Kala Nohole Youviuki Nomutima Wove Auho

“Ove uhole ouviuki.”—SALMO 45:7.

1. Oityi matyitukuatesako okulandula “onondyila mbouviuki”?

 JEOVA ukahi nokuundapesa Ondaka yae nospilitu sandu yae, pala okuhongolela ovanthu vae “monondyila mbouviuki.” (Salmo 23:3) Mahi, mokonda tuvakuankhali onthue tuna eyembelo liokuyapuka mondyila oyo. Opo tukondoke okulinga etyi tyaviuka tyesukisa okulinga ononkhono ononene. Oityi matyitukuatesako? Nga Jesus, nonthue tuna okukala nohole yokulinga etyi tyaviuka.—Tanga Salmo 45:7.

2. “Onondyila mbouviuki” oityi?

² “Onondyila mbouviuki” oityi? Ondyila opopana ovanthu vakuata ine otyilila. “Onondyila mbouviuki” mbuhongolelwa novitumino via Jeova viouviuki. Mo Hebreu no mo Gregu, “ouviuki” tyilekesa okulandula ovitumino konthele yovituwa. Mokonda Jeova oe “omphangu yaapeho youviuki,” ovafendi vae vena ehambu liokumuovola opo evelekese ondyila yaviuka vena okulandula.—Jeremias 50:7.

3. Oñgeni matulilongesa vali konthele youviuki wa Huku?

³ Matutyivili vala okuhambukiswa nawa Huku inkha tulinga ononkhono mbokulandula ovitumino viae viaviuka nomutima wetu auho. (Deuteronômio 32:4) Otyo tyihimbika tyina tulilongesa konthele ya Jeova Huku Mondaka yae Ombimbiliya. Putyina tutualako okulilongesa vali konthele yae, nokufuena vali kwe kese nthiki, matukala vali nohole novitumino viae viaviuka. (Tiago 4:8) Tupu tuna okutavela ehongolelo lio Ndaka yae tyina tulinga omatokolo akolela.

Ovola Ouviuki wa Huku

4. Okuvola ouviuki wa Huku tyakutikinya tyi?

⁴ Tanga Mateus 6:33. Okuovola ouviuki wa Huku, hakuivisa vala onondaka onongwa Mbouhamba wa Huku. Opo ovilinga vietu vitavelwe na Jeova, kese nthiki ovituwa vietu vina okulikuata novitumino viae viavilapo. Oityi aveho vaovola ouviuki wa Jeova vesukisa okulinga? Vesukisa “okukala omunthu omupe watungua ngetyi Huku ahanda, mouviuki wotyotyili nekolelo.”—Efésios 4:24.

5. Oityi matyikuatesako okuhasoyo?

⁵ Putyina tulinga ononkhono mbokulandula ovitumino via Huku, pamwe tukala tyasoya mokonda yoviponyo vietu. Oityi matyikuatesako okuhasoyo, nokulilonga okukala nohole, nokulinga etyi tyaviuka? (Provérbios 24:10) Tuna okufuena apeho ku Jeova melikuambelo “nomitima viotyotyili nonthumbi aiho yekolelo.” (Hebreus 10:19-22) Tyilinge Tuvakristau ovalembulwa ine tuna ekevelelo liokukala pano pohi, tukolela motyilikutila tya Jesus Kristu Omunene-nakwa Wavilapo no movilinga viae. (Romanos 5:8; Hebreus 4:14-16) Esilivilo liohonde yamomeswa ya Jesus, lialekeswa nawa momutala womulavi wotete. (1 João 1:6, 7) Onthele oyo ankho yati: “Tyina utalela kotyitei otyipuka otyinkhuhu momaka omankhuhu, otyipuka otyo tyituela. Tupu, ononkhali mbetu namphila mbukahi ngotyinyanga tyikuhuka unene, mahi tyina Huku embutalela mohonde ya Kristu, mbutuela. (Julho 1879, p. 6) Notyilikutila Tyomona wae onthyolwa  Jeova wetulingila otyipuka otyiwa unene!—Isaías 1:18.

