Lilongesa Ondaka Ya Huku

Jesus Kristu Olie?

Onthele ei ipopia konthele yomapulo hamwe uhole okulilinga, nokulekesa opi movasi omakumbululo mo Mbimbiliya yove. Onombangi mba Jeova vena ehambu liokutomphola nove konthele yomakumbululo oo.

1. Jesus Kristu olie?

Tyelikalela novanthu ovakuavo, Jesus wali oandyu keulu puetyi nkhele ehenetyitwe pano pohi. (João 8:23) Oe Huku atetekela okutunga, iya emukuatesako okulinga ovipuka aviho ovikuavo. Oe vala Jeova atunga aike muene, iya otyo aihanenwa okuti Omona “wongunga” wa Huku. Jesus ankho omutumwa-ndaka wa Huku, otyo aihanenwa okuti “Ondaka.”—João 1:1-3, 14; tanga Provérbios 8:22, 23, 30; Colossenses 1:15, 16.

2. Oityi Jesus eililile pano pohi?

Huku watumine Omona wae pano pohi, mokuilula omuenyo wae keulu eupake meimo liomumphembela omu Judeu utiwa o Maliya. Moluotyo, Jesus ankho utupu he pano pohi. (Lucas 1:30-35) Jesus weile pano pohi, (1) opo alongese ovanthu otyili konthele ya Huku, (2) opo alekese oñgeni tyilingwa ehando lia Huku, iya (3) opo aave omuenyo wae uhena nkhali “ngofeto yeyovo.”—Tanga Mateus 20:28; João 18:37.

3. Omokonda yatyi tuesukisila ofeto yeyovo?

Ofeto yeyovo otyipuka tyifetwa pala okuyovola omunthu moupika. Ononkhia nokukulupa ankho havioko Huku ahandelele ovanthu. Oñgeni tuetyinoñgonoka? Huku wapopilile Andau omulume wotete okuti, inkha ulinga etyi Ombimbiliya iihana okuti onkhali, mankhi. Inkha Andau kalingile onkhali, ñgeno kankhile nalumwe. Namphila Andau na Eva vakalele nomuenyo omanima omanyingi, mahi vahimbika okunkhia monthiki vaanya Huku. (Gênesis 2:16, 17; 5:5) Andau watambulisa ovana vae aveho onkhali, nononkhia. Ngotyo, ononkhia “mbanyingila” movanthu mokonda ya Andau. Otyo tuesukisila ofeto yeyovo.—Tanga Romanos 5:12; 6:23.

  4. Jesus wankhia mokonda yatyi?

Olie upondola okufeta ofeto yeyovo pala okutuyovola mononkhia? Tyina tunkhia, tufeta vala ononkhali mbetu muene. Kutupu omunthu omukuankhali upondola okufeta ononkhali mbavakuavo.—Tanga Salmo 49:7-9.

Mokonda Jesus kapiñganene onkhali, oe kankhile mokonda yononkhali mbae, anthi, wankhila ononkhali mbavakuavo. Huku watumine Omona wae opo ankhie mokonda yetu, okulekesa okuti Oe una oluembia olunene novanthu. Tupu Jesus walekesa ohole nonthue mokutavela ku Tate yae nokuaava omuenyo wae mokonda yononkhali mbetu.—Tanga João 3:16; Romanos 5:18, 19.

5. Oityi Jesus ekahi nokulinga hono?

Etyi avelula ovavei, nokututilisa vokuankhia, nokuyovola ovanthu koviponga, Jesus walekesa etyi makalingila ovanthu ovataveli aveho. (Lucas 18:35-42; João 5:28, 29) Etyi Jesus ankhia, Huku wemukondolela omuenyo wokeulu. (1 Pedro 3:18) Iya Jesus akala kokulio kwa Huku okukevela alo Jeova emuvialeka Kouhamba, opo atumine oohi aiho. (Hebreus 10:12, 13) Pahe Jesus Ohamba, ukahi nokutumina keulu, iya ovalanduli vae pano pohi vekahi nokuivisa onondaka onongwa ouye auho.—Tanga Daniel 7:13, 14; Mateus 24:14.

Apa katutu, Ohamba Jesus makaundapesa ounene wae opo amaneko ononkhumbi ambuho na vana vembueta. Ovanyingi vakolela mu Jesus nokutavela, mavakahambukwa nomuenyo uhapu momphangu yombembwa pano pohi.—Tanga Salmo 37:9-11.

Opo unoñgonoke vali konthele yotyo, tala okapitulu 4 komukanda ou, walingua no Nombangi mba Jeova. Oityi Ombimbiliya Tyili Ilongesa?

[Olutalatu pefo 11]

Ovanyingi vakolela mu Jesus nokutavela mavakakala nomuenyo uhapu momphangu yombembwa pano pohi