Konyima yovityita vikuana etyi omukanda wahulililako wo Hebreu Mombimbiliya wahonekwa, eulo lia Mikeia konthele ya Mesiya liafuisuapo: Jesus watyitililue mo Mbelei. Konyima yomanima 30, mo 29 P.K., onthele yotete yeulo lia Daniele konthele yokuya kwa Mesiya liafuisuapo. Jesus wambatisalua iya Huku emulembula nospilitu sandu. Pomuvo watyo opo, Ombuto, Mesiya ankho ukevelelwa, wehika!

Jesus liwa-liwa ahimbika ovilinga viae “viokuivisa onondaka onongwa mbouhamba wa Huku.” (Lucas 8:1) Ngetyi ankho tyaulilwe, Jesus ankho una oluembia, nokuna esuko enene navakuavo. Ankho ulongesa nawa noluembia, nokuhakula “omauvela aeho” ovanthu, okulekesa okuti Huku ankho ukahi nae. (Mateus 4:23) Ovanthu vomati aeho ankho veya ku Jesus, iya tyafuile vapopile ngetyi tyapopia umwe povalongwa va Jesus okuti: “Tuavasa Mesiya”!​—João 1:41.

Jesus waulile okuti tyina nkhele Ouhamba wae wehenehimbike okutumina pano pohi, mouye mamukala ovilwa, novinimawe, novitateka ovikuavo ovinyingi. Walondolele aveho opo “vatualeko tyalunguka.”​—Marcos 13:37.

Jesus omulume umwe ankho wehena onkhali watuaileko okutavela ku Huku, mahi ankho una onondyale mbemuipaele. Ononkhia mbae mbaava otyilikutila tyafuapo pala okutukondolela etyi Andau na Eva vavombesa, nekevelelo liomuenyo wahapu Momphangu Yombembwa.

Ononkhia mba Jesus mbafuisapo eulo, ngotyo etyi palamba ononthiki ononthatu Huku atutilisa Jesus ngomunthu wopaspilitu nokuna epondolo. Jesus amonekela ovalongwa vae valamba po 500. Etyi nkhele eheneende keulu Jesus waavelele ovalanduli vae otyilinga tyokuivisa onondaka onongwa konthele yae Nouhamba wae “kovanthu vomalongo aeho.” (Mateus 28:19) Oñgeni vafuisilepo otyilinga otyo?

​—Yapolwa mu Mateus, Marcos, Lucas, João, 1 Coríntios.