SOKA ñgeno una epanga uhole unene, mahi alingi otyipuka tyimwe ove wahanoñgonokele nawa. Ovakuavo vemupopia okuti etyi alinga katyaviukile, vapopia okuti epanga liove omukalavi. Motavela liwa etyi vapopia, ine mokevela opo utehelele etyi epanga liove mapopi? Inkha kepo pala okukupopila etyi tyaendapo, mokala noumphua-lundo, ohapopi liwa okuti wapengesa?

Tyina nkhele wehenepopie okuti wapengesa, wesukisa okunoñgonoka vali nawa etyi tyaendapo. Wesukisa okulipula: ‘Okuti epanga liange ndyimwii umwe nawa-nawa, iya ndyimuhole mokonda yatyi?’ Hamwe umwii umwe. Mahi tala: Noonthue tete tuesukisa okulipula ngotyo konthele ya Huku, atuahapopi vala liwa-liwa okuti omukalavi.

Hamwe tyipondola okukupuiya okunoñgonoka nawa ovipuka vimwe Huku alinga, ine omokonda yatyi aviyekela vimoneke. Ovanthu ovanyingi mavekupopila okuti Huku omukalavi, nokukuhindila okusoka ngetyi vasoka. Motavela liwa ine moovola okumunoñgonoka vali nawa? Tyotyili, tyina nkhele wehenepopie okuti Huku omukalavi, tete wesukisa okumunoñgonoka vali nawa. Lipula okuti: ‘Ovipuka patyi oviwa Huku ehole okulinga pala me?’

Inkha uhole okukala novitateka, hamwe upondola okupopia okuti Huku kekukuatesako. Mahi nkhele sokapo katutu. Okuti Huku ukahi nokukuetela ovitateka, ine ovipuka oviwa? Ngetyi tuelilongesa, “omutumini wouye uno” o Satanasi, ha Jeova ko. (João 12:31) Ngotyo, ukahi nokueta emone, novivi mouye uno, o Satanasi. Tupu ononkhali mbetu, novipuka ovikuavo vituuhulukila vala, viyauisa kovitateka vietu.

Mahi, oityi Huku aetako? Ombimbiliya yati: O Huku “Watunga eulu nohi,” iya otyo tyakutikinya olutu luetu “luatungwa monkhalelo ihuvisa unene.” Tupu ipopia okuti “omuenyo wetu ukahi pomaoko” a Jeova. (Salmo 124:8; 139:14; Daniel 5:23) Otyo tyihangununa tyi?

Tyihangununa okuti omuenyo wetu auho utei Komutungi wetu. (Atos 17:28) Otyo tyilekesa okuti omuenyo, novipuka oviwa vikahi mouye, nokukala noluembia, nomapanga, nokufimbuna, nokutehelela, nokumakela ovipuka, nokuhihita, aviho tuevipewa na Huku. (Tiago 1:17) Ove kutavela okuti ovipuka ovio oviwa vialingwa Nepanga watokala okupandwa nokuyumbwa onthumbi?

Mahi, tyipondola okukupuiya okuyumba onthumbi mu Huku. Hamwe ulitehela okuti nkhele kumwii nawa opo umuyumbe onthumbi. Otyo hatyiviko. Mononthele ombu, katuapopile omahunga aeho alekesa omokonda yatyi ovanthu vapopila okuti Huku omukalavi. Mahi, okuti hatyiwa okulinga ononkhono opo unoñgonoke vali nawa Huku? a Tuna onthumbi yokuti tyina wametyilingi, monoñgonoka otyili konthele ya Huku. Okuti Huku omukalavi? Tyotyili, hamukalaviko, mahi, “Huku oluembia.”​—1 João 4:8.