Tala Nawa Oviti Viove Viopaspilitu

6. Omokonda yatyi tyakolela tutale nawa oviti vietu viopaspilitu?

⁶ Apeho tuesukisa okuvala “ondyakulilo yotyivela youviuki monthulo,” mokonda yakolela poviti vietu viopaspilitu tuapewa na Huku. (Efésios 6:11, 14) Tyilinge tuelipakula pahetyino ku Jeova ine tuundapale omanima omanyingi movilinga via Huku, tyakolela tutale nawa oviti vietu viopaspilitu kese nthiki. Omokonda yatyi? Omokonda Eliapu novilulu viae vatahelwa ponthele yoohi. (Revelação 12:7-12) Satanasi wanumana unene, tupu oe utyii okuti omuvo wae kauhi. Ngotyo, oe utualako okumonesa ononkhumbi ovanthu va Huku. Moluotyo tyakolela tuvale “ondyakulilo yotyivela youviuki monthulo.”

7. Oñgeni matuendesa omuenyo wetu inkha tuimbuka okuti tuesukisa ‘ondyakulilo yotyivela youviuki monthulo’?

⁷ Ondyakulilo yotyivela monthulo, iyakulila omutima. Mokonda tuvakuankhali, omutima wetu omukengeleli unene nokuhena ekevelelo. (Jeremias 17:9) Iya mokonda omutima wetu una eyembelo liokulinga ovivi, tyakolela tuulonge nawa nokuuviyula. (Gênesis 8:21) Inkha tunoñgonoka okuti tuesukisa “ondyakulilo yotyivela youviuki monthulo,” nalumwe matuilulumo mokuholovona ovitalukiso Huku eyele. Tupu kamatuhambukilwa okulinga ovipuka ovivi. Kamatupesela omuvo wetu wakolela mokutala vala otelevisau. Anthi, matutualako okulinga ononkhono mbokulinga ovipuka vihambukiswa Jeova. Tupu, namphila tukala nomalusoke ahaviukile, matulingi ononkhono mbokulityilikao nombatelo ya Jeova.—Tanga Provérbios 24:16.

8. Oityi tuesukisila “ondyakulilo onene yekolelo”?

⁸ Poviti vietu viopaspilitu tyimwe “ondyakulilo onene yekolelo.” Otyo tyitukwatesako ‘okuyakula omihongo aviho viatokota viondingavivi.’ (Efésios 6:16) Tupu, ekolelo nomutima omukuatyili ku Jeova, vitukuatesako okulinga ovipuka viouviuki, nokuatualako okuendela mondyila yomuenyo wahapu. Putyina tulilongesa vali unene okukala nohole na Jeova, matupande vali ouviuki wae. Iya konthele yomutima wetu? Oñgeni upondola okutukuatesako okukala nohole youviuki?

Tualeiko Nomutima Omuwa

9. Ouwa patyi tupola kokutualako nomutima omuwa?

⁹ Etyi tuambatisalwa, tuaita ku Jeova “omutima omuwa.” (1 Pedro 3:21) Mokonda tuna ekolelo mofeto yeyovo, ohonde ya Jesus ihita ononkhali mbetu, iya atukala ovasukuki komaiho a Huku. Anthi, opo tutualeko tyasukuka, tuesukisa okutualako nomutima omuwa. Inkha omutima wetu pamwe utuviyula nokutulondola, tuna okupandula mokonda ukahi nokuundapa nawa. Otyo, tyilekesa okuti omutima wetu kawatenene  konthele yonondyila mbaviuka mba Jeova. (1 Timóteo 4:2) Mahi, omutima upondola okulinga vali otyilinga otyikuavo ku vana vahanda okuhumba ouviuki.

10, 11. (a) Popia ongeleka ilekesa oityi tuesukisila okutehelela omutima wetu walongua Nombimbiliya. (b) Omokonda yatyi okukala nohole youviuki tyituetela ehambu enene?

¹⁰ Tyina tulinga etyi tyahaviukile omutima wetu upondola okutukoyesa nokuihama. Tala omukuendye umwe wayapukile “monondyila mbouviuki.” Oe wahimbika okutala omikanda no nosinema mbovanthu vahavalele, ahimbika okusipa epangwe. Tyina ankho aya komaliongiyo, no movilinga viokuivisa, ulitehelela okuti ukahi nokulinga ounkhembi, iya ayekepo ovilinga via Huku. Oe wati, “ame ankho hityii okuti omutima wange maunkhoyesa mokonda yetyi nalinga.” Ayawisako okuti “natualako nowova oo omanima ekuana.” Iya ahimbika okusoka okukondoka motyili. Namphila oe ankho asoka okuti Jeova kamatehelela omalikuambelo ae, oe welikuambela unene, okuita Jeova emuevele. Etyi palamba ono minutu ekwi, me yae eya okumutalelapo, nokumupameka opo akondoke komaliongiyo. Oe aende Mondyuo Yomaliongiyo iya aiti omukulu umwe weuaneno emulongese Ombimbiliya. Etyi palamba omuvo umwe, ambatisalwa, iya upandula unene Jeova mokuayovola omuenyo wae.

