Monthiki 19 ya Maio yo 2022, ombonge imwe yo Nações Unida yeliongiya novatumini valamba po 75 vati: “okulia kakumoneka mokonda yomukihi wo COVID-19, nomivo vipiluluka, pahe okuyawisako vali ovilwa ko Ucrânia, tyikahi nokweeta ondyala onene mouye.” Konyima yotyo, omukanda, The Economist wati: “Ovilwa vikahi nokutwala ouye wehekahi-ale nawa, mondyala imwe onene.” Ombimbiliya yaula-le okuti kononthiki mbuno makukakala ondyala onene, tupu itupopila etyi tuna okulinga tyina tulambela movitateka ovio.

•    JSesusi wati: “Otyilongo matyikalwisa otyilongo otyikuavo, ouhamba maukalwisa ouhamba omukuavo. Kovilongo ovinyingi makukamoneka ondyala.” — Mateusi 24:7.

•  Ombimbiliya momukanda Eholololo ipopia ovalume vekwana vavelama kononkhambe. Omulume umwe wavelama konkhambe imwe ilekesa ovilwa. Walandulwa nomunthu omukwavo wavelama konkhambe ilekesa ondyala, momuvo okulia kwahamoneka tupu kulanda onombongo ononyingi. Ombimbiliya yati: “Iya andyimono onkhambe onthikovei, iya una wavelama-ko ankho una otyipeyalo peke liae. Andyiivi otyipuka tyikahi ngatyina ondaka . . . yati: ‘Oneka yotiliku mailande onombongo omunthu afetwa onthiki aiho! Ononeka ononthatu mbo sevada mambulande onombongo omunthu afetwa monthiki aiho.’” — Eholololo 6:5, 6, Ombimbiliya Contemporary English.

 Omaulo oo Ombimbiliya apopia konthele yokulia kuhamoneka ekahi nokufuiswapo ononthiki mbuno Ombimbiliya iti: “Ononthiki mbonthyulilo.” (2 Timotiu 3:1) Opo unoñgonoke vali konthele “yononthiki mbonthyulilo” novanthu vekwana vavelama kononkhambe mbapopiwa momukanda Eholololo, tala ovidiu yati: Ouye Wapiluluka Unene Okuhimbikila mo 1914, tupu tanga onthele yati: “Ovalie Vavelama Kononkhambe Ononkhuana?”

•    Mombimbiliya muna omalondolo ekahi nawa apondola okutukwatesako okulambela movitateka vimwe viepuiya, aloo umwe tyina ovipuka vikahi nokulanda onombongo ononyingi ine okulia kuhamoneka. Tala onongeleka mbumwe monthele yati: “Oñgeni Molitekula Nonombongo Mbehehi.”

•    Tupu Ombimbiliya ituavela ekevelelo, etyi yati ovipuka mavikakala vali nawa. Itupopila okuti: “kombanda yohi makukakala ovilia ovinyingi” iya ovanthu aveho makakala nokulia. (Salmo 72:16) Opo unoñgonoke vali konthele yetyi Ombimbiliya yapopia matyikamoneka komutwe, no mokonda yatyi twiyumbila onthumbi, tanga onthele yati: “Komutwe Ovipuka Mavikakala Nawa.”