1. Ekolelo liasukisa mokonda yatyi? (Tala olutalatu pefo pahimbikila onthele.)

WELIPULILIALE okuti, ‘Jeova makandyovola umwe mokueenda kuononkhumbi ononene?’ Apostolu Paulu wapopia okuti otyituwa tyimwe tyakolela tuesukisa opo tukahupe, ekolelo. Paulu wati: “Tyihena ekolelo tyipuiya okuhambukiswa Huku.” (Hebreus 11:6) Tupondola okutyitala ngoti tyapepuka, mahi “havehoko ovanthu vena ekolelo.” (2 Tessalonicenses 3:2) Ono testu ombu onombali mambutukuatesako okunoñgonoka omokonda yatyi tyakolela okupameka ekolelo lietu.

2, 3. (a) Ekolelo liakolela mokonda yatyi? (b) Oityi matulilongesa pehepano?

² Apostolu Petulu wapopia konthele “yokulolwa” ekolelo. (Tanga 1 Pedro 1:7.) Ononkhumbi ononene mbukahi unene popepi, iya tuhanda okukala “nekolelo pala okuhupisa omuenyo wetu.” (Hebreus 10:39) Ngotyo, tuesukisa okulinga ononkhono mbokupameka ekolelo lietu. Tuhanda okukala pokati kavana mavakayambwa tyina Jesus Kristu, Ohamba yetu, ameya. Ngotyo, ngomulume una wahepa waitile ku Jesus ekolelo, nonthue tupondola okupopia okuti: “Nkhuateseko apa nesukisa ekolelo!” (Marcos 9:24) Ine, ngo valongwa va  Jesus, nonthue tupondola okupopia okuti: “Tuavele vali ekolelo.”—Lucas 17:5.

³ Monthele ei, matulilongesa: oñgeni tupondola okupameka ekolelo lietu, oñgeni tupondola okulekesa okuti tuna ekolelo liapama, iya omokonda yatyi tupondola okukala nonthumbi yokuti Huku metukumbulula tyina tumuita vali ekolelo.

4. Onongeleka patyi mbutulunda okupameka ekolelo lietu?

⁴ Mokonda ekolelo liesukisa unene, Jeova wetuavela onongeleka mbovanthu ovanyingi vapopiwa Mombimbiliya. Onongeleka ombo “mbahonekwa opo tulilongesileko.” (Romanos 15:4) Ongeleka ya Abraiau, noya Sara, noya Isake, noya Jako, noya Moisesi, noya Raabe, noya Gideau, noya Barake, no mbovanthu ovakuavo mbutulunda opo tupameke ekolelo lietu. (Hebreus 11:32-35) Okuyawisa konongeleka mbovanthu vokohale, tupu hono tuna onongeleka mbekolelo mbovakuatate vetu nonomphange. * (Tala pokatoi.)

5. Oñgeni Eliya alekesile okuti una ekolelo liapama mu Jeova, iya oityi tupondola okulipula?

⁵ Ongeleka imwe Yombimbiliya o yomuuli Eliya. Tyina usokolola kongeleka oyo, ovola okuimbuka ovipuka vitano alekesile okuti una ekolelo liapama mu Jeova. (1) Etyi Eliya apopila Ohamba Akabe okuti Jeova maetako omutenya, wapopile nonthumbi okuti: “Ngetyi Jeova ena omuenyo Huku yo Isilayeli una ndyuumbila, mokueenda kuomanima aa kamakukala eyombo, tupu kamakuloko ombila.” (1 Reis 17:1) (2) Eliya ankho utavela okuti Jeova memuavela etyi esukisa navakuavo mokueenda kuomutenya. (1 Reis 17:4, 5, 13, 14) (3) Eliya tupu ankho una onthumbi yokuti Jeova upondola okututilisa omona womuhepe. (1 Reis 17:21) (4) Eliya ankho utupu ondima yokuti Jeova matumu otupia opo tuyoke otyilikutila tyae Komphunda Karmelu. (1 Reis 18:24, 37) (5) Namphila ankho ombila yakalele ehimbwe otyo yahaloko, Eliya apopila Akabe nonthumbi okuti: “Enda, kalie nokunwa, kuivala omuuno wombila onene.” (1 Reis 18:41) Ngotyo, tyina tuehenelilongese ongeleka oyo, lipula okuti: ‘Ndyina ekolelo liapama ngo lia Eliya?’

6. Omokonda yatyi tyesukisa okuita ku Jeova opo apameke ekolelo lietu?

⁶ Mokonda katutyivili okupameka ekolelo lietu kononkhono mbetu muene, tuesukisa okuita ospilitu sandu ya Huku. Omokonda yatyi? Omokonda ekolelo onthele yotyinyango tyospilitu sandu. (Gálatas 5:22) Tulekesa okuti tuvanongo, tyina tulandula  elondolo lia Jesus, nokuita ospilitu sandu. Jesus walaa okuti, Jeova “maavela ospilitu sandu vana vemuita.”—Lucas 11:13.

