OSAPI YO KONDYE | OKUTI SATANASI OMUNTHU UMWE?
Okuti Tuesukisa Okutila Owoma Satanasi?
Satanasi omukalavi kamonwa, ukahi ngomphepo ikola ovanthu itiwa monóxido de carbono
Tyepuiya unene okumona omphepo ikola ovanthu itiwa monóxido de carbono, mokonda itupu otyivala, kainiki, mahi iipaa ovanthu liwa-liwa. Otyinyingi tyovanthu vankhia mouye noukola, vaipawa nomphepo oyo. Mahi katyisukisa okutila owoma. Kuna ononkhalelo ononyingi mbokuimbuka omphepo oyo nokuliyakulila. Ovanthu ovanyingi vapaka momaumbo avo onomakina mbokuyunga na mbuna mbulondola tyina pamoneka otyiponga.
Satanasi ukahi ngomphepo oyo, mokonda kamoneka kovanthu iya omukalavi unene. Mahi Huku ketuyeke atuike, utukuatesako. Ove kusukisa okutila owoma Satanasi inkha ulandula onondonga ombu pombwelo tupewa na Huku.
Epondolo liokulikoyela. Tiago 4:7 itupopila okuti: “Yalei Eliapu, nalio opo limutile.” Namphila Satanasi ena epondolo, mahi kekukuluminya okulinga ovipuka ove uhahande okulinga. Ove muene una okukoya. Omukanda wotete wa Pedro 5:9 wati: ‘Pandamanei nalio [Eliapu], amukala tyapama mekolelo.’ Hinangela okuti, Satanasi wayekelepo Jesus etyi emuhongiliya ovikando vitatu otyo aanya. (Mateus 4:11) Noove upondola okuholovona okuanya ononkhano Eliapu lilinga.
Oupanga na Huku. Tiago 4:8 itulunda okuti “Fuenei ku Huku.” Jeova oe muene ukahi nokukukonga opo ukale epanga liae. Oñgeni motyilingi? Onkhalelo ongwa upondola okutyilinga okuovola okumunoñgonoka vali nawa Mombimbiliya. (João 17:3) Etyi monoñgonoka konthele ya Jeova matyikukuatesako okukala nohole nae iya ohole oyo aikulundu okulinga ehando liae. (1 João 5:3) Ankho ukala noupanga na Tate yove keulu, ngwe malingi ñgeni? Tiago wati: “[Huku] nae “mafuene kuonwe.”
Jeova utuavela etsi tyituamena mopanphepo
Omulao wokuamenwa. Provérbios 18:10 yati: “Enyina lia Jeova etililo liapama. Omuviuki omo ahatekela iya aamenwa.” Otyo katyilekesa okuti enyina lia Huku likahi ngombindi. Mahi, tyilekesa okuti una, una onthilo nenyina liae upondola okuamenwa na Huku kese muvo.
Onongeleka mbotyotyili. Atos 19:19 itupopila konthele Yovakristau vamwe ovape mo Efesu, okuti: “Ovanthu ovanyingi ankho valingaile omaumbanda, vaeta omikanda viavo ankho vaundapesa moumbanda oo, iya aveviyoko notupia kolupala lwa aveho. Iya avavalula onombongo vilanda, ankho mbutuuka 50.000 mbovivela vio palata.” * Ovakristau ovo vahanyaunine ovipuka aviho viomawanga, alo vina ankho vilanda onombongo ononyingi. Ongeleka oyo ipondola okutukuatesako unene hono. Ouye weyula omawanga nomaumbanda. Alo okukala novipuka vioumbanda no viomawanga tyipondola okueta ovilulu. Tyesukisa okulipola ovipuka ovio momuenyo wove, namphila pamwe vialanda onombongo ononyingi.
Rogelio, wapopiwa monthele yotete, ankho ketavela okuti kuna Eliapu momanima 50. Mahi pahe wapilulula omalusoke ae. Omokonda yatyi? Rogelio wati: “Tete etyi nakala natyo momuenyo wange, Ombimbiliya. Etyi nelilongesa Movihonekwa tyankhuatesako okuti Eliapu okolikahi. Enoñgonoko olio pahe lindyakulila komahongiliyo Eliapu.”
“Etyi nelilongesa Movihonekwa tyankhuatesako okuti Eliapu okolikahi. Enoñgonoko olio pahe lindyakulila komahongiliyo Eliapu”
Okuti uhanda okutala onthiki imwe Satanasi keko vali? Moketyimona. Ovihonekwa viapopia omuvo umwe komutwe, Eliapu likahi nokuyapula ovanthu ovanyingi, “malikayumbwa metala liotupia no ixofili.” (Revelação 20:10) Tyotyili, otupia no ixofili katuipaa onoandyu. Mahi, otupia oto tulekesa ehanyauno lia apeho. Satanasi makanyimuako apeho. Omuvo oo maukala wehambu enene kovanthu va Huku!
Moluotyo, tualako okunoñgonoka ovipuka aviho konthele ya Jeova no nondyila mbae. * Soka okukalako apeho otyo utyii okuti, “Satanasi keko vali!”
^ palag. 8 Inkha opalata oyo ankho ombongo yova Roma, ankho ombongo oyo ipondola okutuuka ofeto yovanthu ovanyingi valingilila avafetwa onopalata 50.000!
^ palag. 11 Opo unoñgonoke vali oñgeni Huku atala Satanasi nomawanga tala okapitulu 10 komukanda Oityi Ombimbiliya Tyili Ilongesa? Ita Kombangi ya Jeova omukanda oo ine utanga mo Internete www.pr418.com.
