OSAPI YOKONDYE | OUHAMBA WA HUKU KUOVE OITYI UHANGUNUNA
Ouhamba wa Huku —Oityi Maukahangununa Kuove?
Ngetyi wetyimona mononthele mbokualamba Ouhamba wa Huku una ehangununo enene ko Nombangi mba Jeova. Iya hamwe ove ankho wanguanguana noviwa vimwe tuapopia mavikaetua komutwe Nouhamba wa Huku. Tupu, tyipondola hamwe ulipula inkha omilao ovio mavikelifuilapo umwe.
Mahi ove umunongo mokonda kutavela vala kese etyi wiiva. (Provérbios 14:15) Monkhalelo oyo, ove upondola okuelekwa no va Bereia vokohale. * Etyi vapopilwa tete onondaka onongwa konthele Youhamba wa Huku, ova Bereia ankho vetavela etyi veiva, mahi hamokonda vetavela okuti otyo otyili. Anthi, tete vaovolola nawa Ovihonekwa “opo vatale inkha ovipuka ovio viapopiwa otyili umwe.” (Atos 17:11) Monondaka ononkhuavo, vaeleka onondaka onongwa veiva netyi tyapopia Ovihonekwa. Otyo, tyevekalesa nonthumbi yokuti onondaka onongwa tyotyili mbatunda umwe Mondaka ya Huku.
Onombangi mba Jeova vekukonga nombili onene nove ulinge ngotyo. Notyilinga tyetu tyokulongesa ovanthu Ombimbiliya otyali, tukuavela omphitilo yokueleka etyi Onombangi mba Jeova vetavela konthele Youhamba wa Huku netyi Ombimbiliya ilongesa.
Tupu opo ulilongese konthele Youhamba wa Huku, okulilongesa Ombimbiliya tyipondola okukukuatesako okuvasa omakumbululo amwe omanene konthele yomuenyo, ngaa:
Haunene, okulilongesa Ombimbiliya tyikukuatesako ‘okufuena ku Huku.’ (Tiago 4:8) Ngotyo, tyina wamafuene ku Huku, matyikukuatesako okutala oñgeni Ouhamba wa Huku upondola okukuetela oviwa pahetyino nokomutue wandyila. Jesus etyi elikuambela ku Tate yae wapopile okuti: “Tyihangununa omuenyo uhapu, okukala nenoñgonoko liove Huku wike wotyotyili, na Jesus Kristu una watumine.”
^ palag. 4 O Bereia ankho epundaumbo lio Masedonia yokohale.