7. Popia oñgeni tupondola okutualako okupameka ekolelo lietu.

⁷ Tyina tuna ekolelo liapama mu Huku, tuna okutualako okulipameka. Tupondola okueleka ekolelo notupia. Tyina otupia tuhimbika okutema, tupondola okukala nomutemo omunyingi. Mahi, inkha katupakepo ononkhuii, katutu-katutu tuhimbika okunyima alo pakala vala etwe. Mahi, inkha tutualako okupakapo ononkhuii, matutualako okutema. Otyo tyelifwa nekolelo lietu. Inkha tutualako okutanga, nokulilongesa Ondaka ya Huku ononthiki ambuho, ohole tuna Nombimbiliya, nohole tuna na Jeova mailiyawisa. Ngotyo, matutualako nekolelo, nokulipameka.

8. Oityi matyikukuatesako okutualako okupameka ekolelo liove?

⁸ Kupondola okuhambukilwa vala ovipuka welilongesa etyi wehenembatisalwe. (Hebreus 6:1, 2) Mongeleka, okulilongesa omaulo amwe Ombimbiliya afuiswapo-ale matyikukuatesako okutualako nekolelo nokulipameka. Tupu upondola okuundapesa ondaka ya Huku opo utale inkha ekolelo liove tyili-tyili liapama.—Tanga Tiago 1:25; 2:24, 26.

9, 10. Oñgeni ekolelo lietu lipamekwa (a) nomapanga omawa? (b) nomaliongiyo ewaneno? (c) novilinga viokuivisa?

⁹ Apostolu Paulu wapopia okuti, Ovakristau vapondola “okulipameka pokati kese umwe nekolelo liamukuavo.” (Romanos 1:12) Otyo tyihangununa tyi? Tyina tukala kumwe novakuatate vetu nonomphange, tulipameka kese umwe namukuavo. Haunene tyina tutaindya omuvo wokukala navana vavahiwa ‘movitateka.’ (Tiago 1:3) Omapanga omavi anyona ekolelo lietu, mahi omapanga omawa apameka ekolelo. (1 Coríntios 15:33) Otyo tupelwa ondundo opo tuende apeho komaliongiyo. Momaliongiyo, tupondola okutualako “okulipameka pokati.” (Tanga Hebreus 10:24, 25.) Tyihe otyo vala, ondongeso tupewa momaliongiyo ipameka ekolelo lietu. Ombimbiliya yati “ekolelo lilandula kovipuka omunthu eiva.” (Romanos 10:17) Ngotyo, lipula okuti: ‘Ndyenda apeho komaliongiyo Ovakristau?’

¹⁰ Tupu, tupameka ekolelo lietu tyina tuivisa, natyina tulongesa vakuetu onondaka onongwa Mbombimbiliya. Ngova Kristau voko tyita tyotete, tulilongesa okuyumba onthumbi mu Jeova, nokupopia tyehena owoma.—Atos 4:17-20; 13:46.

11. Omokonda yatyi Kalebe na Josue vakalele nekolelo liapama, iya oñgeni tupondola okuvehetekela?

¹¹ Ekolelo lietu mu Jeova liliyawisa tyina tuimbuka oñgeni etukuatesako, noñgeni akumbulula omalikuambelo etu. Otyo tyamonekele na Kalebe na Josue. Valekesa okuti vena ekolelo mu Jeova etyi vakalavele Otyilongo Valaelwe. Mokueenda kuomuvo, ekolelo liavo alitualako okupama tyina vatala oñgeni Jeova evekuatesako.Nomutima  wakola Josue apopila ova Isilayeli okuti: “Onondaka ambuho onongwa Jeova Huku yenyi emupopilile, naike yaponya.” Konyima apopi okuti: “Kalei nonthilo na Jeova, muumbilei nouviuki notyili.” Ayawisako vali okuti: “Ame novo meumbo liange, matuumbila Jeova.” (Josué 23:14; 24:14, 15) Tyina tuyumba onthumbi mu Jeova iya atuimbuka oñgeni etukuatesako, ekolelo lietu lipama.—Salmo 34:8.

12. Oñgeni matulekesa okuti tuna ekolelo liapama?

¹² Oñgeni matulekesa okuti tuna ekolelo liapama? Omulongwa Tiago wati: “Mandyikulekesa ekolelo liange novilinga viange.” (Tiago 2:18) Ovituwa vietu vilekesa okuti tuna ekolelo liapama. Matutale oñgeni.

13. Oñgeni matulekesa okuti tuna ekolelo tyina tuivisa?

¹³ Okuivisa onkhalelo imwe ikahi nawa yokulekesa okuti tuna ekolelo. Omokonda yatyi? Omokonda tyina tuivisa tulekesa okuti, tutavela okuti onthyulilo ikahi popepi iya “kamaisete!” (Habacuque 2:3) Opo tunoñgonoke inkha ekolelo lietu liapama, tupondola okulipula okuti: ‘Okuivisa tyakolela umwe kuame? Ndyikahi nokulinga atyiho ndyivila opo ndyipopile vakuetu konthele ya Huku? Ndyiovola ononkhalelo ononkhuavo mbokuundapa vali movilinga via Jeova?’ (2 Coríntios 13:5) Matulekesa okuti tuna ekolelo liapama tyina “tupopia mounyingi pala eyovo,” okuivisa onondaka onongwa.—Tanga Romanos 10:10.

