Omapanga, atomphola apeho kese umwe na mukuavo, opo vakale noupanga omuwa. Tupu, Huku utukonga opo tupopie nae. Moluotyo, waikula ondyila opo tukale noupanga omuwa nae. Huku wati: “Onwe mamundyihana, amuya, amulikuambela kuame, iya ame mandyimutehelela.” (Jeremias 29:12) Tyina upopia na Huku, ove ‘mofuene [kwe], nae opo afuene kuove.’ (Tiago 4:8) Ombimbiliya itupopila okuti: “Jeova ukahi popepi novanthu aveho vemuihana.” (Salmo 145:18) Inkha tulikuambela unene ku Huku, noupanga wetu nae maukala vali omunene.

Jesus wati: “Omunthu patyi pokati kenyi tyina omona wae emuita ombolo, oe emuavela emanya? Ine pamwe tyina emuita ombisi, oe emuavela onyoka? Ngotyo, inkha onwe . . . mutyivila okuavela ovana venyi ovipuka oviwa, Tate yenyi yo keulu maavela vali unene ovipuka oviwa vana vemuiita!” (Mateus 7:9-11) Tyotyili, Huku ukukonga opo ulikuambele mokonda ‘oe wasuka nove.’ iya uhanda okukukuatesako. (1 Pedro 5:7) Ukukonga alo umwe opo umupopile ovitateka viove. Ombimbiliya itupopila okuti: “Muhakalei notyiho notyipuka natyike, mahi, muaviho, itei unene ku Huku nomalikuambelo kumwe nolupandu.”—Filipenses 4:6.

Ovanongo konthele yonkhalelo yovanthu, vehole okumona okuti ovanthu ovanyingi vena ehando liokulikuambela. Povanthu ovo, pakutikinya alo umwe vamwe vehetavela okuti kuna Huku. * Otyo, tyilekesa okuti ovanthu vatungwa nehando liokufenda Huku. Jesus wati: “Vena ehambu, ovovana vaimbuka okuti vesukisa okulongeswa na Huku.” (Mateus 5:3) Onkhalelo imwe yokufuisapo ehando olio, okupopia apeho na Huku.

Inkha tutavela ku Huku atulikuambela kwe, matyituetela ouwa patyi?