OSAPI YOKONDYE | OKUTI VOKUANKHIA VETUPU VALI EKEVELELO?

Ononkhia Mbueta Oluihamo

Atuho tuyele ononkhia, iya ovanthu ovanyingi kavahande okutomphola konthele yambo. Mahi atuho matumonekelwa nononkhia. Iya mbueta oluihamo olunene.

Natyike tupondola okulinga opo tukale tyafuapo atueheihamenwa tyina tuamankhisa tate ine o me, nauna tuelinepa nae ine omona. Ononkhia mbupondola okutuuhulukila ine okutumonekela apeho. Mahi, tyilinge tumonekelwa apeho nononkhia ine o pamwe vala, apeho tuihamenwa.

Antonio, wasiwapo na he wapumua netukutuku, wati: “Tyikahi ngatyina omunthu umwe aika povitunge viove mahi aende no nosapi. Kupondola okukondoka meumbo. Pahe usoka vala kovipuka wasamo. Utupu vali natyike. Hamwe usoka okuti hatyiliko, mahi otyili umwe iya utupu vali etyi upondola okulinga.”

Dorothy wasiwapo nomulume etyi ankho ena omanima 47, watokola okuovola omakumbululo omapulo amwe. Namphila ankho alongesa ovana Mokatikesi okuti tyina omunthu amankhi ohande yae itualako nomuenyo, mahi tyilityili ankho ketyii inkha vokuankhia vena umwe ekevelelo. Wapulile konkhalamutwe yongeleya yae okuti: “Oityi tyitumonekela tyina tuamankhi?” Emukumbulula okuti: “Nawike tyilityili utyii, tukevelelei vala opo tuketyimone.”

Okuti tuna umwe vala “okukevelela opo tuketyimone”? Okuti tuna etyi tupondola okulinga opo tunoñgonoke inkha vokuankhia vena ine vetupu ekevelelo?