OSAPI YO KONDYE
Onombangi mba Jeova Ovalie?
“Mike, ndyimwii omanima omanyingi. Oe Ombangi ya Jeova. Mahi, ongeleya yae apeho inguanguanesa. Jeova olie? Omokonda yatyi Onombangi vehelipakela movipito viouye? Okuti Mike welipaka mongeleya maimuetela otyiponga?”
—Becky California, ko Amelika.
“Etyi namona ovomunthele yange valongeswa Ombimbiliya no Nombangi mba Jeova, andyilipulu okuti: ‘Enyina Onombangi mba Jeova lihangununa-tyi? Ngotyo enyina olio, o liongeleya?’”
—Zenon, Ontario, ko Canada.
“Ame nomukai wange ankho tusoka okuti Onombangi mba Jeova, vetutalela-po opo vetuvele onombei, mokonda tutupu ongeleya. Iya atusoko okuti, onongeleya ononene mbutupu etyi onthue tukahi nokuovola, nokangeleya ko Nombangi mba Jeova, ketupu-ale natyike.”
—Kent Washington, ko Amelika.
“Okupopia otyili, ame ankho hityii okuti ovalie, novipuka vetavela.”
—Cecilie Esbjerg, ko Dinamarka.
Tupu nove uhole okuvemona etyi vaivisa umbo na umbo na pana pavasiwa ovanthu ovanyingi, otyo vaava omikanda, nokulongesa ovanthu Ombimbiliya otyali. Hamwe uhole okutambula omukanda ou ku umwe puvo. No ngotyo, hamwe ulipula okuti tyilityili Onombangi mba Jeova ovalie. Hamwe uhole okusoka nga vana vapopiwa pombanda.
Inkha una omapulo ngoo, opi upondola okuvasa omakumbululo? Oñgeni monoñgonoka omatavelo Onombangi mba Jeova, na kuna kutunda onombongo mbovilinga viavo viokuivisa, no nomphangu apa vafendela? Iya omokonda yatyi vekuovolela meumbo liove ine o ponomphangu ononkhuavo?
Cecilie, wapopiua potete wati: “Ndyihole okutanga unene konthele yo Nombangi mba Jeova mo Internete. Ndyihole okuiva ovipuka vapopiwa, nokapungulula valingwa. Moluotyo, ame ankho ndyisoka ovipuka vihaviukile konthele yo Nombangi mba Jeova.” Mahi, konyima atomphola no Nombangi mba Jeova, avemuavela omakumbululo ayandyuluka omapulo ae.
Okuti ove uhanda okupewa omakumbululo otyotyili omapulo una konthele yo Nombangi mba Jeova? Tukuavela ondundo yokukeovola ku vana tyotyili venao, Onombangi mba Jeova, vokukahi nokulinga omukanda ou. (Provérbios 14:15) Tuna ekevelelo liokuti ononthele mambulandula-ko, mambukukuatesako okunoñgonoka onthue valie, nomatavelo etu, novilinga tulinga.
