Monthiki 24 ya Fevereiro yo 2022 kombimba, o Rússia yahimbika okulwisa o Ucrânia, ngwe ovatumini mouye auho vatutumbile-vo nokuvepakaila-mo vahalwe. Mahi pahe ovilwa ovio mavikalesa-vo ñgeni ouye? Etyi ovilwa ovio viahimbika pakala vala ononthiki mbehehi, omuhoneki wo Nações Unidas, António Guterres ati: ‘Ovilwa ovio mavieeta ononkhumbi, nehanyu mo Europa no movilongo ovikwavo mouye auho.’

•   Sesusi Kilisitu wapopile okuti makuya omuvo umwe “otyilongo matyikalwisa otyilongo otyikuavo, ouhamba aukalwisa ouhamba omukuavo.” (Mateusi 24:7) Tanga onthele yati “Oityi Tyilekesa Okuti Tuli Momuvo Wonthyulilo” opo utale oñgeni Ombimbiliya ilekesa umwe okuti ovilwa vyo hono vili nokufuisapo etyi tyapopile Sesusi.

•   Omukanda Wombimbiliya Eholololo, waeleka ovilwa nomunthu wavelama “konkhambe ina otyivala tyotupia,” “upola ombembwa pohi.” (Eholololo 6:4) Tanga onthele yati “Ovalie Vavelama Kononkhambe Ononkhuana” opo utale oñgeni eulo olio lipopia umwe ovilwa vyo hono.

•   Omukanda wa Daniel wapopile ovilwa mavikala pokati “kohamba yo kokulio kuekumbi” “nohamba yo kokumbili kuekumbi.” (Daniel 11:25-45) Tala ovidiu yati Eulo Liafuisuapo — Daniel Okapitulu 11 opo utale omokonda yatyi o Rússia novilongo vielipaka kumwe nayo viatilwa ohamba yo kokulio kuekumbi. a

•   Omukanda Eholololo tupu wapopia “ovilwa vionthiki onene ya Huku Wepondolo Aliho.” (Eholololo 16:14, 16) Mahi ovilwa ovio, havilwa-ko ngevi tulwete hono pokati kovilongo. Tanga onthele yati “Ovilwa vyo Armagedom Oityi?” opo unoñgonoke vali nawa ovilwa ovio mavikeya komutwe.

•   Ombimbiliya yati Huku “makamana ovilwa kombanda yohi aiho.” (Salmo 46:9) Tanga onthele yati “Tyotyili Ovipuka Mavikaviuka” opo unoñgonoke vali nawa etyi Huku makalinga.

•   Sesusi walongesile ovalongwa vae opo pokulikwambela vaite Ouhamba wa Huku uye. (Mateusi 6:9, 10) Ouhamba oo, outumini wokeulu maukalinga etyi Huku ahandela ohi, ya tyimwe Huku ahandela ohi, okweeta ombembwa mouye auho. Opo unoñgonoke vali oviwa Ouhamba oo upondola okukweetela, tala ovidiu yati Ouhamba wa Huku Oityi?

 Mo Ucrânia muna Onombangi mba Siovaa valamba po 129.000. Navo vekahi vala Ngonombangi veli movilongo ovikwavo, vahetekele Sesusi, kavelipake mopulitika nii kavelipake movilwa. (Suau 18:36) Onombangi mba Siovaa mouye auho vatwalako okwivisa okuti “Ouhamba wa Huku” oo maukamanako ovitateka viovanthu, aviho umwe novilwa. (Mateusi 24:14) Tukwita upopie noonthwe opo unoñgonoke vali etyi Ombimbiliya ipopia matyikamoneka komutwe.