OSAPI YOKONDYE | OUHAMBA WA HUKU KUOVE OITYI UHANGUNUNA
Oityi tusukila nouhamba wa huku?
Ovanthu ovanyingi mouye vena ekevelo Mouhamba wa Huku. Valandula etyi Jesus alongesile ovalanduli vae opo velikuambele okuti: “Ouhamba wove uye, Ehando liove lilingwe pano pohi.”
Soka ovanthu ovanyingi vesuka unene Nouhamba wa Huku, mahi vonongeleya vapopia Huku kavesukile nao. Konthele yotyo omuhipululi H. G. Wells wamona okuti Jesus “wapopia unene konthele yao. . . pokulongesa etyi aihana okuti Ouhamba Wokeulu,” iya Wells ati etyi “alongesa tyelikalela netyi tyilongeswa . . . Movikapela ovinyingi Viovakristau.”
Tyelikalela novikapela ovio, Onombangi mba Jeova vapopia unene Konthele Youhamba wa Huku. Tala: Omukanda wetu ou ukahi nokutanga wapitiyua momalaka 220. Omukanda ou kese tyikando ukahi nokulingwa onomiliau 46, moluotyo oo ukahi nokuawa vali unene mouye auho. Iya oityi omukanda ou upopia vali unene? Tala osapi yao aiho: Omutala Womulavi Wivisa Ouhamba wa Huku. *
Omokonda yatyi Onombangi mba Jeova valingila ononkhono ononene pala okukalavandya ine okuivisa Ouhamba wa Huku? Otyipuka tyimwe, omokonda tutavela okuti Ouhamba wa Huku osapi Yombimbiliya, omukanda wakolela vali mouye auho. Tyihe otyo vala, tuna onthumbi yokuti Ouhamba wa Huku oo vala maukatetulula ovitateka ovanthu vena hono.
Tyina vapaka komutwe Ouhamba wa Huku, Onombangi mba Jeova vekahi nokulandula ongeleka ya Jesus. Etyi ekahi pano pohi, Jesus walekesa momuenyo wae nomovilinga viae okuti Ouhamba wa Huku otyipuka tyesukisa vali unene. (Luc. 4:43) Omokonda yatyi Ouhamba ankho otyipuka tyakolela unene ku Jesus? Iya oityi Ouhamba uhangununa kuove? Tukuita opo utale omakumbululo Ombimbiliya ekahi mononthele mambulandulako.
^ palag. 5 Jeova enyina lia Huku ngetyi Ombimbiliya ipopia.