14, 15. (a) Oñgeni tupondola okulekesa ekolelo kese nthiki? (b) Popia ongeleka ilekesa ekolelo liapama.

¹⁴ Tupu tulekesa ku Jeova okuti tuna ekolelo, tyina tukoleleya movitateka tuvahiwa  navio mouye uno. Inkha tuahepa, ine tuavela, ine tuasoya, ine tuna ovitateka ovikuavo, tuna okukala nekolelo liokuti Jeova na Jesus “mavetukuatesako momuvo waviuka.” (Hebreus 4:16) Tulekesa ku Jeova okuti tuna ekolelo mwe tyina tumuita opo etukuateseko. Jesus wapopia okuti tupondola okuita ku Jeova opo etuavele “ombolo tuesukisa kese nthiki.” (Lucas 11:3) Omahipululo Ombimbiliya alekesa okuti Jeova upondola okutuavela kese tyipuka tuesukisa. Mongeleka, mokueenda kuomutenya umwe omunene mo Isilayeli Jeova ankho wavela Eliya okulia nomaande. Ombimbiliya ipopia okuti “omakuaila ankho emuetela ombolo nohitu komuhuka, nombolo nohitu kokangulohi iya otyo anwa omeva melongi.” (1 Reis 17:3-6) Tuna ekolelo liokuti Jeova tupu upondola okutuavela atyiho tuesukisa.

¹⁵ Tuna onthumbi yokuti tyina tuendela monondonga Mbombimbiliya, matutyivili okutekula ombunga yetu. Rebecca, omphange umwe wanepwa ukala ko Ásia, wapopia oñgeni nombunga yae vaendela monondonga mbukahi mu Mateus 6:33 na Provérbios 10:4. Rebecca wati omulume wae ankho una ovilinga vipaka motyiponga oupanga wae na Jeova. Ngotyo ayekepo ovilinga ovio. Mahi ankho vatekula ovana vekuana, ngotyo avahimbika okuteleka okulia otyo valandesa. Mokonda  ankho valinga ononkhono ononene, apeho ankho vena onombongo mbutuuka pala okutekula ombunga yavo. Rebecca wati: “Tuelitehelela okuti Jeova kametuyekepo. Ononthiki ambuho ankho tuna etyi tulia.” Okuti nove wakalele nongeleka ngoyo yapamekele ekolelo viove?

16. Oityi tyipondola okumoneka inkha tuyumba onthumbi mu Huku?

¹⁶ Katupondola okukala nondima yokuti inkha tulandula ehongolelo liae, Jeova metukuatesako. Paulu wapopia onondaka mba Habakuke etyi ati: “Omuviuki, matualako okukala nomuenyo mokonda yekolelo.” (Gálatas 3:11; Habacuque 2:4) Otyo tyesukisila okuyumba onthumbi mu Una tyilityili metukuatesako. Paulu utuhinangelesa okuti Huku “kepondolo liae liundapa muonthue, upondola okulinga etyi tyavilapo vali unene tyipona ovipuka aviho tuita ine tusoka.” (Efésios 3:20) Ovaumbili va Jeova valinga atyiho vevila opo valinge ehando lia Huku, mahi tupu vetyii okuti kavetyivili okulinga atyiho vahanda. Onthue tupandula unene Huku utukuatesako nokutuyamba mokonda yononkhono tulinga.

17. (a) Oñgeni Jesus akumbulula ovalongwa vae? (b) Omokonda tyatyi tupondola okukala nonthumbi yokuti Jeova makumbulula omalikuambelo etu okuita vali ekolelo?

¹⁷ Ngetyi tuelilongesa, onthue tulitehelela ngono apostolu etyi vaita ku Jesus okuti: “Tuavele vali ekolelo.” (Lucas 17:5) Jesus akumbulula ovalongwa vae monkhalelo imwe yelikalela mo Pendekoste menima 33, etyi vapewa ospilitu sandu avakala nounongo wokunoñgonoka ehando lia Huku. Otyo tyapamekele ekolelo liavo. Oityi tyaetele? Avelipake motyilinga otyinene tyokuivisa pomuvo opo. (Colossenses 1:23) Okuti tupondola okukevela omalikuambelo etu okuita vali ekolelo akumbululwe? Jeova utulaa okuti tupondola okukevelela inkha etyi tuaita “tyelikuata nehando liae.”—1 João 5:14.

18. Oñgeni Jeova ayamba vana vapameka ekolelo liavo?

¹⁸ Tyina tuyumba unene onthumbi mu Jeova, mahambukwa unene nonthue. Makumbulula omalikuambelo etu okuita vali ekolelo nokukala vana “vatokala okutambula Ouhamba wa Huku.”— 2 Tessalonicenses 1:3, 5.