Ovaumbili vamwe va Huku vehenenepe ine vehenenepwe vasoka ngotyo. Vetyii okuti Jeova uhanda ovaumbili vae vanepe “vala mu Tatekulu,” okulinepa vala Novakristau votyotyili. (1 Coríntios 7:39) Iya omokonda yatyi Ovakristau vamwe vapopila ngotyo?

Ovakristau vapopia ngotyo, hamwe vasoka okuti kuna vali onomphange ononyingi vahanepelwe tyipona ovakuatate. Movilongo ovinyingi, otyo otyili. Mongeleka, ko Coreia noko Colômbia, onomphange vahanepelwe ovanyingi vali tyipona ovakuatate.

Konomphangu mbumwe, ovohe vehe Nombangi vaita ovipuka ovinyingi ine onombongo tyina ovana vavo vanepwa. Iya ovakuatate vamwe vehenenepe vetupu onombongo mbokulanda ovipuka ovio. Ngotyo, onomphange vamwe vena otyiho tyokuti hamwe kamavavasi Omukristau memunepe. *—Tala pokatoi.

Inkha nove usoka ngotyo, kala nonthumbi yokuti Jeova wii otyitateka tyove noñgeni ulitehelela.—2 Crônicas 6:29, 30.

Nongotyo, Mombimbiliya, Jeova ututuma tunepe vala mu Tatekulu. Omokonda yatyi? Omokonda wii etyi tyituetela ouwa, iya uhanda okutuyakulila. Jeova kahande tulinge omatokolo ahaviukile etuetela oluihamo ine etupola ehambu. Pononthiki mba Neemia, ova Judeu ovanyingi vanepele ovakai vahafende Huku. Otyo Neemia apopila ongeleka ombi ya Salomau. Salomau “ankho  uholwe na Huku, otyo Huku emulingila ohamba yo Isilayeli aiho. Mahi ovakai vae vahafende Huku avemulingisa onkhali.” (Neemias 13:23-26) Jeova utyii okuti etyi etupopila tyituetela ouwa, otyo atumina Ovakristau vanepe vala mu Tatekulu. (Salmo 19:7-10; Isaías 48:17, 18) Tupandula unene Jeova utuavela onondonga noluembia, mbuyumbwa onthumbi. Tyina tutavela Jeova akale Omutumini wetu, tutavela okuti oe vala una okutupopila etyi tuna okulinga.—Provérbios 1:5.

Tyotyili, katuhande okulipaka “mokanga ike” ine okulinepa nomunthu wahaumbila Jeova. Mokonda upondola okutulingisisa atuyekepo okuumbila Huku. (2 Coríntios 6:14) Onondonga mba Huku apeho mbutukuatesako, iya Ovakristau ovanyingi ovana-ndunge, vaholovona okutavela Jeova. Mahi ovakuavo hatyoko valinga.

Omphange umwe woko Austrália utiwa Maggy wehimbika okulipola konomphunga nomunthu wehe Mukristau. * (Tala pokatoi.) Maggy wati: “Ankho hiende vali komaliongiyo opo ndyikale nae. Oupanga wange na Huku autepuluka unene.” Omuhikuena omukuavo ukala ko Índia utiwa o Ratana wehimbika okulipola konomphunga nomukuendye valongeswa nae kosikola wehimbika okulilongesa Ombimbiliya. Mahi, omukuendye oo, welilongesa vala Ombimbiliya mokonda ankho uhanda Ratana. Konyima Ratana ayekepo okuumbila Jeova, elipake mongeleya yomukuendye oo opo velinepe.

Ndenguè ukala ko Camarões, ankho una omanima 19 etyi velinepa nomulume wahaumbila Jeova. Etyi nkhele vehenelinepe, omulume oo wemupopilile okuti upondola okutualako okukala Ombangi. Mahi, etyi velinepa pakala vala onosimanu onombali, omulume oo emupopila okuti kupondola vali okuenda komaliongiyo. Ndenguè wati: “Ankho ndyilila unene nokuna ounye. Ankho hityii vali etyi mandyilingi nomuenyo wange. Nelivela unene.”

Tyotyili, Ovakristau vamwe velinepa nomunthu uhaumbila Jeova mahi otyo nkhele ena oluembia nokumutekula nawa. Namphila wanepua nomunthu una oluembia wahafende Jeova, mahi oñgeni tyakalesa oupanga wove na Jeova? Oñgeni ulitehelela tyina uhinangela okuti kuetavelele elondolo Jeova ekuavela opo ukale nehambu? Iya tyakolela vali, oñgeni etyi walinga tyakalesa Jeova?—Provérbios 1:33.

