4 Huku Omukalavi Okuti Otyo Otyili?

Ove hamwe uhole okuiva okuti: “Huku oe utumina ouye uno, iya atyiho tyimoneka mouye oe utyilinga. Mokonda ouye weyula okapungulula, novivi, nemone, Huku oe uvietako.”

Oityi Ombimbiliya ilongesa: Huku haeko weta ovivi mouye. Ombimbiliya ipopia Jeova okuti: “Ovilinga viae viafuapo nawa, mokonda onondyila mbae ambuho ouviuki.”—Deuteronômio 32:4.

Huku una otyali novanthu aveho, alo umwe vana vamoneka ngoti kavatokalele otyali otyo. Nkhele soka, “oe utundisa ekumbi liae pala onondingavivi no nondalawa, nokulokesa ombila pala ovaviuki na vana vehevaviuki.” (Mateus 5:45) Oe utekula ovanthu vovivala aviho, nomihoko, novilongo monkhalelo yaviuka, ngetyi tyilekesa Atos 10:34, 35 okuti: “Huku utupu okapungulula. Mahi, oe utavela kese munthu una onthilo nae nokulinga etyi tyaviuka, momalongo aeho.”

Mahi ovivi vituka pi? Ovanthu ovanyingi vaholovona okulinga ovivi, kavalandula ouviuki wa Huku. (Deuteronômio 32:5) Tupu, Ombimbiliya ilekesa okuti Huku ukahi nokuyeka ondyale yae Eliapu atumine ouye. a (1 João 5:19) Mahi, Huku kamayeke Eliapu litumine apeho. Oe waonganekale atyiho tyesukisa opo “ahanyeko ovilinga vie Liapu.”—1 João 3:8.

Oñgeni okunoñgonoka otyili konthele ya Huku matyikukuatesako: Ove upondola okusukalala nomahipululo ahapu konthele yovivi, nonya, noungangala. Okunoñgonoka opi viatuka, matyikukuatesako okunoñgonoka oityi ouye weyulila ovivi, nomokonda yatyi ovanthu vehevili okuvimanako. (Salmo 146:3) Uhapesele omuvo wove nononkhono, nokuovola okupilulula ovipuka mohevili okumanako apeho. Anthi inkha uyumba onthumbi momilao via Huku, mokala nekevelelo ewa komutwe wandyila.—Revelação 21:3, 4.

Okunoñgonoka opi tyotyili ovitateka vietu vituka, tyipondola okutukuatesako unene tyina ovitateka viveta pepito lietu. Tyina tulingwa onya, hamwe tuliyavela, ngetyi tyalingile omuumbili wa Huku Habakuke, wati: “Ovitumino vilele, iya ouviuki kaumoneka vali.” (Habacuque 1:4) Huku kanumanene na Habakuke mokonda yokuapopia ngotyo. Anthi, Huku wapamekele omuumbili Wae nokuti Oe wanaka omuvo pala okuviukisa ovipuka, nokukuatesako Habakuke okukala nehambu momuvo wononkhumbi. (Habacuque 2:2-4; 3:17, 18) Tupu, okuyumba onthumbi momulao wa Huku wokumanako ovivi, matyikukuatesako okupoleya omutima nokuvasa ombembwa mouye uno wovivi.

[Onondaka Poutoi]

[Onondaka Mbavilapo pefo 7]

Okuti o Huku umwe weetako ononkhumbi novivi?

[Olutalatu Lualandwa pefo 7]

© Sven Torfinn/Panos Pictures