Epulo 1: Omuenyo Wange Walingilua Tyi?
Epulo 1: Omuenyo Wange Walingilua Tyi?
ROSALIND, wekulila ko Englaterra ankho uhanda unene okunoñgonoka ovipuka. Tupu ankho uhanda okukuatesako ovanthu. Konyima etyi amana okulongeswa mosikola, avasi ovilinga vimwe ankho afetwa nawa, viokukuatesako vana vehena omaumbo, tupu ankho ukuatesako vana vavela novahepi. Namphila ankho una ovilinga vimukululukisa nokumupa olumono, wati, “Momanima omanyingi ndyihole okulipula okuti, ‘tukahiko mokonda yatyi?’ iya ‘Omuenyo walingilua tyi?’”
Okulipula ngotyo katyapengele mokonda yatyi? Ovanthu kavelifwile novinyama. Onthwe tutyivila okulilongesila kovipuka viokonyima, nokupanga etyi matukalinga komutwe wandyila, iya nokutala olipi ehando liomuenyo wetu.
Oityi vamwe vapopia konthele yekumbululo liepulo eli? Ovanyingi vapopia okuti ehando liomuenyo okukala nolumono, ine omunkhima, nokuovola ovipuka vieta ehambu.
Ekumbululo olio lilekesa tyi? Lilekesa okuti tuapaka komutwe omahando omuenyo. Omahando etu akolela vali tyipona okulinga ehando lia Huku.
Oityi Ombimbiliya ilongesa? Ohamba Salomau waongiyile omalumono nokuovola omuenyo omuwa, mahi waimbukile okuti ovipuka ovio kaviemuetelele ehambu liotyotyili. Oe walekesa etyi tyieta ehambu liotyotyili momuenyo etyi ahoneka okuti: “Etetululo liovipuka tueiva, olieli: Tila Huku yotyotyili, nokutualako okuendela movitumino viae. Etyi, otyo ovanthu aveho vena okulinga.” (Eclesiastes 12:13) Okutualako okuendela movitumino via Huku tyakutikinya tyi?
Huku uhanda tukale nehambu momuenyo. Salomau wahoneka okuti: “Pala omunthu Eclesiastes 2:24.
kutupu natyike otyiwa, tyipona okulia nokunwa, opo ohande yae itale ouwa wovilinga viae vialema. Tyotyili otyo, tupu ame ndyihole okutyimona, okuti otyo tyitunda pomaoko a Huku yo tyotyili.”—Tupu, Huku uhanda tukale nohole nokusuka nombunga yetu. Tala onondonga mbapepuka nokuaviuka aavela kese umwe mombunga.
“Ovalume vena okukala nohole novakai vavo, ngetyi vehole omalutu avo muene.”—Efésios 5:28.
“Omukai akale nehumbo enene nomulume wae.”—Efésios 5:33.
“Vana, tavelei kovoho.”—Efésios 6:1.
Inkha tulandula onondonga ombo Mbombimbiliya, matukala nehambu enene nomuenyo omuwa. Moluotyo, otyipuka tyakolela vali tuna okulinga okulilongesa konthele Yomutungi wetu nokufuena kwe ngatyina Epanga lietu. Tyotyili, Ombimbiliya itukonga opo “tufuene ku Huku.” Nokutulaa okuti okulinga ngotyo, “nae mafuene kuonthwe.” (Tiago 4:8) Inkha utavela okulinga ngotyo, omuenyo wove maukala nehambu liotyotyili.
Rosalind, wapopiwa tete, pahe ulitehela okuti wavasa ehambu liotyotyili momuenyo mokonda yokuelilongesa otyili.
Opo ulilongese vali konthele yoñgeni upondola okutyinda omuenyo monkhalelo ihambukiswa Huku, tala okapitulu 12 komukanda Oityi Ombimbiliya Tyili Ilongesa? Ukahi mo Internete, mo www.pr418.com
[Okakasa pefo 5]
Oityi Jesus Apopia Konthele Yevangelo Liomuenyo?
Jesus ankho utupu omphata konthele yevangelo liomuenyo. Wati: “Ame otyo natyitilwa, iya otyo neila mouye, opo ndyaave oumbangi konthele yotyili.” (João 18:37) Jesus waundapele unene okulongesa ovanthu otyili konthele ya Huku nevangelo Liae.
Matukala nomuenyo omuwa inkha tulandula ongeleka ya Jesus. Tyotyili, Jesus utuita tulilongesile kwe. (Mateus 11:29) Tala ononkhalelo onombali tupondola okutyilinga.
Jesus wati opo tukale nehambu tuna “kuimbuka omasuka-suka [etu] opamphepo.” (Mateus 5:3) Matukululukisa omasuka-suka etu opamphepo, inkha tuovola “okunoñgonoka wike vala Huku yotyotyili, na Jesus Kristu una watumine.”—João 17:3.
Jesus watuma ovalanduli vae valongese ovakuavo konthele yetyi vanoñgonoka. Wati: “Endei, kalongesei ovanthu movilongo aviho opo vakale ovalongwa. Iya amuvembatisala menyina lia Tate, no lio Mona, no liospilitu sandu. Velongesei okutavela ovipuka aviho ame nemutuma.”—Mateus 28:19, 20.
Vana vakululukisa omasuka-suka avo opamphepo mokulilongesa Ombimbiliya nokuendela muetyi velilongesa, vapilulula omuenyo wavo aukala nawa. Vaimbuka okuti omuenyo wavo wakala vali nawa etyi vahimbika okulongesa vakuavo konthele ya Huku.