuula omanima 16.

Mu Kakwenye yo 1940, ovo tate avalandesa eumbo liavo, availukila mepundaumbo litiwa Coeur d’Alene, Idaho ko América. Atuhimbika atuho ovilinga vioukokoli-ndyila. Ankho tukala mondyuo imwe tufetela, iya mombuelo mupangiyilwa omatuku-tuku. Tupu ankho tulingila omaliongiyo mondyuo yetu. Pomuvo opo, omawaneno ankho ena Onondyuo mbo Maliongiyo kaehi. Omaliongiyo omanyingi ankho alingilwa monondyuo mbokufetelwa ine o mbovakuatate no nomphange.

Mo 1941, ame novo tate atuende motyonge tyalingililwe ko Saint Louis, Missouri mo Estados Unidos. Onthiki yahulilako yotyonge otyo, yaihanenwe okuti “Onthiki Yovana.” Monthiki omo, ovana vena omanima 5 alo 18 vaihanenwe opo vapumphame komutwe. Tyina omukuatate Joseph F. Rutherford ehungi kokumanuhula elongomona liae, etupopila atuho ovana vatyo okuti, inkha “mutavela ku Huku no Kohamba yae” katukei. Atuho atukatuka. Omukuatate Rutherford apopi okuti: “Talei, onombangi ovape Vouhamba valamba po 15.000!” Pomuvo opo, andyitokola okuti nahanda okukala omukokoli-ndyila omuenyo wange auho.

Etyi palamba onohanyi mbumwe etyi otyonge tyalamba, ombunga yetu aiilukila kepundaumbo litiwa Oxnard mo Califórnia. Atuhimbika ewaneno potyilongo opo. Ankho tukala mondyuo imwe onthutu muna vala oula wike. Ankho ndyilala komesa. Keumbo lietu ankho ndyina okualutu yange muene!

Mu 7 ya Kayovo yo 1941, o Japão ailwisa epundaumbo lio Pearl Harbor mo Havaí, onthiki onkhuavo o Estados Unidos nayo ailipake movilwa viavali viouye auho. Konyima yovilwa ovio, opo tuehika mo Califórnia. Pomuvo opo, omafualali oko Japão okueenda no nowato, ankho ekahi popepi, moluotyo, ovatumini vapopilile ovanthu aveho vakala konthele yelunga opo vanyime omalusi avo kounthiki. Mokonda yenthiki, omafualali oo kaetyivilile okulwisa otyilongo.

Palamba vala onohanyi mbehehi, mu Tungonkhe yo 1942, atuende Kotyonge (Assembléia Teocrática do Novo Mundo) mo Cleveland, Ohio. Haunene ndyihinangela elongomona lialingilwe nomukuatate Nathan H. Knorr, ankho lina osapi yati, “Ombembwa Ipondola Okutualako?” Melongomona omo, wapopile eulo likahi mu Revelação okapitulu 17, lipopia konthele “yenyama” “lialiko, mahi pahe kaliko, iya malitundu mokaleya.” (Revelação 17:8, 11) Omukuatate Knorr wahangununine okuti “enyama” olio, ankho eongano litiwa Liga das Nações liayekelepo okuundapa mokueenda kuovilwa. Konyima, apopi okuti eongano liokueta ombembwa ouye auho maliyako vali, iya akukala vali ombembwa. Ngatyo umwe tyimoneka mo 1945, etyi ovilwa viavali viouye auho viapwa, o Nações Unidas aipingi po Liga das Nações. Tunde pomuvo opo, Onombangi mba Jeova avahimbika okuivisa onondaka onongwa movilongo ovinyingi kombanda yohi. Tunde opo, tukahi nokuliyawisa unene!

Eulo olio, liankhuatesileko okunoñgonoka okuti kuna ovilinga ovinyingi pala okulinga. Ngotyo, etyi tyapopiwa okuti Osikola yo Gileade maihimbika menima liyako, andyikala nehando liokuenda mosikola omo opo ndyikale omisionaliu. Putyina osikola yehenehimbike, mo 1943 andyikala omukokoli-ndyila  kotyilongo tyitiwa Portland, Oregon. Pomuvo opo, ankho tuenda pomaumbo ovanthu, atuundapesa o fonógrafo (otyipuka tyimwe tyikahi ngekanutu) opo tuhikise omalongomona otyo vatehelela, nokuveavela omikanda viapolwa Mombimbiliya vipopia konthele Youhamba wa Huku. Omanima oo aeho, ankho ndyisoka vala konthele yovilinga vioumisionaliu.

