Etyi Tupondola Okulinga Konthele Yoviponga

Mokonda oviponga vikahi nokuliyawisa nokuipaa unene ovanthu, oityi omunthu apondola okulinga? Tutalei ovipuka vimwe tupondola okulinga.

Tunda mondyila yononkhumbi. Ombimbiliya yati: “Omunthu wokualunguka utala otyivi iya akaholama, mahi, omunthu uhena onondunge wenda vala iya akamona ononkhumbi.” (Provérbios 22:3) Olio elondolo ewa tupondola okulandula konthele yoviponga. Inkha tutolelwa okuti kukahi nokuya otyinimawe, otyiwa vana vekahi ponomphangu ombo vatundepo avai ponomphangu mbapama. Omuenyo wakolela vali tyipona onondyuo ine omalumono.

Vamwe, vaholovona okuhakala pomphangu papondola okupita oviponga. Omutumini umwe wati: “Konomphangu mbumwe kupita unene ovinimawe. Kononthele mbumwe mbehehi mbo Ohi kuhole okupita unene ovinimawe iya komutwe makukapita vali ovinimawe.” Otyo otyili, mongeleka, movilongo viokuna omukulamo wike nelunga, muhole okupita ovinimawe ovinyingi. Inkha katukala ponomphangu ombo papondola okupita oviponga ine okuilukila pomphangu yapama, matulityilika unene ononkhumbi mbutundilila koviponga ovio.

Lipongiya. Namphila ulipongiya nawa, nkhele upondola okuutukilwa notyiponga. Okunoñgonoka etyi matulingi konthele yoviponga matyitukuatesako tyina tuvasiwa notyiponga. Tupu otyo tyelikuata nelondolo likahi mu Provérbios 22:3, tuatanga pombanda. Okuti wapaka nawa atyiho wesukisa opo wende nkholo? Omukanda wokulongesa konthele yovinimawe utiwa 1-2-3 of Disaster Education, upopia ovipuka tuesukisa okutyinda: Ovihemba, nonthenda yomeva, novikulia vihavolo liwa, nombiyete, nomukanda wohonde, novikuavo vali. Tupu tyesukisa okupopia nombunga konthele yoviponga vipondola okumoneka, netyi mupondola okulinga.

Kala noupanga omuwa na Huku. Otyo matyikukuatesako apeho. Ombimbiliya ipopia konthele ya Huku okuti “o Tate wonkhenda onene, Huku weungumaneso aliho. Oe utuungumanesa mononkhumbi mbetu ambuho.” Oversikulu onkhuavo ipopia okuti Huku “uungumanesa vana vasoya.”—2 Coríntios 1:3, 4; 7:6.

Tyotyili, Huku utala nawa etyi tyipita navana vayumba onthumbi mwe. Oe o Huku yohole iya utupameka mononkhalelo ononyingi. (1 João 4:8) Tuhelikuambelei okuita omahuviso, mahi tuitei ospilitu sandu ya Huku ipondola okutukuatesako mu kese tyitateka. Ospilitu sandu ipondola okuhinangelesa vana  vapita mononkhumbi ononthele Mbombimbiliya mbupondola okupameka nokuveetela ombembwa. Tyotyili, ovaumbili vekolelo va Huku vapondola okulitehelela nga David, ohamba yo Isilayeli yokohale wati: “Namphila ndyikuata mevota liapuputa, himakala nowoma wotyivi natyike. Mokonda ove ukahi naame. Otyimuti tyove nomphangoti yove ovipuka vindyungumanesa.”—Salmo 23:4.

Ovakristau velikuatesako. Pomuvo wo Vakristau votete, omuuli Omukristau Ágabo wapopile okuti “makuya ondyala imwe ononene kombanda yoohi aiho, ondyala oyo yaendeleko kononthiki mba Cláudio.” Ovalongwa va Jesus mo Judeia navo vamuene ondyala oyo. Oityi ovalongwa valingile etyi veiva okuti Ovakristau vakuavo vetupu etyi valia? Ombimbiliya yati: “Ovalongwa avelipakelamo okuava kese umwe etyi ena, opo vakuateseko ovakuatate vavo ankho vakala mo Judeia.” (Atos 11:28, 29) Ohole yevelunda, avakuatesako ovakuatate vavo.

Hono tyina pamoneka oviponga, ovaumbili va Huku navo velikuatesako. Onombangi mba Jeova veiwe nawa okuti vakuatesako ovakuatate vavo. Mongeleka, etyi otyinimawe otyinene tyaenda ko Chile mu 27 ya Hitandyila yo 2010, Onombangi mba Jeova liwa-liwa vakuatesako ovakuatate votyilongo otyo. Karla, wakala nondyuo yahanyaunwa notyinimawe wati: “Tyipameka nokuungumanesa okutala okuti kese nthiki [Onombangi mba Jeova] vatunda kononthele ononkhuavo okuya okutukuatesako. Tyotyili, Jeova wetupameka nouwa wovanthu ovo veliava. Nelitehelela okuti ndyiholwe nokuamenwa.” He mbuale yae, Uhembangi ya Jeova, wamona ombatelo apewa. Wati: “Etyi tyelikalela unene netyi namona omanima omanyingi mongeleya yange.” Etyi amona tyemulunda okuita Onombangi mba Jeova vemulongese Ombimbiliya.

Okukala pamwe navana vehole Huku, tyipondola okukuatesako unene poviponga. Okuti nthiki imwe oviponga kombanda yoohi mavikapuako? Tutalei etyi Ombimbiliya ipopia.

[Olutalatu pefo 6]

Okuti wapaka nawa atyiho wesukisa opo wende nkholo?

[Olutalatu pefo 7]

Tuhelikuambelei okuita omahuviso, mahi tuitei ospilitu sandu ya Huku ipondola okutukuatesako mu kese tyitateka

[Olutalatu pefo 7]

Ovakristau velikuatesako tyina pamoneka oviponga

[Olutalatu pefo 7]

“Nelitehelela okuti ndyiholwe nokuamenwa”