Ovipuka vimwe upewa kuove viakolela unene mokonda una wekuavela-tyo omutumini ine omunthu umwe ove uhole. Oviawa ovikuavo, namphila viahalande onombongo ononyingi, mahi viakolela mokonda una wekuavela owenyi ine epanga liove wayumba onthumbi. Otyo, otyo tyaendele na Russell etyi aavela otyiawa Jordan wapopiwa konthyimbi yonthele yotete. Oñgeni otyo tyelikuata kumwe notyilikutila tyeyovo?

Tete, Ombimbiliya ipopia okuti, “Huku watuma Omona wae wongunga pano pohi, opo tukamone omuenyo menyina liae.” (1 João 4:9) Otyo onthue tupandela unene otyiawa otyo. Petupu omutumini omunene vali tyipona Huku. Omuhoneki wono salmu omu Hebreu wahoneka okuti: “Ove utiwa Jeova, ove vala Omukulami kombanda yohi aiho.” (Salmo 83:18) Ñgeno ankho katuatokalele okupewa otyiawa nomutumini omunene nga Huku.

Vali, Huku o “Tate yetu.” (Isaías 63:16) Ñgeni ngotyo? Oe wetuavela omuenyo. Tupu, ngwe wesuka nonthue, ngetyi he esuka novana vae. Huku wapopilile ova Efraim okuti: “Efraim omona ndyihole unene ine omona namotesa? . .  Otyo tyindyihama unene mokonda yae. Tyotyili natokola okukala nokankhenda nae.” (Jeremias 31:20) Ongotyo Huku elitehelela konthele yovafendeli vae hono. Ngwe ha Mutungi wetu vala omukulami, mahi tupu o Tate yetu Nepanga lietu. Okuti ngwe ketyivili okutuavela otyipuka tyimwe atutyipande unene?

Ovipuka vimwe upewa uvipanda mokonda una wekuavela-vio kakuluminyinwe, mahi omokonda ukuhole unene. Omunthu wokuekuavela otyali, kakevelela ove umukondolele.

Huku waava Omona wae mokonda utuhole. Ombimbiliya ipopia okuti: ‘Oluembia Huku ena nonthue lualekeswa puetyi atuma Omona wae wongunga pano pohi.’ Pala tyi? “Opo tukamone omuenyo menyina liae.” (1 João 4:9) Okuti pena ou wemukuluminya opo etyilinge? Au! “Otyilikutila tyeyovo tyafetwa na Kristu Jesus,” otyilekeso “tyoluembia lwa Huku tuahatokalele.”​—Romanos 3:24.

Omokonda yatyi otyiawa tya Huku “oluembia tuahatokalele”? Ombimbiliya ihangununa okuti: “Huku wetulekesa oluembia lwae ena nonthue, puetyi Kristu ankhia mokonda yetu, etyi ankho nkhele tuvakuankhali.” (Romanos 5:8) Ohole, oyo yalunda Huku akuateseko ovanthu vehena ekevelelo, ovakuankhali. Onthue katuetyitokalele iya kamatutyivili okumukondolela etyi etulingila. Otyiawa etuavela otyilekeso otyinene tyohole.

Ovipuka vimwe upewa uvipanda mokonda una wekuavela-vio walinga atyiho evila opo ekuavele. Tyina omunthu etuavela otyipuka tyimwe ehole unene, nonthue tutyipanda mokonda yononkhono alinga.

Huku “waava Omona wae wongunga.” (João 3:16) Mokonda ankho utupu vali omunthu omukuavo ehole, apondola okutuavela. Mokueenda kuomanima omanyingi etyi ankho Huku ekahi nokutunga ouye, Jesus waundapele nae akala “una ankho ehole unene.” (Provérbios 8:30) Jesus ‘Omona Huku ehole unene’ iya ngwe “otyifuika tya Huku uhamonwa.” (Colossenses 1:13-15) Petupu oupanga tupondola okueleka noupanga ukahi pokati kavo.

Mahi, Huku “kakalele nokankhenda Nomona wae muene.” (Romans 8:32) Jeova wetuavela omona wae ehole vali unene. Petupu otyiawa tyemupuilisa vali okuava tyipona otyiawa otyo.

Oviawa vimwe upewa­ via kolela unene kuove mokonda viekukuatesako muetyi ankho wesukisa iya alo umwe muvina vialumbanesa vali. Mongeleka, ove kupandula omunthu wekufetela-ko kosipitali ngwe ankho ove utupu onombongo mbokufeta? Okuti kumapandula unene omunthu wekukuatesako?

“Mokonda, ngetyi mu Andau aveho vankhia, tupu mu Kristu aveho mavakakala nomuenyo.” (1 Coríntios 15:22) Mokonda tuatuka ku Andau, atuho “tunkhia,” katutyivili okulityilika omauvela, no nonkhia ine okulinga oupanga omuwa na Huku otyo tuahalingi onkhali. Mokonda tuvakuankhali katutyivili okuyovola omunthu nawike. Ombimbiliya ipopia okuti: “Nawike puvo upondola okuyovola alo umwe ondenge yae, ine okuava otyilikutila ku Huku pala okumuyovola . . . nalumwe maveketyivila.” (Salmo 49:7, 8) Onthue tuahulilwa tuesukisa ekuateso, mokonda katutyivili okuava otyilikutila tyeyovo. Tyihena ekuateso olio ñgeno tuapeseka.

Mokonda Jeova utuhole, wetuavela etyi ankho tuesukisa, ‘etufetelako,’ pahe pokati ka Jesus “aveho mavakala vali nomuenyo.” Oñgeni otyilikutila tyeyovo tyetyifuisa-po? “Ohonde Yomona wae  Jesus itusukula kononkhali mbetu ambuho.” Okukala nekolelo motyilikutila tya Jesus tyaavela omphitilo opo tuevelwe ononkhali mbetu atukala nomuenyo uhapu. (1 João 1:7; 5:13) Oityi otyilikutila tyeyovo matyilingila vana vokuankhia? “Mokonda ononkhia mbatuka komunthu wike, tupu vokuankhia mavakatutiliswa mokonda yomunthu wike [Jesus].”—1 Coríntios 15:21. *

Petupu otyiawa otyinene vali tyaawa nomukulami tyipona otyilikutila tya Jesus. Petupu ou wetulingila vali otyiwa tyipona Jeova Huku. Petupu otyiawa tyikuatesako unene tyipona otyilikutila tyituyovola kononkhali no kononkhia. Tupu petupu otyiawa otyikuavo tyina vali esilivilo enene tyipona otyilikutila tyofeto yeyovo.