Mo 1944, ame nepanga liange Evelyn Trabert, atuihanwa opo tuende Kosikola yo Gileade. Nahambukilwe unene mokonda tuatavelwa! Monohanyi ononthano, ovalongesi vetulekesile oñgeni tuna okulilongesa Ombimbiliya monkhalelo ihambukiswa. Atuhuvu unene okutala okuti ovalongesi vetu veliola unene omutima. Mongeleka, pamwe ankho ovo vaava ovikulia. Tuamanuhula Osikola yo Gileade monthiki 22 ya Kupupu yo 1945.

Ame na Evelyn, na Leo, na Esther Mahan, tuehikile mo Santa Ana, El Salvador mu Pepo Linene yo 1946. Kotyilongo oko, epia ankho “liayela pala okuteya.” (João 4:35) Etyi tuehika, palamba vala onohanyi mbehehi, atulingi otyonge tyotete tyononthiki onombali mo Santa Ana. Atukongo ovanthu opo veye kotyonge, iya atuhambukwa unene etyi kueya ovanthu vehungi po 500. Ovilinga vietu viokuivisa vianumanesile ononkhalamutwe mbonongeleya. Etyi palamba osimanu, avaonganeka ovanthu ovanyingi opo vetulwise ngetyi napopiale konthyimbi. Ankho vahanda tukale nowoma opo tutundemo. Mahi otyo tyetupameka vali opo tuhatundemo, na tukuateseko ovanthu. Ononkhalamutwe mbonongeleya ankho vevepopila opo vahatange Ombimbiliya, iya ankho kavehi vena onombongo pala okulanda Ombimbiliya. Mahi, ovanyingi ankho vahanda okunoñgonoka otyili. Vahambukilwe unene etyi tuelilongesa o Espanhol opo tutyivile okuvelongesa konthele ya Jeova, nomulao wae wokulinga ohi omphangu yombembua.

Umwe puava nahimbika okulongesa Ombimbiliya, o Rosa Ascencio. Ankho wanepua, mahi kavelihonekesile kukaputu. Mahi etyi ahimbika okulilongesa Ombimbiliya, ayekepo omulume wae. Omulume oo, nae ahimbika okulilongesa Ombimbiliya. Avelihonekesa kukaputu, avambatisalwa, iya avakala Onombangi vena ombili. O Rosa watetekela okukala omukokoli-ndyila mo Santa Ana. b​—Tala pokatoi.

Rosa ankho una ovenda. Apeho ankho tyina aya movilinga viokuivisa, wika ovenda yae, iya ankho una onthumbi yokuti Jeova memukuatesako muatyiho esukisa. Rosa apeho ankho una ovanthu vemulanda. Wetyimuene okuti Jeova ankho ukahi nokumukuatesako, ngetyi tyapopiwa mu Mateus 6:33. Rosa wakalele nekolelo mu Jeova alo ankhia.

Ankho tunomisionaliu epandu, iya ankho tukala mondyuo imwe tufetela yomuhona umwe wiiwe unene potyilongo. Onthiki imwe, elombe aliya okutalelapo omulume oo, alimulondola okuti inkha utualako okutuyeka tukale mondyuo yae, omulume oo nomukai wae mavataatwa mokapela. Omulume  oo ahatili owoma elombe, iya apopila elombe okuti inkha utaatwa mokapela kesukile. Omulume oo ankho wanumanale mokonda yovipuka vimwe ononkhalamutwe mbonongeleya mbulinga. Etupopila okuti tupondola okukala mondyuo yae omuvo tuhanda.

Mepundaumbo enene lio San Salvador, omisionaliu omukuavo, ankho ulongesa omukai womulume umwe wankhimana unene utiwa Baltasar Perla. Omulume oo ankho utupu vali ekolelo mu Huku, mokonda wamuene ononkhalamutwe ononyingi mbonongeleya valinga ovipuka ovivi. Mahi ankho omulume umwe una oluembia unene. Namphila ankho nkhele Hambangi ko, weliavele opo akakuateseko okutunga Ombetele yomo El Salvador, iya kafetesile Onombangi mokonda yetyi alinga.

Pokutunga Ombetele, Baltasar waundapele Nonombangi ononyingi, iya akala nonthumbi yokuti wavasa ongeleya yotyotyili. Baltasar wambatisalua monthiki 22 ya Kakwenye yo 1955, iya apakala vala katutu omukai wae Paulina, nae ambatisalwa. Ovana vavo vevali navo vekahi nokuumbila Jeova nekolelo. Omona wavo, Baltasar Junior, ukahi nokuundapa mo Mbetele yoko Nova York omanima 49. Ukahi nokukuatesako ovilinga viokuivisa ouye auho, iya o umwe povakulu Vokomisau Yofiliyale mo Estados Unidos. c​—Tala pokatoi.

