WAHATALUKWE LUNGUKA!
Oityi Ovanthu Veliyelele? — Oityi Ombimbiliya Ipopia?
Tyakaka unene okwiiva ovanthu veyele vakwavo, vankhindula omalwei, veyele omihoko vya vakwavo, novilulwa.
“Mokonda yovilwa viotyilongo tyo Isilayeli no tyo Gaza, nomakongombanda okuleka ovanthu, mono Internete pahe omo ovanthu veli nokulilevela.” — The New York Times, 15 de Novembro de 2023.
“Okuhimbikila 7 ya Outubro, ovanthu pahe vevilapo umwe okuyala vakwavo, vapopia ovipuka viokulileva, ya pahe okuliipaa tyakaka.” — Tyapopiwa na Dennis Francis, omunene Weongano Liovatumini Vouye (presidente da Assembleia Geral das Nações Unidas), 3 de Novembro de 2023.
Tyokulileva, nokuliipaa, novilwa, hatyipe-ko. Mwene tyili, Ombimbiliya yapopilia-le vo kohale, aiti: “[vayaha] nonondaka mbavo onombi ngonohevo,” otyo atyeeta ovilwa nokuliipaa. (Oviimbo 64:3; 120:7; 140:1) Ombimbiliya ityipopia okuti oundyale tweete hono movanthu una etyi ulekesa.
Okuliyele — Otyilimbo tyononthiki mbetu
Ombimbiliya ipopia ovipuka vivali vilekesa umwe omokonda yatyi ovanthu veliyelele.
1. Yapopia omuvo umwe ‘olwembia lwovanthu ovanyingi malukatenda.’ (Mateusi 24:12.) Ovanthu kavehole vakwavo, vayemba vali kokunkhindula oundyale pokati kovanthu, otyo yatyo pahe tyivilapo umwe unene. — 2 Timotiu 3:1-5.
2. Okuliyele oko noundyale oo wavilapo unene, ulekesa umwe nawa okuti Satanasi Eliapu olio lina nokuhongiliya ovanthu. Ombimbiliya yati: “Ouye auho uli peke liondingavivi.” — 1 Swau 5:19; Eholololo 12:9, 12.
Mahi tupu Ombimbiliya yapopia okuti Huku makahanyako omwii watyo weeta movanthu okuliyala. Tupu makanyima onongembia mbatuka-tuka komalwei oundyale oo. Ombimbiliya yati:
Huku “makasekuna ononkhuka momaiho avo, kakukankhiwa vali, kakukalilwa vali, kakukaululwa vali onkhwo, nii onongembia kambukakala-ko vali. Ovipuka vyo kohale vialamba-le.” — Eholololo 21:4.