¹¹ Katyituhambukiswa unene okulinga etyi tyaviuka? Putyina tulilongesa okukala nohole nouviuki, nokulinga etyi tyaviuka, matukala vali nehambu liokulinga etyi tyihambukiswa Tate yetu keulu. Nkhele soka! Onthiki ikahi popepi tyina ovanthu aveho mavakakala nomalusoke omawa momutima, nokuhetekela nawa ovituwa via Huku. Moluotyo, tutualeiko okuyawisa ohole yetu youviuki momutima, nokuhambukiswa omutima wa Jeova.—Provérbios 23:15, 16.

12, 13. Oñgeni tupondola okulonga omutima wetu?

¹² Oityi tupondola okulinga opo tulonge omutima wetu? Tyina tulilongesa Ovihonekwa nomikanda vietu viapolwa Mombimbiliya, tyakolela okuhinangela okuti “omutima womuviuki usokolola nawa opo akumbulule.” (Provérbios 15:28) Tala oñgeni otyo tyitukuatesako konthele yokuovola ovilinga. Inkha ovilinga vimwe vimoneka nawa okuti kavielikuatele novitumino vio Vihonekwa, ovanyingi puonthue kavasete okulandula ehongolelo liomupika wekolelo nokualunguka. Mahi, tyina ovilinga vimwe vihayandyulukile nawa, tuesukisa okuovola ovitumino Viombimbiliya vipopia konthele yotyo, nokulikuambela. a Tuna okulandula ovitumino ovio ngetyi tuesukisa okulityilika okuihamesa omitima via vakuetu. (1 Coríntios 10:31-33) Haunene tuna okusuka novitumino vituvatela moupanga wetu  na Huku. Inkha Jeova omunthu wotyotyili kuonthue tete matulipulu onthue, muene okuti, ‘Okulinga ovilinga evi matyinumanesa Jeova, atyimuihamesa omutima?’—Salmo 78:40, 41.

¹³ Tyina tupongiya Omutala Womulavi ine Elilongeso Liombimbiliya Mewaneno, tuna okuhinangela okuti tuesukisa okusokolola nawa kuetyi tukahi nokulilongesa. Okuti pamwe tutanga vala liwa epulo atunthindi ekumbululo, iya atuende popalagrafu onkhuavo? Okulilongesa monkhalelo ngoyo kamatutyivili okuyawisa ohole yetu nouviuki ine okukala nomutima omuwa. Inkha tuhanda okukala nohole youviuki, tuesukisa okulilongesa nombili nokusokolola kuetyi tutanga Mondaka ya Huku. Tyesukisa okulinga ononkhono ononene nomutima wetu auho opo tulilongese okukala nohole youviuki!

Ondyala Nohunga Youviuki

14. Jeova Huku na Jesus Kristu vahanda tulitehele ñgeni konthele yovilinga via Huku?

¹⁴ Jeova Huku na Jesus Kristu vahanda tukale nehambu tyina tulinga ovilinga via Huku. Oityi matyitukuatesako okukala nehambu olio? Ohole youviuki! Melongomona lio Komphunda, Jesus wati: “Vokuna ondyala nohunga youviuki ovana-mbembwa, mokonda mavekekutiswa.” (Mateus 5:6) Onondaka ombo mbuna esilivilo patyi ku vana vahanda okukala nohole youviuki?

15, 16. Omononkhalelo patyi ondyala nohunga youviuki mavakatuukiswa?

¹⁵ Ouye tukahi utuminwa nondingavivi. (1 João 5:19) Kese otyilongo tukahi, inkha tutanga o jornale, matuvasimo omaiviso okuti oungangala nokulipaa vikahi nokuliyawisa. Tyina ovaviuki vatala ovivi ovanthu valinga vakuavo, tyivenumanesa. (Eclesiastes 8:9) Mokonda tuhole Jeova, tutyii okuti oe vala upondola okukutisa vana vena ondyala nohunga yokulilongesa ouviuki. Apa katutu onondingavivi mavakahanyuako, iya vana vehole ouviuki kamavakamona vali ononkhumbi mbutuka ku vana vatomba ovitumino no kovivi valinga. (2 Pedro 2:7, 8) Matyikaeta ombembwa ngatyi!