Etyi tuehimbika okulinga ovionge mo San Salvador, omukuatate Perla etukuatesako opo tuliongiyile mondyuo imwe onene. Otyikando tyotete tueliongiyilamo, ankho katuhi. Mahi, ovanthu avahimbika okuliyawisa kese enima, pahe ankho katufumo vali. Ankho tutyeete okuti Jeova ukahi nokuyamba ononkhono mbetu. Povionge ovio, namuenepo vana nalongesile Ombimbiliya. Iya nahambukilwe unene etyi namona ava valongeswa Ombimbiliya naava nalongesile Ombimbiliya vambatisalwa! Ovape ovo, ankho ndyivetala ngatyina ovatekula vange.

Motyonge tyimwe, omukuatate umwe eya puame, ati uhanda okundyita otyiponyo. Ankho hityii etyi ahanda okupopia, iya ankho hemuimbukile. Omukuatate oo ati: “Ame umwe povakuendye vana ankho vemuyumbile nomamanya ko Santa Ana.”  Andyihambukwa unene etyi nanoñgonoka okuti pahe nae ukahi nokuumbila Jeova. Etompho olio, lianthyinangelesile okuti ovilinga viomuvo auho vihambukiswa unene.

Natualako novilinga vioumisionaliu mo El Salvador momanima ehungi po 29. Naundapele mepundaumbo lio Santa Ana, nomo Sonsonate, nomo Santa Tecla, iya konyima andyikaundapa ko San Salvador. Mokueenda kuomanima oo, ovo tate avakulupa iya ankho pahe vesukisa okukuatesuako. Ngotyo andyilikuambela unene, iya mo 1975 andyiyekepo ovilinga viange vioumisionaliu, andyikondoka ko Spokane.

Tate wanyima mo 1979, andyitualako okutekula me omanima etyinana. Ankho ndyimulingilako ovipuka aviho mokonda ankho utupu vali ononkhono. Etyi anyima ankho una omanima 94. Ankho omuvo umwe wepuiya pala ame mokonda hanepelwe, iya ankho ndyitupu vali ononkhono. Mahi Jeova wankhuatesileko unene. Wakumbululile omalikuambelo ange, iya ankhuatesako okukoleleya momuvo oo wepuiya. Jeova ukahi nokufuisapo omulao wae wokunthekula alo umwe tyina nakulupa.​—Isaías 46:4.

Mo 1990, andyiilukila kepundaumbo litiwa Omak, mo Washington. Ko Omak ankho ndyiivisa motelitoliu muna ovanthu vapopia o Espanhol, iya otyo atyintyambukiswa vali. Ovanyingi puava nalongesa Ombimbiliya, vambatisalwa. Eumbo liange ko Omak ankho enene, iya ankho ndyitupu vali ononkhono mbokulinga ovilinga viomeumbo. Ngotyo, mu Kuhuhu yo 2007, nailukila mondyuo imwe onthutu, popepi nepundaumbo litiwa Chelan, mo Washington. Ovakuatate vewaneno lio Espanhol vanthekula nawa, iya ndyipandula unene. Mokonda ame vala omukulukai mewaneno olio, venthyole unene ngatyina ndyi ina kulu yavo.

Naholovona okuhanepwa, opo ndyityivile okuundapela vali unene Jeova. (1 Coríntios 7:34, 35) Ndyityii okuti mouye uno hipondola okukala novipuka aviho. Ngotyo andyiholovona okulinga etyi tyakolela vali, okuundapela Jeova nomutima wange auho. Nakuatesako ovanthu ovanyingi okulilongesa otyili, iya avakala ngatyina ovana vange. Mouye omupe, mandyikakala nomuvo wokulinga ovipuka aviho ankho nahanda okulinga. O testu ndyihole vali o Salmo 145:16, omu Jeova alaa okuti “makahambukiswa ovipuka aviho viokuna omuenyo.”

Pahe ndyina omanima 91 iya nkhele ekongoko liange likahi nawa, ngotyo nkhele ndyitualako novilinga vioukokoli-ndyila. Ovilinga vioukokoli-ndyila viankhuatesako okukala tyapama, iya viampha ekevelelo. Puetyi tete nehika mo El Salvador, ovilinga viokuivisa ankho viehimbika vala pahe. Mahi pahe, mo El Salvador muna ovaivisi valamba po 39.000. Ndyityii okuti Satanasi ketyivili okutalameka ovilinga vietu, namphila atualako okuhetekela okuvitalameka. Otyo tyapameka unene ekolelo liange. Tyotyili, ospilitu sandu ya Jeova ikuatesako ovanthu vae.