Okuti uhanda okukala nekongoko ewa, nomuenyo omuwa pala ove nombunga yove? Uhanda okukala mouye muhena onongembia, nononkhumbi, nononkhia? Okukala mouye ngoo, katyikahi ngondyoi. Mahi, apa katutu makukakala ouye omupe wouviuki mokonda otyo Jeova Huku ahanda. Tala oñgeni otyo tyapopiwa mu Revelação 21:3-5.​—Tanga.

“[Huku] makasekuna ononkhuka momaiho avo.” (Revelação 21:4) Ononkhuka patyi makasekuna? Hanonkhuka mbehambu ine ononkhuka mbuyakulila omaiho etu. Omulao oo wa Huku upopia ononkhuka mbuetuako nononkhumbi, noluihamo. Huku kamakakukutisa ononkhuka mbetu, mekembusekuna mokumanako ononkhumbi, noluihamo.

“Ononkhia kamambukakalako vali.” (Revelação 21:4) Okuti kuna otyipuka tyitulilisa vali tyipona ononkhia? Jeova makayovola ovanthu ovataveli kononkhia. Ñgeni? Mokumanako etyi tyieta ononkhia: onkhali tuapiñgana ku Andau. (Romanos 5:12) Jeova makaundapesa ofeto yotyilikutila tyeyovo tya Jesus, pala okuyovola ovanthu aveho konkhali. a Konyima, ononkhia, ondyale yetu yahulililako, “mambukanyimuako.” (1 Coríntios 15:26) Ovanthu vekolelo mavakakalako apeho nekongoko ewa ngetyi Huku ahandele tunde konthyimbi.

“Onongembia kamambukakalako vali.” (Revelação 21:4) Onongembia patyi mbahamakakalako vali? Onongembia ambuho mbutuka konkhali, mbumonesa ononkhumbi ovanthu ovanyingi.

Apa katutu ovanthu kamavakalila vali, kamavakankhia, kamavakakala vali noluihamo. Mahi, hamwe ulipula okuti: ‘Opi mavakakala? Okuti Huku walaa okuti o keulu?’ Au. Tala omokonda yatyi. Tete, omulao wahimbika nonondaka ombu: “Ekaka lia Huku likahi pokati kovanthu,” iya ovanthu vakala pano pohi. (Revelação 21:3) Vali, omulao upopia ouye omu ‘muhamakakala vali ononkhia,’ mouye ankho muna ononkhia mahi kamambukakalako vali. Ononkhia mbukahi pano pohi, kambukahi keulu. Ngotyo, tyimoneka nawa okuti omulao wa Huku womuenyo omuwa, maukafuiswapo pano pohi.

Jeova uhanda tutavele komulao wae wouye omupe wouviuki. Konyima yokupopia ononkhano onongwa makaetako, walaa okuti: “Tala! Ovipuka aviho ndyikahi nokuvilinga ovipe.” Ayawisako okuti: “Onondaka ombu ombotyotyili nokuakolela.” (Revelação 21:5) Omokonda yatyi wehelilongesila vali konthele yoñgeni ove navana uhole mupondola okukala pokati kavana vafenda Huku nehambu, maveketyimona tyina Huku amafuisapo omulao wae?