¹⁶ Mokonda tuvaumbili va Jeova, novalanduli va Jesus Kristu, tuimbuka okuti aveho vena ondyala nohunga youviuki “mavekekutiswa.” Mavakatuukiswa nawa nepongiyo Huku alinga lieulu epe noohi omphe “mamukakala ouviuki.” (2 Pedro 3:13) Moluotyo, tuhasoyei ine okukala nowoma mokonda onya noungangala weyula mouye uno wa Satanasi muhena ouviuki. (Eclesiastes 5:8) Jeova, Omukulami wii nawa etyi tyikahi nokumoneka, iya apa katutu mayovola vana vehole ouviuki.

Vasa Ouwa Mokukala Nohole Youviuki

17. Ovipuka patyi vimwe oviwa vitundilila kokukala nohole youviuki?

¹⁷ O Salmo 146:8 ipopia unene ouwa utundilila kokulandula ondyila youviuki. Omuhoneki wo salmu waimba okuti: “Jeova uhole ovaviuki.” Nkhele soka! Ohamba youye auho utuhole mokonda tuhole ouviuki! Mokonda yoluembia lwa Jeova, onthue tuna onthumbi yokuti metuavela etyi tuesukisa molutu, putyina tupaka tete momuenyo ovilinga Viouhamba wa Huku. (Tanga Salmo 37:25; Provérbios 10:3.) Okuhulililako, ouye auho maukeyula ovanthu vehole ouviuki. (Provérbios 13:22) Ovanthu  ovanyingi va Huku vaendela mouviuki, mavakapewa ondyambi yokukala nehambu enene nomuenyo uhapu momphangu yombembwa pano pohi. Alo umwe hono, vana vehole ouviuki wa Huku, vena ombembwa momutima, iveetela ewaneko mo nombunga mbavo no momawaneno.—Filipenses 4:6, 7.

18. Ovipuka patyi oviwa tupondola okulinga putyina tukevelela onthiki ya Jeova?

¹⁸ Putyina tukevelela onthiki onene ya Jeova, tuna okutualako okuovola ouviuki wae. (Sofonias 2:2, 3) Moluotyo, tukalei nohole yotyotyili nonondyila mbaviuka mba Jeova Huku. Otyo tyakutikinya okuvala “ondyakulilo yotyivela youviuki monthulo,” opo tuyakulile omutima wetu. Tupu tuesukisa okutualako okukala nomutima omuwa, utuetela ehambu, nokuhambukiswa omutima wa Huku yetu.—Provérbios 27:11.

19. Tuesukisa okutokola okulinga tyi? Oityi matukelilongesa monthele ilandulako?

¹⁹ “Omaiho a Jeova ekahi nokutala kombanda yoohi aiho, opo alekese ononkhono mbae ku vana vemuumbila nomutima auho.” (2 Crônicas 16:9) Onondaka ombo mbutuungumanesa ngatyi, putyina tulinga etyi tyaviuka mouye uno wovivi, uhapamene nokueyula oungangala! Tyotyili, onondyila mbetu mbouviki mbupondola okupuiya kounyingi wovanthu vayapuka ku Huku. Mahi okulandula ouviuki wa Jeova tyituetela ouwa omunene. (Isaías 48:17; 1 Pedro 4:4) Ngotyo tutokolei, nomutima auho okutualako okukala nohole youviuki nokuendelamo nomutima wetu auho, iya otyo matyituetela ehambu. Okutokola nomutima auho tyakutikinya okuyala okutomba ovitumino. Onthele mailandulako maitulekesa oityi otyo tyihangununa.

[Onondaka Poutoi]

Oñgeni Ove Mokumbulula?

• Oityi tuesukisila okupanda ofeto yeyovo opo tukale nohole youviuki?

• Omokonda yatyi tyakolela tuvale “ondyakulilo yotyivela youviuki monthulo”?

• Oñgeni matulongo omutima wetu?

[Omapuko Elongeso]

[Olutalatu pefo 26]

Omutima walongua Nombimbiliya utukuatesako okutetulula ovitateka konthele yovilinga