Ovakuatate nonomphange ouye auho vetavela elondolo lia Jeova liokunepa “vala mu Tatekulu,” vena onthumbi yokuti okulinga ngotyo tyaviuka. Ovakuatate nonomphange vehenenepe ine vehenenepwe vahanda okuhambukiswa Jeova mokulinepa na una umufenda. Michiko ukala ko Japão ankho watokola okutavela ku Huku namphila ovohe vemukuluminya okulinepa nomunthu wahafende Jeova. Iya ankho katyapepukile okutala omapanga ae vanepwa Novakristau votyotyili ngwe otyo ahanepwa. Michiko wati: “Ankho ndyilipopila okuti mokonda Jeova o ‘Huku yehambu,’ ehambu lietu kalitei kokunepwa ine okukala tyahanepelwe. Tupu ankho ndyitavela okuti mafuisapo omahando omutima wetu. Ngotyo inkha katunevase ou matulinepe nae namphila tuhanda okunepwa, otyiwa okukevelela alo tuvasa ou matulinepe nae.” (1 Timóteo 1:11) Pahe, Michiko wanepua nomukuatate ukahi nawa, iya una ehambu mokonda walandula onondonga mba Jeova.

Tupu novakuatate vamwe vakevelela alo vavasa omphange ukahi nawa opo velinepe. Mongeleka, Bill ukala ko Austrália wapopia okuti pamwe ankho upanda ovituwa viovakai vamwe vehe Nombangi. Mahi, kalingile navo oupanga, mokonda upondola okulihanda navo iya otyo atyimutuala “kokulipaka mokanga ike” nauna wehemukristau. Momanima omanyingi, Bill ankho wahandele onomphange mbumwe, mahi ngwe ankho kavasoko ngae. Bill wakevelele omanima 30 alo avasa omukai Omukristau nae ankho uhanda okuundapa vali movilinga via Jeova. Bill wati: “Helivelele. Nayambwa mokonda tuenda atuho movilinga viokuivisa, tulilongesa atuho, nokufenda kumwe. Nahambukwa etyi nalinga oupanga  nomapanga omukai wange mokonda aveho vafenda Jeova. Tupameka otyinepo tyetu nonondonga Mbombimbiliya.”

Oityi upondola okulinga putyina uyumba onthumbi monondonga mba Jeova nokukevelela omulume ine omukai uumbila Jeova? Upondola okusoka omokonda yatyi uhekahi nokunepwa. Inkha usoka okuti omokonda uhanda okutavela otyitumino tya Jeova, upondola okukala nonthumbi yokuti ukahi nokuhambukiswa Jeova. (1 Samuel 15:22; Provérbios 27:11) Tupu tualako okulikuambela apeho ku Jeova, mupopila oñgeni ulitehelela. (Salmo 62:8) Inkha ulinga ononkhono mbokulityilika nokuanya omahando omavi, oupanga wove na Jeova mautualako okupama. Upondola okukala nonthumbi yokuti Jeova wesuka nomahando ove mokonda wakolela unene kwe. Jeova kaavela nawike omulume ine omukai. Mahi inkha tyilityili uhanda okunepa ine okunepwa, Jeova utyii etyi matyikuetela ehambu.—Salmo 145:16; Mateus 6:32.

Pamwe upondola okulitehela nga David wapopia okuti: “Nkhumbulule liwa Jeova, ononkhono mbange mbukahi nokupuamo. Uhanthyoleke otyipala tyove.” (Salmo 143:5-7, 10) Uhasoye. Yeka Jeova ekulekese etyi una okulinga. Tehelela Jeova pokutanga Ombimbiliya nokusokolola kuetyi watanga. Otyo matyikukuatesako okunoñgonoka etyii Jeova ahanda kuove iya oñgeni akuatesileko ovaumbili vae vokohale. Inkha umutehelela, matyikukuatesako okutualako okumutavela.

Oityi vali upondola okulinga opo utualeko okukala nehambu tyina uhenenepwe? Linga ovipuka vipameka oupanga wove na Jeova nokukala novituwa oviwa. Lilongesa okukala notyali, nokuundapa nombili, nokupepuka omutima, nokukala omukuatyili ku Jeova. Ovituwa ovio viesukisa opo ukale nehambu motyinepo. (Gênesis 24:16-21; Rute 1:16, 17; 2:6, 7, 11; Provérbios 31:10-27) Ovola tete Ouhamba mokueenda apeho movilinga viokuivisa, nokukuatesako ewaneno. Ovipuka ovio mavikukuatesako okulinga omatokolo aviuka. Bill wapopia omanima akala tyahanepele, okuti: “Alamba liwa! Naundapesa omuvo wange movilinga via Jeova mokukala omukokoli-ndyila.”

Otyitumino tya Jeova tyokunepa “vala mu Tatekulu” nkhele tyitualako. Okuholovona okulinepa Nomukristau wotyotyili tyihivilika Jeova, iya matyitukalesa nehambu. Ombimbiliya yati: “Omunthu wonthilo na Jeova omuna-mbembwa, uhole unene ovitumino viae. Mondyuo yae muna ovipuka viakolela nomalumono. Iya ouviuki wae utualako apeho.” (Salmo 112:1, 3) Tokola okutavela otyitumino tya Huku tyokunepa “vala mu Tatekulu.”