O Natale tunde kohale vati otyipito tyo Vakristau tyo Kutyitwa kwa Jesus. Mahi, oviso ovinyingi vilingwa potyipito otyo, vituhindila okulipula okuti oñgeni viahimbika okupakwa kumwe nokutyitwa kwa Jesus.

Mohi, kutupu otyiso konthele ya una utiwa Papai Noele. O Natale ilingwa hono, Papai Noele uvala otyikutu otyinkhuhu, nonondyeli ononthuelu, nokuelilomba motyipala. Onthiki yehambu enene, yahindwa neongano lilinga ovikunwa, Kokulio kwo Amelika mo 1931. Mokueenda kuomanima o 1950, ova Brazili vamwe, vaovolele okukumana Papai Noele na Tate Mbuale wo monoñgano mbo va India. Atyikala ñgeni? Omulongesi Carlos E. Fantinati, wati: Papai Noele, kafindile vala Tate Mbuale yo ko India, tupu “wafinda omona Jesus, iya akala otyilekeso tyiiwe nawa tyo tyipito otyo monthiki 25 ya Kayovo.” Okuti otyitateka motyipito tyo Natale, oviso vala, ngo tya Papai Noele? Opo tuvase ekumbululo, tukondokei konyima, komuvo wo Vakristau vo tete.

Omukanda umwe wati: ‘Mokueenda kuovityita 2 viotete viovilinga vio Vakristau, otyipito tyomanima a vana vaipawa ine a Jesus, ankho katyitavelwa.’ The Encyclopedia Britannica. Omokonda yatyi? Ovakristau ankho vatala ovipito viokutyitwa kuomunthu, ngatyina otyiso tya vana vehe Vakristau. Ngotyo ankho velityilika-tyo. Tupu nonthiki Jesus atyitwa, mo Mbimbiliya kai-mo.

Motyita tya 4 Pomuvo wa Kristu, namphila ankho Ovakristau vatokola okuhetavela ovipito viomanima, mahi, ongeleya yo Katolika aitokola okulinga o Natale. Valinga ngotyo, mokonda ankho vahanda okupameka ongeleya yavo, nokupola mondyila yavo ovipuka novipito ankho vahahandele, viayandyaneswa mo Roma no nongeleya mba vana vehe-Vakristau. Omukanda umwe wati: ‘Kese nima, okupolelela monthiki 17 ya Kayovo alo 1 ya Kupupu, ova Roma ovanyingi ankho vanyana ovipito viavo, . . . nokulipaka movipito ovikuavo nokufenda ovikahuku viavo.’ Christmas in America, wahonekua na Penne L. Restad. Mo 25 ya Kayovo, ova Roma ankho valinga otyipito tyokutyitwa Kuekumbi Lihafindwa. Okulinga o Natale monthiki oyo, tyahindila ova Roma ovanyingi, okuyeka-po otyipito tyokutyitwa kuekumbi avahulu ko tyokutyitwa kwa Jesus. Gerry Bowlerva wahoneka okuti: Ova Roma ‘ankho nkhele vena ehambu liokulinga ovipito ovio poutalala.’ Ankho ‘vatualako okulinga otyipito otyipe noviso ovikulu.’

Tyimoneka nawa okuti, otyitateka otyinene movipito vio Natale, okoku viatuka. Momukanda umwe, Stephen Nissenbaum, wapopia konthele yo Natale okuti ‘otyipito tya vana vehe Vakristau, mahi tyalombwa ngatyina otyo Vakristau.’ The Battle for Christmas. Ngotyo, o Natale isilisa Huku no Mona wae Jesus Kristu. Okuti otyo otyipuka tyihasilivila? Ombimbiliya ipula okuti: ‘Oñgeni ouviuki netyi tyihaviukile vipondola okukala kumwe? Ine otyitei tyina oupanga patyi nenthiki?’ (2 Coríntios 6:14) Ngetyi omuti wekula tyapenga uhevilwa okuviukiswa, tupu no Natale yapenga, “kaipondola okuviukiswa.”—Eclesiastes 1:15.